سید نصیر شاہ

1932ء تا 2012ء

سید نصیر شاہ اردو تے سرائیکی دے مہاندرے شاعر تے کہنہ مشق نثر نگار ہن۔مگر آپ دیاں شعری تے نثری تصنیفات اردو اچ زیادہ ہن ۔اردو نثر اچ مختلف موضوعات تے آپ نے کئی کتاباں لکھیاں ۔جݙاں جو سرائیکی نثر اچ وی آپ دا ہک افسانوی مجموعہ ’’ککر دے پھُل‘‘ چھپ چکے۔تے ایویں اردو شعری کتاباں توں علاوہ سرائیکی شعری مجموعہ ’’بھُل گٖیا اپنْاں گھر‘‘وی چھپ چکے۔شعری اصناف اچوں غزل آپ دی پسندیدہ صنف ہئی۔تے غزل آپ وݙی مہارت نال لکھدے ہن۔کتاب ’’بھُل گٖیا اپنْاں گھر‘‘اچوں آپ دیاں ݙو عدد غزلاں پیشِ خدمت ہن۔

(1)غزل

کم نہ آسی اے سوالی !روشنی

مانگویں سورج دی کالی روشنی

تَیں پہاڑاں توں یدِ بیضا لبھا

آبشاراں توں میں ڈھالی روشنی

اُس محل توں پہلے میݙے گھر ڳئی

سدھی سادی ،بھولی بھالی روشنی

توں سمیٹیں ظلمتاں تیݙے نصیب

میݙی قسمت میں سنبھالی روشنی

چیر کے لکھاں گھٹاواں دے پَرَت

ݙیندی رہندی ہے ݙکھالی روشنی

نور ونڈ کے بے بصر لوکاں دیوچ

عمر ساری میں ہے ڳالی روشنی

دیر تائیں رہ ویسی سید نصیرؔ

میݙے لفظاں دی مثالی روشنی