سچ تے کُوڑ (افسانہ)

جو کجھ ساݙے چودھاروں تھیندا پئے،میکاولی دے مطابق تاں ایہو کجھ اِی تھیوݨا ہا۔ اے ساری ڳالھ کُوڑی نہیں پراے تمام سچ وی نہیں تاں وَل اے سوال جو تمام سچ کیا ہے؟ کیا کوئی تمام سچ ہے وی سہی یا کوئنی۔ میݙا خیال ہے جو تمام سچ تے تمام کُوڑ دا کوئی نروار تھی سڳدا تاں ہُݨ تئیں تھی چُکا ہوندا۔ سچ دی کوئی حتمی شکل ہوندی تاں ساری کھیݙ اِی مُک ویندی،وَل اساں پہلی ڳالھ تے آندے ہئیں جو ساݙے چودھاروں جو کجھ تھیندا پئے ایہو سچ ہے،جے ایہو سچ ہے تاں وَت ساریں کیتے کیوں قابلِ قبول کائنی۔ کیا اساں اِتھاں محض اُوں ڳالھ کوں سچ سمجھدے ہیں جو ساݙی سمجھ وچ آندے یا اونکوں جو ساݙے فائدے وچ ہوندے؟ جے اے ݙوہائیں ڳالھیں سچ ہِن تاں وَل کُوڑ کیا ہے؟ انسان اَزل کنوں انہیں ݙو ڳالھیں اِچ پھسیا ہووے تاں ابد تک پَھسیا رہسی،اَزل دے ابد دی تصور دی ساکوں ایندا میچا کرݨ دا وی کوئی اَوزار کائنی جو اَزل کتھوں تے کیویں شروع تھئے تے ابد کتھاں مُکسی تے آخر شروع اِی کیوں تھئے،اساں ایندا کوئی وی جواب ݙیوݨ دے اندھارے اِچ ٹٹارے مارݨ والی ڳالھ ہوسی۔ اساں تمام مذہبی صحیفیں کوں سوچ من گھنوں تاں وی سوال اپݨی جاہ تے رہسی۔ کیوں جو بندہ جے کر مطمئن ہوندا تاں اوندی بے چینی ختم تھی ویندی اوندا ݙُکھ ختم تھی ویندا،پر اساں ݙیہدے ہیں جو ہر جواب دے بعد بندے دا ݙُکھ مُکا نہیں،اوندی بےچینی ختم نہیں تھئی ہتھوں ودھی ہے،ہو نویں جواب اونکوں زیادہ بے چین کر ݙتے۔ ادب،آرٹ،شاعری،مصوری،موسیقی،صحیفیں دیاں تفسیراں ایں ڳالھ دی دلیل ہِن جو بندہ پہلی ڳالھ توں مطمئن نہیں۔ ادب تے آرٹ دے بارے اے ڳالھ آکھی ونڄ سڳدی ہے جو اے کجھ لوکیں دے ذاتی ناآسودگی دا اظہار ہے جے ایہا ڳالھ ہے تاں وَل وی اے سوال اپݨی جاہ تے قائم ہے جو اے ناآسودہ کیوں ہِن؟ آسودگی بذاتہ کیا ہے؟

کوئی آسودگی دی وی حمتی شکل ہے تاں او کیا ہے؟

جے نالفرض سارے بندیں کوں مطمئن کر ݙتا ونڄے تاں اوندے بعد جیڑھی شکل بݨسی اوندا وی کہیں کوں اندازہ ہے؟۔