سعید اختر سیال

1964ء تا 2021ء

سعید اخترؔ سیال 12 ستمبر1964ء کوں ڈیرہ اسماعیل خان اچ پیدا تھئے۔ایم اے کرنْ دے بعد ایم بی اے (بینکنگ)دی ڈگری حاصل کیتی تے ول پیشہ وی بینک کاری اختیار کیتا۔شعر و ادب دے حوالے نال آپ ڈیرہ اسماعیل خان دے چوٹی دے شاعر و ادیب تے نثر نگار ہَن۔آپ کئی شعری تے نثری کتاباں دے مصنف ، قومی ادبی ایوارڈ یافتہ شاعر و ادیب ہَن۔سعید اخترؔ سیال کوں اپنْی ماء دھرتی ،ماء بٖولی تے اپنْے سرائیکی وسیب نال انتہائی محبت ہئی۔آپ ہک خوش اخلاق ، ملنْسار ، من بھانونْی تے سوہنْی شکل و صورت دے مالک ، شیشہ دل انسان ہَن۔سعید اخترؔ سیال ڈیرہ اسماعیل خان دیاں ادبی محفلاں دی جان سمجھے ویندے ہَن پچھلے ڈٖینہاں بقضائے الٰہی آپ اللہ کوں پیارے تھی گٖئے ، آپ دی نا گہانی موت نہ صرف ڈیرہ اسماعیل خان بلکہ پورے سرائیکی وسیب واسطے ناقابلِ تلافی نقصان ہے۔اللہ تعالٰی مرحوم دی بخشش فرماوے۔ آمین۔

تعلیم

ایم بی اے کیتا ہے۔

خود لکھدن: یار میݙی ماء شہر دا ڄم پل ہئی. چٹی ان پڑھ. بھلا سرائیکی اچ پی ایچ ڈی. میکوں تاں اپݨی کچی تو سولھویں تئیں دی پڑھائی تے شرم آندی اے. نہ پوری تراویں اردو سکھ سگا ہاں نہ انگریزی. سوائے سرائیکی دے ݙوہیں زباناں سوچ سوچ کے لکھدا ہاں. شکر ھِ اماں ہئی. اڄوکا بال ہک ݙینھ اپݨی شہری پڑھی لکھی ماء کوں آکھسی، نہ ڄمیں ہا شالا. کئیں پاسے دا نِوھی چھوڑا

پیشہ

نیشنل بنک وچ افسر ہے۔

کتاباں

1. دیرا سندھ کنارے1991.
2. وساکھ۔۔2000
3. نوکھ۔2015
4. رنگولی۔2017

نمونہ کلام

کھوہ کھٹِیندا رہ ڳیا

کھوہ کھٹِیندا رہ ڳیا

اکھیں رہیاں سب سجاک

خاب ہتھاں کوں کھٹئی دے پورھے اُتے لئی رہیا

مٹی کوں وِندلئی رہیا

پاݨیاں دے جھانولے دا روہ پَٹِیندا رہ ڳیا

کھوہ کھٹِیندا رہ ڳیا

ساولیں دی سب تریڑ

چویا چویا تھی کے سِجھ دی بھا دا منہ کڄیندی رہئی

ڄڑھ تسلی ݙیندی رہئی

نویاں نویاں پونبلیں دا رنگ وَٹِیندا رہ ڳیا

کھوہ کھٹِیندا رہ ڳیا

پاݨی سارے ݙیکھݨ ہار

پاݨیاں دا ورد چارھے پاسے ہک ہک تھوݙ تے

تریہہ وی اپݨے ھوݙ تے

آس دا ہک سِیوݨ ہار اکھیں سِیندا رہ ڳیا

کھوہ کھٹِیندا رہ ڳیا

(سعیداختر)

سلام

حق جِویندا ویندا ہے حُسین شاہ حُسین

شک بھنیندا ویندا ہے حُسین شاہ حُسین

سَے ورھیں دے کچ کنڈیر کوں لتاڑ کــے

راہ بنڑیندا ویندا ہے حُسین شاہ حُسین

چیتے دی ٻناڑی کـولوں دل دی مݨ تلک

پُل جُڑیندا ویندا ہے حُسین شاہ حُسین

ہیݨے تھی کے جگ دا کھاڑا کیویں جیتݨئے

گُر ݙَسیندا ویندا ہے حُسین شاہ حُسین

دُھپ دے تھل تـے اپݨا پِچھــاواں ٹور کـے

چھاں کریندا ویندا ہے حُسین شاہ حُسین

ویلے دے اندھارے اڳوں سچی مُچی دا

مچ ٻلیندا ویندا ہے حُسین شاہ حُسین

ہجرتاں دی تختی تـے غریب پوچ دا 

غم لکھیندا ویندا ہے حُسین شاہ حُسین 

تساں ماری اؤ

تساں ماری اؤ

ساݙے جھڑ بدلاں تے مینہاں کوں

ساݙے سِجھ کوں، چن تے تاریاں کوں

ساݙے ݙینہاں کوں

ساݙے ہفتے، مانھ، تے سالاں کوں

تساں ماری اؤ ساݙے ٻالاں کوں

ساݙیاں کونجاں کوں

ساݙیاں گھائیں، کندراں، کاہیں، کوں

نہ پُرسا ݙیو ساݙیاں مونجھاں کوں

تساں ماری اؤ ساݙیاں منجھیں کوں

ساݙیاں ڳاہیں کوں

درگاہیں کوں

ساݙے موسماں کوں، ساݙے پاݨیاں کوں

ساݙے پُھلاں کوں

تساں ڈھائی اؤ ساݙیاں جھوکاں کوں

تساں تروڑی اؤ ساݙیاں پُلاں کوں

تساں نال کھڑاؤ وݙے ڈِھڈھاں کوں

چنگے ٹُھلاں کوں

ٻس پالی اؤ تساں مُلاں کوں

سعیداختر

غزل

راہ وچ ڄال، ٻیر، کریاں دے کوڑکے

کیویں کوئی ونڄے اپݨے تلکے کوں چھوڑ کے

مِتراں دی سِک وچ پُل وی بݨاوݨے

ٻیڑیاں کوں تار کے، تن من ٻوڑ کے

ڳلی تے محلے دیاں ٻوھے ٻوھے اکھیاں

جندرے نہ لاوݨے ، ݙیوݨے نہ ھوڑکے

ویس کُئی پرار دے نویں کر پویندیاں

نانیاں سیالے وچ پشماں ادھوڑ کے

لاݙڑو دے لاݙ نال سِجھ کوں رِجھاوݨا

پگھراں دے جھمب نال کپڑے جھٻوڑ کے

ایویں کئیں ڳالھ دیاں پݨڄاں کُھلیندڑے

ڄیویں بیج ݙیکھݨے تلی تے مروڑ کے

سعیداختر

سعید اختر دی ہک لکھت

شہزاد عرفان تے میں شاگرد سانجھ دے سنگتی ہیں. سرائیکی لوک سانجھ 2006 اچ مک گئی. ادھا حصہ سویل دے ناں دی نویں تنظیم اچ رل گیا. تے باقی ادھا سرائیکی لوک پارٹی بݨا کے سیاسی عمل کو ودھاوݨ دا اہر کیتا. ایں وچالے شاکا صاحب ہک واری ولا لوک سانجھ دا جھنڈا چاکھڑے. ڈیرہ اسماعیل خان، ملتان، تے بہاولپور لوک سانجھ دے گڑھ ہین. ڄتھاں ہُݨ لوک سانجھ لبھدی نئیں. صرف ڈی جی خان دے اسلام آباد بیسڈ سرائیکی اڄوکی لوک سانجھ دے کرتا دھرتا ہِن. انھاں کوں پچھلے ݙوں گروپ سرائیکی لوک پارٹی تے سویل دے پاسوں قیادت نئیں ݙتی ڳئی. ہک گھر ھے ڄیندے ارکان لوک سانجھ بݨ کھڑن. ڳالھ لوک سانجھ دے بݨݨ دی نئیں. ڳالھ جنوبی پنجاب صوبے دی ھے ڄیکوں اساں جملہ پراݨے سرائیکی وسیب زادے ریجیکٹ کریندے ہیں. تے ساری وسوں کوں سنیہا ڈیندے پئے ہیں ڄو 23 ضلعیاں دے سرائیکی صوبے توں علاوہ کوئی ݙوجھا ناں قبول نہ کیتا ویسی. توݨے ڄو ساݙی جدجہد کوں سو سال ٻیا لڳ ونڄے.

وفات

١٥ اکتوبر ٢٠٢١ء بروز جمعہ