سرحد
سرحد
مائیکروف
لیکھک: منصور شانی
سجھ بڈدا ویندے، چٹے چوک ڈینہ دے منہ تے پیلاہٹ پپھڑدی تے ودھدی ویندی ہے، سجھ منزل دو رواں دواں ہے، سجھ بڈسی تاں چندر ابھرسی، ول ٹھڈی مٹھی رات دی رت اچ بیٹ، وسبے ت وسوں دے واسی سکون دے سمسن، پکھی چوگاں چگ تے آلہڑیں دو ولدے پئن، ہک بۓ نال سارے ڈینہ دا حال حوال ونڈینے ویننن.رمضو مہانڑاں اپنڑاں کستا جلدی جلدی پرہلی کندھی نیونڑ لو چپو تے چپو چلائ پۓ. پتنڑ تے لہئ دی لاٹ اچو کالیں بھوریں منجھیں تے رتیں پیلیں گائیں دے گل اچ چنڑکیں دا سر، میریں دا راہ ڈیہدے گابیں،کٹیں دا شور، کھجی دے پوتریں دی ونڑی تڈی تے چھی مہینے دے عمر دراز کوں کھڈلیندی مائ خوشی تے کالی بکری دا چٹا کھیر ڈوہ تے کچے تھلے تے پیرو راہنڑیں ٹردی خانو مائ دے پیریں دا دبکار ٹھاکے دی ٹھاہ اچ گار تھیا گۓ.
سرحد تے گدری ساوی وردی اچ رائفل چا تے کھڑے فوجی کوں تقدیر کلمے دی مہلت وی نئ ڈتی. پکھی حال حوال ونڈنڑ بھل گئن،منجھیں گئیں دا جڈیں منہ آۓ بھج پئن،مہانڑےدا چپو چھٹ گۓ،مائ خوشی،عمر دراز کوں ہاں نال لۓچا پر بال دی چیک ، چیکنڑ تےمجبور کر ڈیندی ہے. خانو مائ دے ہتھو گڈوی ڈھۓ تے ازلاں تو تسی بھوئیں ت ونج پئ ہے بھوئیں کھیر، پانڑی تےخون دا فرق نئ جانڑدی کھیر وی پی چھوڑیۓ ت خون وی جذب کر چھوڑیۓ. کاش سرحد لکیندیں ہوئیں انسان سوچ گھنے ہا انسانیت دی کوئ سرحد نئ ہوندی ت سرحد دےآر پار شہید کوئ وی تھیوے آر پار مائ خوشی رنڈر تے عمر دراز یتیم تھی ویندے. سجھ منزل دو رواں دواں ہے، سجھ بڈسی تاں چندر ابھرسی، ول ٹھڈی مٹھی رات دی رت اچ بیٹ، وسبے ت وسوں دےواسی سکون دے سمسن پر پتہ نئ او کون خوش نصیب ہوسن. [١]