صاحبزادہ محمد شہزاد سلطان

حکومت ولوں صاحبزادہ محمد شہزاد سلطان کوں ایڈیشنل انسپکٹر جنرل آف پولیس جنوبی پنجاب دے عہدے تے تعینات کرݨ دا نوٹیفیکشن جاری کر ݙتا ڳئے۔ اے انہاں ݙینہاں ایڈیشنل آئی جی آپریشنز پنجاب دے عہدے تے فرائض سر انجام ݙیندے پئے ہن۔ صاحبزادہ محمد شہزاد سلطان ایں توں قبل ایڈیشنل آئی جی ٹریننگ پنجاب تے ایڈیشنل آئی جی اسٹیبلشمنٹ سی پی او پنجاب دے عہدیاں تے فائز رہ چکن۔ انہاں دا شمار پولیس دے ایماندار، انتہائی پروفیشنل تے تجربہ کار افسران وچ تھیندے۔ صاحبزادہ محمد شہزاد سلطان دا تعلق پولیس سروس آف پاکستان دے اکیہویں (21) کامن نال ہے۔ انہاں دا تعلق جھنگ نال ہے۔ انہاں نے 1993ء وچ بطور اے ایس پی پولیس سروس پاکستان جوائن کیتی۔ کیرئیر دے آغاز وچ صاحبزادہ محمد شہزاد سلطان نے CSA تے نیشنل پولیس اکیڈمی وچ خدمات سر انجام ݙتے۔ اے آر پی او شیخوپورہ ریجن، ، ڈی آئی جی کرائمز انوسٹی گیشن برانچ پنجاب، ڈی آئی جی ٹریفک پنجاب، ڈپٹی ڈائریکٹر جنرل آئی بی لاہور تے ایڈیشنل آئی جی آپریشنز وغیرہ دے عہدیاں تے فرائض سرانجام ݙتے۔ صاحبزادہ محمد شہزاد سلطان، لہور، ملتان، شیخوپورہ، بھکر، لودھراں، لیہ، مظفر گڑھ تے قصور وچ وی انتہائی اہم عہدیاں تے تعینات رہ چکن۔ انہاں نے 29 جنوری 2023ء تک سرائیکی وسیب وچ اپݨے فرائض سرانجام ݙتن۔