سرائیکی عوامی تریمت تحریک

سرائیکی عوامی تریمت تحریک پاکستان

ساݙیاں نہریں تے ناہراں دا قبضہ تھیا  

کھو کھسیجݨ’لڳے  سارے ٹوبھے ابھیچڑ دے ہتھ آڳئے

ساݙی سیت چھڑی ٻلکدی ریت تے کربلا رہ ڳئی تݙݨ’بکھ دے ہوٹے روزی روٹی دا حیلہ وسیلہ تے پڑھݨ ڳُڑھݨ پاروں جتھاں پورے سرائیکی وسیب کراچی دا پندھ کیتا اُتھاں ادا نذیر لغاری، ادا مشتاق فریدی، ادا شاہد جتوئی، ادا سعید خاور، مرحوم انجم لاشاری اتے ادا قاسم لاشاری مرحوم جہیں کئی دھرتی ڄئے اپݨی ماء دھرتی دے پیر چُم تے دیسوں پردیسی تھی ڳئے،  کراچی جہیں شاہر وچ جتھاں دھرتی دے نینگر دیسوں پردیسی تھئے ہن اتھاں تریمت وی حال توں بے حال ہئی  کیوں جو اوں ویلھے  حالات توں مجبور سرائیکی تریمت نُکراݨی اتے ماسی، جہیں ہزاراں روپ وٹا کے جیوݨ دا ترلا پئی کریندی ہئی، شاید بُکھ دے عذاب تے غریبی توں نڈھال ہئی، جو اونکوں مفلسی دے دیہہ  رولݨ تے مجبور کر ݙتا ہا، اتے رِیت روایتاں  دی زنجیر وچ جکڑی ہوئی اوں  تریمت کیتے جیڑھی اپݨی گنگدامی دی زندگی گزریندی پئی ہئ ادا نذیر لغاری سرائیکی عوامی سنگت بݨا تے وسیب واسیں کوں کٹھا کرݨ  دا جہڑھا عظیم کم کیتا او تاں آپݨی مثال آپ ہے۔ پر ول انھیں  آپݨی بختاں والی  ادی عابدہ بتول دے نال  سرائیکی تریمت تحریک بݨا تےجیویں وسیب دی ہر نیاݨی دے سر تے ہتھ رکھ ݙتا  سرائیکی عوامی تریمت تحریک گھوگھ اندرے وچ سوجھلے دی لاٹ آنڳڑ تریمتں کیتے ہک نویں امید بݨ گئی  

سرائیکی تریمت تحریک دے خواب کوں تعبیر دا چولاادا سئیں  نزیر لغاری  سرائیکی عوامی سنگت دے بھراویں نال رل کے پوایا  22  نومبر 2019 جمعہ چار وڄے  سرائیکی عوامی سنگت دے موجودہ صدر ڈاکٹر طارق محمود دے گھر  سرائیکی عوامی سنگت دا اجلاس رکھیا ڳیا ہا ڄیندے وچ اے فیصلہ کیتا ڳیا ہا کہ سنگتی بھرا آپݨے گھروں  پندھ دا پہلا پیرا چَاوݨ کیتے آپنڑے گھر دیاں تریمتیں کوں نال شریک کرین  ایں پاروں ایں اجلاس اچ  بھیݨیں نہ صرف شریک تھیاں بلکہ ادی عابدہ بتول سئیݨ  تے ادا نذیر لغاری سئیں دی سربراہی ءچ سرائیکی عوامی تریمت تحریک دا باقائدہ علان کیتا ڳیا  ، جئیں ءچ ادی ساجدہ بی بی ، ادی کرن قاسم لاشاری ، ادی شائستہ ،جتوئی ادی نسرین گل نینا ، ادی سعدیہ شکیل  ادی رخسانہ حیمد علی ادی انیلہ عابد ، ادی افصا ملک ،ادی  اسما  ملک ،ادی  عاصمہ ملک ، ادی شہر بانو زاہد ، ادی نادیہ پرویز جوئیہ ،ادی  زبیدہ ملک اچھا ،ادی یاسمین ملک اکبر ، ادی ممتاز ملک ،افضل  ادی رخسانہ عاشق لغاری ، ادی صغری لغاری  ادی  فاطمہ رشید جرانی ،ادی  ثمینہ شبیر ، ادی  عاصمہ شبیر ، شریک تھیاں ہن میں  بھیݨیں نال بھراویں دے ناں ہیں ڳالھوں لکھیم۔جو سرائیکی عوامی سنگت دے بھراء آپݨے قائد دے سݙ تے لبیک آہدیں ہوئیں اپݨی ٹٻری  دھیریں ‘، بھیݨیں سودھ حاضر تھی تے  اے ثابت کیتے جو  اساں  آپݨی دھرتی ، آ پݨی ٻولی آپݨی شناخت دی جدو جہد نال سچے تے مخلص ہئیں   تریمت تحریک  بݨیݨ دے بعد  ساݙی  باقائدہ تربیت کیتی ڳئی  ساکوں  الاوݨ  دے نال   علمی ادبی ، سیاسی  سماجی  شعور دی راہ ݙکھلاوݨ دے نال دنیا دے وݙے نظام ، مزاہمت تے انقلاب دا پندھ  کیویں تھیندین ڈسائے ڳئے   ساݙے مونݙھیں  اڳلی پیڑھی کیتے ہک سوجھل ݙینہہ دی زمہ واری ݙتی ڳئی  ، اڄ  تریمت تحریک کوں بݨئے پنج سال تھی ڳئین  انہاں پنج سالھیں چ تریمت تحریک کراچی تے ہر علاقے ہر گوٹھ  ہر جاہ ونڄ  بھیݨیں  کوں کٹھا کر انہیں اندر  شعور دا ݙیوا ٻالݨ داآہر کیتے  کوئی سماجی کٹھ ہوے  ، کراچِی آرٹس کونسل وچ علمی ادبی  کانفرنس  ہوے یا وت پریس کلب  ءچ

سرائیکی صوبہ دا قیام دا مطالبہ توں گھن چولستان دے قبضہ دی ڳالھ ، بلوچستان  اچ بے گناہ سرائیکیں دا قتلام سمیت ہر مظلوم دی حق دا الا بݨݨ والی سرائیکی عوامی تریمت تحریک ہمیشہ اڳوں رہی ہے ، سرائیکی عوامی تریمت تحریک دا پنجواں یوم تاسیس  ایں وار  ساݙے عظیم راہبر ادا نذیر لغاری سئیں دی طبعیت پارو ں سرائیکی عوامی سنگت دے آفس قلندریہ چوک تے کیتی ڳئی ،  ایں موقع تے   ادا نذیر لغاری سئیں طبیعت ٹھیک نا ہوون دے باوجود  آپ  شریک تھی ساݙی خوشی کوں رنگ لا ݙتا ،  کمپیرنگ. ہمیش وانگ میݙے حصے آئی  ادا مشتاق فریدی سئیں  ادی نینا تے تریمت تحریک دی سربراہ  ادی عابدہ بتول سئیݨ مختصر خطاب کریندے ہوئے آکھیا کہ  بھیݨیں آپݨا پندھ جاری رکھن  انھاں پارا چنار واقعے تے ݙکھ دی سانجھ تے  راشد عزیز بھٹہ دی گرفتاری دی شدید مزمت کیتی ایں موقع تے  بھیݨیں بھراوں  نال  سرائیکی دے  مشہور شاعر ،سئیں  مناف واقف ،سئیں  عصمت قیصرانی ، وقاص گرمآنی نے آپݨا سوہݨا کلام پیش کیتا اتے سرائیکی دی سوہݨی آواز سئیں اقبال طالش  سرائیکی گلوکار نے کمال سوہݨے گیت سݨڑائے ایں موقع تے  مہمان سنگر فہیم  تے انہاں دیاں بالڑیاں ایشا فہیم تے عائزہ فہیم نے کمال سوہݨے انداز اچ  سرائیکی سہرے آکھ تے محفل ءچ رونق لا ݙتی   اخیر ءچ سرائیکی عوامی تریمت تحریک دی پنجویں سالگنڈھ دا کیک   کٹیا ڳیا  

سرائیکی عوامی تریمت تحریک