شعبان جھلن شعبان

شعبان جھلن شعبان سرائیکی زبان دا شاعر ہے۔

تعارف

شعبان جھلݨ شعبان عہدِ حاضر دے ابھردے شاعراں اچوں ہک ہے جیڑھا نوپ تے نویکلپ دے سارے تقاضے پورے کریندن. انہاں دی غزل بارے صادق میر بیگ اہدن جو عہدِ حاضر وچ منفرد لب و لہجے دی ترجمانی کریندی اے. خوبصورت استعارے، تشبیہات، استعارے، تلمیحات تے اصنعات دا خوبصورت ورتاوا کریندے. بھانویں مشکل قافیے ردیفاں ورتے پر جڑت ایں کریندے جینویں کئی درویش کہیں موتیاں دی مالا بݨائی ہووے. شعبان جھلݨ شعبان دی شخصیات تے میر صادق بیگ، خیل عاقر، ظہور دھریجہ، محمد اجمیر امین اجمیری اتے اشفاق شیخ بھارویں مضمون لکھ چکن. شعبان جھلݨ شعبان اکویویں صدی دے پہلے مہنے اچ سکول داخلہ گھدا اتے دو ہزار ݙاہ اچ میٹرک گورنمنٹ ہائی سکول پیر بخش پنجابی توں کیتی. ایف اے بی اے اتے ایم اے اردو خواجہ فرید کالج رحیم یار خان توں کیتا اتے اسلامیہ یونیوسٹی آف بہاولپور توں ایم اے سرائیکی سپر کلاس اچ پاس کیتا. انہاں شاعری دا آغاز اردو شاعری کنوں کیتا اتے سینکڑاں غزلاں نظماں لکھیاں. اردو شاعری اچ پروفیسر ڈاکٹر زاہد اختر شاہین ہوراں توں اصلاح گھندے رہے اتے سرائیکی اچ صادق میر بیگ ہوراں توں. مختلف میگزین اخباراں وچ انہاں دے تحقیقی، تنقیدی تے تخلیقی مضمون چھپ چکن. حال ہی اچ انہاں دی سرائیکی شاعری دی کتاب ’’آس دی پونبل،، چھپ تے منظرِ عام تے آئی ہے جینکوں ٻہوں شہرت ملی ہے.

ڄم پل

پہلی مئی ١٩٩٤ء کوں رحیم یار خان وچ ڄمے۔

تعلیم

ایم اے سرائیکی، ایم اے اردو

کتاباں

• آس دی پونبل

نمونہ کلام

ایں دور دے اپݨے رنگ ہن تہوں

توں مجنــوں تے لیلیٰ ہاں میں

شعبانؔ

غزل

تانگھ اچ ہے زمین کیݙے ڳئے

ول نہ آیا مکین کیݙے ڳئے

سائیں سانول ساݙی تاں خیر اے

او مٹھا او حسین کیݙے ڳئے

یار ساݙے جو کالے مشکی ہن

ٻول ڑی آستین کیݙے ڳئے

ٻال ساݙے مسیت توں ݙردن

مولوی گھن کے دین کیݙے ڳئے

ہݨ خدا کر اچھا سخن ساݙا

سدھ نئیں ناقدین کیݙے ڳئے

شعبان جھلݨ شعبانؔ

بند

ہک وار  ساݙو تئیں بھالیا ہا اونویں اَڄ تئیں  جھات اِچ رُل ڳئے ہیں

اساں اپݨی ذات وسار کراہیں تیݙی ذات  دی  تات  اِچ  رُل  ڳئے ہیں

تیکوں ݙینہ دا سوجھلا دان کھڑے اساں رُل موئی رات اِچ رُل ڳئے ہیں

نوہی   مُہت  رکھیا   شعبانؔ   ساݙا  اساں  کُل   کائنات  اِچ  رُل ڳئے ہیں

شعبان جھلن شعبانؔ

تازہ کاری

ہولے تُوں مسکرا وحشت تھیوے

میــݙے کـــول آ وحشت تھیوے

وصــل دی کــوئی ڳال کـــریں ہا

ہاں پھٹے میـــݙا وحشت تھیوے

تانگھ صــــدیاں جینـدی رکھی

ٻول اوہو سݨــا وحشت تھیوے

ہک میں ہاں ٻیا وی میں ہاں اتھاں

الا تُـــــوں الا وحشت تھیوے

دل چُـــوں مہک دا جھــــولا آئے

مـونجھ ݙے ولا وحشت تھیوے

حــــال اپݨــــا سݨیداں تیــــکوں

ساقی توں پلا وحشت تھیوے

شعبان جھلن شعبان