عباس صادر

عباس صادر سرائیکی شاعر ہے ۔ مظفرڳڑھ نال تعلق ہے۔

اصل ناں      غلام عباس

تخلص         صادرؔ

جمن           1965ء  

تعلیم          ایف اے

پیشہ           محکمہ تعلیم اچ اسسٹنٹ ہیڈ کلرک 

فون نمبر       03317338849

جاہ پتہ        موضع گُل قائم مستوئی ،چوک قریشی ضلع مظفر گڑھ

شعری مجموعہ ’’سک سمندر‘‘ دے خالق عباس صادرؔ دا تعلق کرم داد قریشی نال ہے آپ ’’سانجھ ادبی سنگت‘‘چوک قریشی دے بانی و جنرل سیکر ٹری ہن تے ایویں سانجھ ادبی لائبریری (چوک قریشی) دے وی آپ بانی ہن ۔2007ء کنوں شاعری دا آغاز کیتا ،ابتدائی رہنمائی معروف شاعر مشتاق سبقت ؔ کنوں حاصل کیتی۔خوبصورت لب و لہجے دی شاعری کریندن،شخصیت دے حوالے نال وی آپ ہک خوبصورت انسان ہن۔شاعری دے نال نال نثر وی لکھدن ،اکثر انہاں دے ادبی مضامین مختلف اخبارات اچ چھپدے رہ ویندن۔کیوں جو آپ ہر ہک نال اچھے تعلقات قائم کرن آلے غیر متنازعہ شخصیت ،خوش اخلاق انسان ہن۔تہوں آپ دا حلقہ ئِ احباب بہوں وسیع ہے،عباس صادر ؔ جتھاں وی ونجن اپنیاں یاداں ضرور چھوڑ آندن۔

عباس صادر صاحب دا تعارف:

عباس صادر صاحب دا اصل ناں غلام عباس خان ہِے، پر اُنہاں دا قلمی ناں عباس صادر اُنہاں دی شاعری دی شناخت بݨ ڳیا ہِے۔ اُنہاں دا تعلق مظفر گڑھ دے قصبے گرے والا نال ہِے، جِتھوں رندوانی بلوچ قبیلے دے لوک آباد ہِن۔ اُنہاں دے والد اللہ ودھایا خان رندوانی ہِن، جیڑھے کھیتی باڑی نال وابستہ ہِن۔ اُنہاں دی ابتدائی تعلیم گورنمنٹ مڈل سکول کرم داد قریشی وِچ تھئی۔ اُنہاں دے اُستاداں وِچ حاجی عبد اللہ خان سہرانی اَتے میاں محمد اختر شامل ہِن، جیڑھے اُنہاں دے شعری ذوق کوں نکھارݨ وِچ معاون ثابت تھئے۔ کالج دے دور وِچ اُنہاں نے مظفر گڑھ دے نامور شاعر سبقت اللہ خان توں شاعری دے گُر سِکھے۔ اللہ مایانا جہیں شاعر دی صحبت نے اُنہاں کوں قادر الکلام شاعر بݨاوݨ وِچ اہم کردار ادا کِیتا۔ عباس صادر صاحب دا شعری مجموعہ "سک سمندر" اُنہاں دے شعری اثاثے دا عکاس ہِے۔ اِیہ مجموعہ نہ صرف مظفر گڑھ بلکہ پورے سرائیکی وسیب کِیتے ہِک قابلِ تقلید نمونہ ہِے۔ اُنہاں دے کلام وِچ صحرا اَتے دریا دے امتزاج دا عکس واضح ہِے، جیڑھا اِیں دَھرتی دے باسیاں دی زندگی دی عکاسی کریندے۔ عباس صادر صاحب دا چوٹی بالا اَتے دامان دے علاقے نال گہرا تعلق ہِے۔ اِیہ علاقہ خواجہ غلام فریدؒ جہیں عظیم صوفی شاعر دی دَھرتی ہِے۔ اُنہاں دے کلام وِچ اِیں دَھرتی دے رنگ، لوکاں دے دُکھ سُکھ، اَتے سرائیکی کلچر دے عناصر نمایاں ہِن۔ عباس صادر صاحب دا کلام سرائیکی زبان اَتے ثقافت دے فروغ وِچ اہم کردار ادا کریندے۔ اُنہاں دی شاعری وِچ صحرا اَتے دریا دے امتزاج دا عکس واضح ہِے، جیڑھا اِیں دَھرتی دے باسیاں دی زندگی دی عکاسی کریندے۔

لکھت :اورنگزیب اورنگ بغلانی دامان علاقہ پچادھ چوٹی بالا

نمونہ کلام

ݙوہڑہ

اساں ڄمدوں لا دے رول ہسے سݙ رول نماݨی کیا پچھدیں

سر کھارا چا نت پھردی ہاں ایویں پیرو راݨی کیا پچھدیں

میں کملی گالھی بھولی توں کئی گالھ سیاݨی کیا پچھدیں

تیکوں صادر کیا میں ذات ݙساں ہاں ونگوراݨی کیا پچھدیں

                                                                           ع ص

غزل

اٹھے دل توں اشا کئی غزل تھی ونڄے

اکھیں ٻلکن ولا کئی غزل تھی ونڄے

میݙے مصرعیں توں رت دے پئے ہنجھو وہن

اینجھا رس کے ݙکھا کئی غزل تھی ونڄے

میں وی سر تال تے خوش تھی ڳاندا رہاں

اینجھی ڈھولک وڄا کئی غزل تھی ونڄے

میݙے سر تے سوار ہے مدامیں کنوں

مرے چپ دی بلا کئی غزل تھی ونڄے

میݙے خوابیں دے وچ آ کے لولیاں سݨا

میݙی مرحوم ما کئی غزل تھی ونڄے

میں توں رسی ویندی ہے میݙی شاعری

کؤئی ٹوݨا دعا کئی غزل تھی ونڄے

کئی اکھ دا اشارہ کئی مسکار ول

کئی اینجھئی ادا کئی غزل تھی ونڄے

میݙا خالق تیݙا میں وی نائب تاں ہاں

ݙیواں کن دی صدا کئی غزل تھی ونڄے

ع ص