صَرف

اساݙی ہر ڳالھ جیندے ذریعے اساں آپݨے دل دا مطلب سُݨݨ آلے تے واضح کرین٘دے ہیں۔ ہک جُملہ ہوندے۔ تے جملے کوں فقرہ وی آہدے ہن۔ جملے دا چھوٹے کنوں چھوٹا جُزو لفظ ہوندے۔ لفظ دے کجھ نہ کجھ معنے ضرور ہوندن۔ جہڑے ٹھیک طرحاں جملے وچ آکے کھُلدے ہن۔ بعض لفظاں دے معنے اون٘ویں کجھ ٻئے ہوندن لیکن جملے وچ آوݨ نال کجھ ٻئے تھی سڳدن۔ بعض لفظ مہمل یا بے معنی وی تھی سڳدن۔ ایجھیں بے معنی الفاظ قاعدے قنون توں ٻاہر ہوندن، ایں کیتے انھاں مہمل لفظاں کوں "قواعد زبان" دی بحث وچوں خارج کر ݙتا ویندے۔ قواعد زبان دا جہڑا حصہ بامعنی الفاظ نال تعلق رکھیندے اوں کوں علم صَرف آکھیا ویندے۔

ایجھے اصول تے ضوابط جیندے ذریعے ہک کلمہ کوں ݙوجھا کلمہ بݨاوݨ تے اُوندے وچ تبدیلی کرݨ دا طریقہ معلوم تھیوے، صرف ہوسن۔ علم صرف کوں صرف ایں واسطے آہدے ہن جو ایندا لُغوی معنی پھیرݨ ہے تے ایں علم وچ ہک کلمہ کوں پھیر تے ایندی مختلف صورتاں بݨاوݨ دا طریقہ بیان کیتا ویندے۔ ایں واسطے ایں کوں صرف آہدے ہن۔

صرف تے نحو: او علم ہے جیندے وچ لفظاں دا جوڑ توڑ تے ایندے ٻولݨ تے ورتاوݨ دا قاعدہ بیان کیتا ون٘ڄے۔