ضیاء محی الدین

ضیاء محی الدین (20 جون 1931ء - 13 فروری 2023ء) ہک پاکستانی اداکار، پروڈیوسر، ڈائریکٹر تے ٹی وی نشریاتی مقرر ہن جیہڑے اپݨے سارے کیریئر دے دوران پاکستانی تے برطانوی سینما وچ نمودار تھیندے رہے ہن۔ ضیاء محی الدین برطانوی ہند وچ لائلپور (حالیہ فیصل آباد، پاکستان) دے شہر وچ 20 جون 1931ء کوں پیدا تھئے، انہاں دے والد خادم محی الدین تدریس دے شعبے نال وابستہ ہن تے انہاں کوں پاکستان دی پہلی فلم تیری یاد دے مصنف تے مکالمہ نگار ہووݨ دا اعزاز حاصل ہئی۔

Zia Mohyeddin, age 7 (on the floor, left) with the Central Training College Dramatic Club, Lahore, circa 1939. His father, Khadim Mohyeddin, is seated 2nd from right.

تعلیم

ضیا محی الدین نے 1949ء وچ گورنمنٹ کالج لاہور توں گریجویشن کیتا تے مزید تعلیم دے حصول کیتے پہلے آسٹریلیا تے ول انگلستان چلے ڳئے جتھاں انہاں نے رائل اکیڈمی آف تھیٹر آرٹس نال وابستگی اختیار کیتی تے صداکاری تے اداکاری دا سلسلہ شروع کیتا۔ 1956ء وچ اوہ پاکستان ولے لیکن جلدی ہی ہک اسکالر شپ تے انگلستان واپس چلے ڳئے جتھاں انہاں نے نے ڈائریکشن دی تربیت حاصل کیتی۔

پیشہ ورانہ زندگی

1960ء وچ جݙݨ ای ایم فوسٹر دے مشہور ناول اے پیسج ٹو انڈیا کوں اسٹیج تے پیش کیتا ڳیا تاں ضیا محی الدین نے اوندے وچ ڈاکٹر عزیز دا کردار ادا کرکے شائقین دی توجہ حاصل کر گھدی ۔ 1962ء وچ انہاں کوں فلم لارنس آف عربیا وچ کم کرݨ دا موقع ملا تاں انھاں نے اوں فلم وچ وی ہک یادگار کردار ادا کیتا۔ بعد وچ انہاں نے تھیٹر دے کئی ڈرامیاں تے ہالی وڈ دے کئی فلماں وچ کردار کیتے۔ 1970ء وچ ضیا محی الدین پاکستان آئے جتھاں انھاں نے پاکستان ٹیلی وژن کیتے ضیا محی الدین شو دے ناں توں ہک اسٹیج پروگرام دی میزبانی کیتی۔ اوں اسٹیج پروگرام نے مقبولیت دے نویں ریکارڈ قائم کیتے۔ ضیا محی الدین نے ہک پاکستانی فلم ’’مجرم کون‘‘ وچ وی مرکزی کردار ادا کیتا لیکن اوہ ایں میدان وچ کامیاب نہ تھی سڳے۔ پاکستان پیپلز پارٹی دی حکومت دے دوران انہاں کوں پی آئی ائے آرٹس اکیڈمی دا ڈائرکٹر مقرر کیتا ڳیا۔ اونہی دوران انہاں نے نامور رقاصہ ناہید صدیقی نال شادی کر گھدی۔ ضیا محی الدین نے پاکستان ٹیلی وژن توں جیہڑے پروگرام پیش کیتے انہاں وچ پائل، چچا چھکن، ضیا کے ساتھ تے جو جانے وہ جیتے دے نام سر فہرست ہن۔ اوہ اپݨی خوب صورت آواز وچ اردو ادب دے فن پارے پیش کرݨ وچ وی اختصاص رکھدے ہن۔ 2004ء وچ انہاں کوں کراچی وچ نیشنل اکیڈمی آف پرفارمنگ آرٹس دا ڈائرکٹر مقرر کیتا ڳیا۔

سرکاری اعزازات

2003ء وچ انہاں کوں حکومت پاکستان ولوں ستارہ امتیاز نال نوازا ڳیا۔ 2012ء اچ انہاں کوں ہلال امتیاز تے ستمبر 2021ء اچ صدر ایمیرٹس دا اعزاز ݙتا ڳیا۔

انتقال

13 فروری 2023ء کوں کراچی وچ 91 سال دی عمر وچ انہاں دا انتقال تھی ڳیا۔