شیریں فرھاد

قدیم غیر اشاعت شدہ مسودیں دے مطابق شیریں دا اصل ناں مٹھی ھا اوندے والد تدریس دے شعبے نال منسلک ھن ھیں سانگے مٹھی آکھنڑ دی بجائے او اونکوں شیریں دے ناں نال مخاطب کریندے ھن مٹھی ناں کہیں نوجوان دے منہ توں نکلے تاں ذو معنی تھی ویندے ایں سانگے شیریں ناں ھر لحاظ نال سہی ھا

شیریں بلپنڑ توں جوانی دی پوڑی تے پیر رکھیا تے علاقے اچ ھل ھل مچ گئی ایں واقعے کوں ماسی کندن اپنڑی ذاتی یاداشت اچ ایں نقل کیتے

ھک ڈینہوار ھولی دے جیہاڑے (پہلے ھندو مسلمان ھک ڈوجھے دے تہواریں اچ شریک تھیندے ھن) شیریں ھولی کھیڈ تے شام کوں گھر آئی تے اپنڑی اماں سینڑ کوں آن تے آکھئیس اماں میں جوان تھی گئی اں۔

اوندی ما کھل کراھیں اوندے کپڑیں تے لگے رنگ کوں ڈٹھا تے آکھیس میڈی بھولی بچی اے او رنگ نئیں جوانی دے رنگ بئے ھوندن

خیر شیریں جوان تھئی تاں علاقے دا ھر گبھرو جوان اوندے نال نکاح دا خواھش مند ھا اوندے بابے سئیں دی علاقے اچ وڈی عزت ھئی تے خاندانی لوک ھن شرافت دے چرچے دور دور تک ھن کافی لوک رشتہ گھننڑ کیتے وی انہاں دے گھر گئے لیکن انہائیں کوئی نہ کوئی بہانہ بنڑا تے ٹال ڈتا

ماشٹر صیب کوں سختی بدھا تے انہائیں گھر وچ ھک اضافی کمرہ بنڑواونڑ دے کیتے پیرو نال رابطہ کیتا پیرو وی وستی دا ھک مزدور ھا تے اساری دا کم کریندا ھا پیرو تے پیرو دا پتر فرھاد ڈوجھے ڈینہ اپنڑیں سندر چا تے ماشٹر صیب دے گھر کمرہ بنڑاونڑ پج گئے

فرھاد کوں پہلے جیہاڑے توں شیریں نال عشق تھی گیا اوندا دھیان تغاری آلے پاسے کائناں ھوندا ھا کئی دفعہ تاں سلھ دے ڈکرے کریندیں اپنڑیں ھتھ تے ھتھوڑی وی مار بیٹھا ھک جیہاڑے تاں پیو دے پیر تے تغاری چا ماریس پیو شودا پوڑی توں تلے ڈٹھا شکر اے جو گارا تلے بنڑیا پیا ھا نتاں لت بانہہ تڑٹ پوندی

اے واقعہ شیریں دی توجہ دا مرکز بنڑیا تے او فرھاد دی حرکت تے کھل کھل ولھوٹ تھی گئی آخر کمرہ تیار تھی گیا چھت پاونڑ توں پہلے مستری صاحب آکھیا مٹھائی منگواؤ دعا خیر دی آکھ تے چھت دا کم شروع کروں

ماشٹر صاحب تازہ جلیبیاں گھن آئے حالی دعا خیر آکھ تے جلیبیاں کھاونڑ بیٹھے تے کمرہ زمین تے داہ آن تھیا شکر اے گھر دا کوئی جی نال کائناں کھڑا ھا گالھ ودھ گئی جھیڑا شروع تھی گیا وت ماشٹر صاحب دی ذال آن تے چاچے پیرو کوں مندے کڈھنڑ پئے گئی پیرو اپنڑیں پتر کوں آکھیا گھر ونج تے ما کوں سڈ آ فرھاد شیریں ڈو ڈٹھا تے اوندی اکھ دے پیغام کوں سمجھ گیا جیڑھی اھدی کھڑی ھئی

ھیں فرھاد ھنڑ توں وی اینویں کریسیں

فرھاد ماشٹر صاحب دے گھرو تاں نکل آیا مگر دل اجازت نہ ڈٹی ڈھیر دیر خیر محمد خاں دی چکی تے بیٹھا چکی دی کو کو تے گڈیں دے ھینگاٹ سنرڈا رہ گیا گھنٹے بعد خیال آیوس جو ونج تے پیو دا پتہ کراں ماشٹر صیب دے گھر گیا تاں کیا ڈھدے پیرو کوں ڈنونڑ پئے پئین اوندی ما تے شیریں دی ما ھک بئے دے وال پکڑی پئین ماشٹر کندھ نال لگ تے روندا بیٹھے تے شیریں اپنڑیں پیو کوں حوصلہ بیٹھی ڈیندی اے وستی دیاں کجھ شیطان رناں فری سٹائل ریسلنگ دے مزے گھندیاں بیٹھین

کھلے کھا تے پورا ٹبر واپسی دے سفر اچ ھا اوندی ما تے اوندے پیو اوندے نال کتے آلی کیتی ایہو موقع ھا اوں اپنڑیں اماں کوں آکھیا جو شیریں کوں اپنڑی نونہہ بنڑا گھن ول انہائیں دے وال ساڈی جتی دے تلے آ ویسن اوندی ما کوں تجویز پسند آئی ملنڑ دی کوئی راہ ناں نکلی فرھاد مونجھ توں ماندا ھا دل دی ھبڑاس کڈھنڑ واسطے فرھاد ھک کتی پال گدھی تے سارا جیہاڑا بہہ تے اوندے نال گالھیں کریندا رہ ویندا ھا اخیر فرھاد دی ما کوں ترس آگیا

سبھل دائی دے ذریعے شیریں کوں پیغام بھیجا گیا جو فرھاد تیڈے دیدار دا مشتاق اے قاصد پیغام کجھ اینجھے طریقے نال ڈتا جو شیریں مطلوب بنڑ تے بھجدی آئی نانی سیانڑی دے کھوہ تے ملاقات دا پروگرام بنڑیا نانی سیانڑی جڈاں دی فوت تھئی کھوہ وی ویران تھی گیا اتھاں بندہ بشر کوئی کائناں ھوندا ھا لیکن اتھاں چوھے بہوں زیادہ ھن

ھک بئے نال گلے شکوے تھئے گالھیں باتیں تھیاں جسم جوان ھن مگر او ویلھے سادے ھن حیا بے حیائی تے غالب ھئی شیریں فرھاد دے مونڈھے نال سر لا تے گالھیں کریندی بیٹھی ھئ اچانک ھک چوھے شرارت کیتی جیڑھا پانچیں دے رستے رزق دی تلاش اچ کہیں غلط پاسے نکل گیا شیریں ڈر تے چیک ماری فرھاد کو ڈسیس فرھاد چوھے دی بازیابی واسطے ھتھ ودھایا تے عین موقعے تے ماشٹر تے اوندی گھر آلی دھی کوں لبھیندے اوندے سر تے آن کھڑے

ڈوھیں بے قصور ھن لیکن کڈاھیں کڈاھیں اکھیں ڈتھا وی کوڑ تھی ویندا رھندے شیریں اپنڑیں پاکدامنی دے بہوں اتبار ڈوائے لیکن ماشٹر فرھاد کوں چاٹیں نال آگیا جو تئیں میڈی دھی دی عزت کوں ھتھ پاتے

فرھاد ول ول اھدا رہ گیا جو ھتھ پاونڑ نال کجھ نی تھیندا میں تاں چوھا کڈھیندا پیا ھم ماشٹر دے پیریں تے سر سٹیس لیکن ماشٹر دھی کوں والیں کنوں پکڑ تے گھر گھن گیا علاقے اچ خبر پھیلی پنچائت آ بیٹھی

فرھاد ساریں کوں ٹھوک وجا تے آکھیا میں شیریں نال سچا پیار کرینداں تے ایندے نال نکاح کرنڑ چہنداں شیریں دے ما پیو جو وی ڈٹھے کوڑ اے

شیریں دے پیو الفاظ کوں کج تے سارا وقوعہ پنچائت کوں سنڑایا فرھاد شیریں دے پیو کوں آکھیا

سئیں جیویں تساں بالیں کوں کچا قاعدہ پڑھیندے ھاوے تے ھر لفظ دی تکرار کریندیں ھوئیں ڈو زبراں ھر لفظ تے پڑھیندے ھاوے اوندے وچ لام میم نون سارے الفاظ دی تکرار ھوندی اے اگر ایں ڈٹھا ونجے تاں تساں وی بالیں کوں غلط پڑھیندے رہ گئیو

ھک بڈھڑے اٹھی تے آکھیا ماشٹر صاحب میں اھدا ناں ھم زیر بنڑ زبر ناں بنڑ متاں پیش پووی ھنڑ اتھاں جواب ڈے

قصہ مختصر فرھاد دے عشق کوں آزمائش دی تتی ریت تے ازماونڑ دا فیصلہ کیتا گیا پنچائت دے وڈ وڈیریں فیصلہ کیتا جو توں شیریں دے گھر ھک غسل خانہ تعمیر کر جیندے وچ ماربل وی لگیا ھویا ھووے جیڑھا جدید دور دیں ضرورتیں تے آسائیشیں نال لیس ھووے فرھاد نے اے چیلنج قبول کیتا

فرھاد کم تے لگ گیا نال اوندی کتی وی ھئی کتے اچ وڈی وفا ھوندی اے جیڑھے ڈینہہ شیریں کوں موقع نہ ملے ھا کتی کتھاوں گوشت یا روٹی ٹکر گول اندی ھئی فرھاد اکثر کم کریندیں کریندیں تھکیڑے توں ترٹ تے اتھاھیں سمھ ویندا ھا کتی منہ چٹ تے اونکوں جگاوے ھا اوندے نال کھیڈے ھا اوندا دل وندلاوے ھا

ڈھیر سارا کم نبڑ گیا روڑی کٹنر دا ویلھا آیا ایں واقعے کوں ماسی جیونڑ دا پتر مھراب خاں ایں نقل کریندے

ڈوپہریں دا ٹائم ھا فرھاد بکھ توں نڈھال تھیا تے روڑی کٹنڑ اچ مصروف ھا کجھ دیر پہلے شیریں طعنے ڈے تے گئی جو تیڈیاں ایہے سپیٹاں تاں سر چٹے تھیونڑ تئیں شادی ونج کریسوں کاوڑ اچ اوندا ھتھ تیز تیز چلدا پیا ھا سارا جسم پگھرو پگھر

اچانک ھک دھاڑ دی آواز آئی وو دھاڑ وو میں برباد تھی گئیم

شیریں آن تے ڈیکھے تاں فرھاد بے ھوش تھیا لاتھے کتی نال اونکوں چٹیندی کھڑی اے تے سلوار خون نال بھری لاتھی اے شیریں سمجھ گئی جو کہیں گجھی جاہ تے سٹ لگی اے شیریں وی دھاڑ کیتی

ووئے اماں میڈا ککھ نوھی بچیا،،،

جتنی دیر اچ وستی آلے کٹھے تھئے خون پرنالے آلی کار وھندا رھیا اخیر فرھاد کوں ھسپتال داخل ونج کیتونے ڈاکٹر آپریشن کیتا ڈاکٹر جیڑھی شئے منگدا ھا او کتی دے معدے وچوں کون کڈھ تے ڈیوے ھا

اخیر ڈاکٹر آکھیا جان تاں بچ گئی اے مریض دی لیکن ھنڑ شیت ساری زندگی اے غسل خانہ تے شادی نہ بنڑا سگے صبر کرو

شیریں آکھیا ڈاکٹر صاحب بغیر وٹ دے ڈیوا کیڑھے کم دا میڈی ساری زندگی سکدیں گزرسی جو میڈا گھر آلا وی میکوں کما تے کھواوے تساں جانڑ بجھ تے میڈی زندگی اچ اندھارا کیتے ڈاکٹر سمجھیندا رہ گیا جو کاش تساں کتی دے پچنڑ توں پہلے پجھ ونجو ھا تاں شئیت کوئی شئے لبھ پوندی

راقم الحروف لکھدے جو اوندے بعد شیریں موئی جیندی دا کوئی پتہ نہ لگا کجھ سال بعد میں تجارت سے سلسلے اچ مبارک پور گئیم وساکھی دا میلہ لگیا پیا ھا تے ھک کھسرے دی وڈی دھوم ھئی اتھوں دا زمیندار محمد نواز پلنجو میڈا یار ھا جئیں اپنڑی ساری زمین اوں کھسرے دے قدمیں ڈھیر چا کیتی تعریف سنڑ تے میڈے دل وچ اوں کھسرے کوں ڈیکھنڑ دا شوق ابھریا

تکھیڑے توں موئے ھوئے جسم اتے مشتاق اکھیں دے سامھنڑیں ھک کھسرا آیا میڈیاں اکھیں جھمکنڑ بھل گیاں دماغ تے ھک دھاڑ ول ول ھتھوڑے آلی کار سٹاں مارنڑ کھڑ گئی،،

ووئے دھاڑ ووئے میں برباد تھی گئیم

مزید حیرانگی کوں ختم کرنڑ سانگے ھتھ پکڑیم تاں محسوس تھیا جو اے ھتھ روڑی وی کٹیندے رہ گئین

تحریر(فیض بلوچ)