شیر افگن نیازی

شیر افگن نیازی
معلومات شخصیت
تاریخ وفات	11 اکتوبر 2012ء
جماعت	آل پاکستان مسلم لیگ
عملی زندگی
پیشہ	سیاست دان

شیر افگن نیازی پشتون نیازی قبیلے نال تعلق رکھݨ آلے ہک پاکستانی سیاست دان تے سابق وفاقی وزیر ہن۔ زندگی دے آخری ݙیہاڑے وچ اوہ جگر دے سرطان وچ مبتلا ہن۔ اوہ چار ݙینہہ قومہ وچ رہوݨ دے بعد 11 اکتوبر 2012ء کوں 66 سال دی عمر وچ انتقال کر ڳئے۔

ابتدائی حیاتی

شیر افگن نیازی یکم جنوری 1946ء کوں پیدا تھئے۔ ڈاکٹر شیر افگن نیازی نے نشتر میڈیکل کالج ملتان کنوں 1968ء وچ ایم بی بی ایس دی سند ڳھدی تے پریکٹس کریندے رہے۔ انہاں نے اپݨی سیاست دا آغاز 1979ء وچ ضلع کونسل کنوں کیتا۔ 1985، 1988، 1993ء تے 2002ء وچ اوہ رکن قومی اسمبلی منتخب تھئے۔ اوہ قانون و انصاف، سماجی بہبود تے پارلیمانی امور دے وفاقی وزیر وی رہے۔ 2002ء دا انتخاب انہاں نے پیپلز پارٹی دے ٹکٹ تے جتیا، پر بعد وچ پرویز مشرف دے بݨائے ڳئے پیٹریاٹ گروپ وچ شامل تھئے۔ انہاں ݙینہہ وچ قومی اسمبلی وچ جݙݨ وی اوہ تقریر کیتے کھڑے تھیندے ہن، تاں پیپلز پارٹی دے اراکین "لوٹا لوٹا" دی آوازاں لاوݨ لڳدے ہن تے شیر افگن نیازی اکثر انہاں کوں آہدے ہن جو "لوٹا وݙے کم دی چیز ہے، ایندی قدر کرو۔۔ واش روم وچ ایندے بغیر کم نئیں چلدا"۔ ڈاکٹر شیر افگن نیازی کافی خوش مزاج شخصیت دے مالک ہن تے آئینی امور تے انہاں کوں عبور حاصل ہئی۔ اوہ میانوالی وچ روایتی انداز وچ چادر مونݙھے تے رکھ کے عام لوکاں وچ گھل مل ویندے ہن تے بحث و مباحثے دے وݙے شوقین ہن۔ جݙݨ جنرل پرویز مشرف نے چیف جسٹس دے عہدے کنوں افتخار چوہدری کوں ہٹایا، تاں ڈاکٹر شیر افگن نے کھل کے ایں فیصلے دا دفاع کیتا، جیندے وجہ کنوں لاہور وچ وکلا نے انہاں تے گندے انڈیاں نال حملہ کیتا ہئی۔ انہاں نے بعد وچ جنرل مشرف دی سیاسی جماعت آل پاکستان مسلم لیگ وچ شمولیت اختیار کیتی ہئی، پر بعد وچ ایں کنوں وی مستعفی تھی ڳئے۔

وفات

٦٧ سال دی عمر وچ جگر دے کینسر دے عارضے وچ مبتلا رہوݨ دے بعد 11 اکتوبر 2012ء کوں انتقال کر ڳئے۔