سرائیکی صوبہ وکاؤ

"سرائیکی صوبہ وِکاؤ بھئی سرائیکی صوبہ وِکاؤ"

لوک سانجھ بھالپور ءچ انھاں مخصوص بندیاں دا کٹھ رکھ تے وسیب تے اسٹبلشمنٹ کوں میڈیا دے ذریعے شور مچاتے اے تاثر ݙیوݨ چاہندن جو " اساں سرائیکی تحریک دے مستند مہاندرے ھیں، وسیب سارا ایں گالھ تے راضی ہے جو اساکوں سرائیکی صوبہ نئیں بلکہ جنوبی پنجاب صوبہ چائہیدا ء"۔۔۔ تاکہ کل کوں انہاں دی ایں خدمت دے بدلے پی پی پی انہاں دے ٻالاں کوں کوئی چنگی نوکری تے عہدہ چا ݙیوے ۔۔ وسیب دے خلاف ایں سازش کوں سرانجام ݙیوݨ کیتے انہاں ٻہوں پہلے توں اپݨے مخصوص ایجنڈے تے اپݨی لابنگ پی پی پی، پی ٹی آئی، جماعت اسلامی، ق لیگ، ن لیگ، بہاولپور صوبہ محاذ تے باقی اسٹبلشمنٹ دے گماشتیاں نال مکمل کرگدی ء۔ لوک سانجھ تے اوندے حمایت کار سرائیکی وسیب، سرائیکی عوام دے قومی مجرم قرار ݙتے ویسن جیکر انہاں وسیب، سرائیکی تحریک، سرائیکی صوبے دی جدوجہد دے خلاف جنوبی پنجابی صوبی دی کوئی وی قرارداد پاس کیتی یا کروائی۔ماضی ءچ ایہے لوک سانجھ دے نام نہاد دانشور سرائیکی زبان کوں سینیٹ ءچ پیپلزپارٹی دے ہتھوں سرائیکی زبان دے خلاف ہک وڈی سازش کامیاب کر ڳئین جیندے ءچ سب توں پہلے ریاست دا قانونی تے اساݙا جمہوری عالمی حق " ماء ٻولی دا حق" کوں تلف کرݨ ءچ کوئی کثر نئیں رکھی۔ سرائیکی صوبے دے سوال، الگ صوبے دا مطالبہ، سرائیکی بحثیت الگ قوم آکھݨ، صوبے دا مطالبہ اے سبھو کجھ "سرائیکی زبان" دی بنیاد تے ء۔ تہوں پیپلزپارٹی نے سب توں پہلے سینیٹ ءچ پہلے خود قومی زباناں دا بل پیش کیتا جیندے ءچ سرائیکی کوں آپ شامل کرتے باقی تمام زباناں کوں اپݨی بھاری اکثریت نال پاکستان دی قومی زباناں قرار ڈے تے سرائیکی زبان کوں بطور قومی زبان نامنظور کیتا۔

اے تمام سازش لوک سانجھ، سندھی قوم پرستاں تے پنجابی قوم پرستاں نے پی پی پی دے سٹیج تے رل تے انجام ݙتا۔ انہاں لوک سانجھیاں اوں ویہلے وی اینویں ہک ڈرامہ اسلامہ آباد ءچ رچایا ہا تے اینویں دانش بازی دے کرتب لوکاں کوں ݙکھیندے ہن تے سڄی ݙکھا تے کھٻی ماری ہانے تے سرائیکی زبان دے خلاف قرارداد منظور کروائی ہانے۔اڄ ول بلکل اویں حاجی ، مہتر تے دھنتر شیاݨیں بݨ تے ول وسیب نال بہاولپور ءچ ڈرامہ کھیݙݨ چاہندن پر اُندے توں ودھ افسوس تاں اے ھے جو اپݨے کانڈھے ءچ جنہاں سرائیکی وسیب دے دانش وراں دا ناں لکھی کھڑن او تاں ہمیشہ انہاں کوں وسیب دشمن مفاد پرست تے موقع پرست آکھدے رہ ڳئین او کیویں انہاں مفاد پرستاں نال حامی بھری کھڑن ۔۔۔۔ اے وی شک دی گالھ ء جو انہاں دا ناں وچیندے نہ کھڑے ہون تے انہاں کون پتہ ای نہ ہوے جو کیہڑی بھاولپور آلی میٹینگ تے کہیں ڳالھ ہا البتہ جیکر دبڑو گھسڑو نال انہاں فراڈیاں رل تے کوئی وی قرارداد سرائیکی تحریک دے ناں تے جنوبی پنجاب صوبے دے حق ءچ منظور کیتی یا کروائی تے مردے دم تائیں وسیب دا ٻچہ بچہ انھاں کوں معاف نہ کریسی تے سرائیکی تاریخ ءچ بطور غدار سرائیکی سݙویسن بھانویں جتلے وݙے سرائیکی مہاندرے لکھاری یا دانشور ءی کیوں نہ ہون کیوں جو جیہڑی عزت لوک عوام کہیں کوں چنگے ودھیا کم دی بناء تے ݙیندن اُوہے لوک عوام ہک چھوٹی جئیں تاریخی غلطی تے اپݨے ݙتے ہوئے اعزازات واپس ای گھن سگدن۔۔تہوں جنہاں سرائیکی وسیب دے مہاندراں دے ناں لکھی کھڑن او اپݨی پوزیشن وضاحت سوشل میڈیا یا فیس بک اتے اخبارات ءچ واضح کرن جو او ایں کم ءچ شامل ہن یا کوئی نئیں۔کانڈھے موجب اے ناں ہن جیہڑے کل کوں سرائیکی وسیب توں جنوبی پنجابی بںاوݨ دے ذمہ وار سڈیڄ سڳدن۔۔۔١ـ سئیں عاشق خان بزدار ٢ـ حیدر جاوید سید٣ـ اکبر انصاری ٤ منصور کریم ٥ـ محمود نظامی ـ٦ نزیر لغاری ٧ـ احسن واگھاـ٨ جمشید رضوانی ـ٩ـاکرم میراݨی ١٠ـ قمر ملک ١١ـ خلیل بخاری ۔۔۔١٢ـاے ناں تہوں لکھے می جو متاں کل کوں کوئی اے نا آکھے جو اساکوں علم نا ہئی اساں تاں صرف سݙے تے ڳئے ہاسے ۔۔۔ اتھاں پورے وسیب دی اکھ ء ہر کہیں دی ہر حرکت اُتے۔۔۔ کوئی ڈساوے جو بھلا کیا طاقتور دا کمزور نال کوئی جوڑ یا ڈائیلاگ ہوندے؟ وسیب کو پاگل بݨائی کھڑن ۔۔۔ کیا مخدوم احمد محمود ، طارق بشیر چیمہ ، بلیغ الرحمٰن سرائیکی دے دوست تھی سگدن ؟ جنہاں ایں میٹنگ دا فیصلہ کرݨے باقی تاں سارے جنج دے جھومرے ہوسو جنوبی پنجاب صوبے دی برات دے۔۔۔ پر وسیب نال بیادری مکا باہسو۔۔۔۔۔ ۔۔ آکھدن جو " کھادی ہائی باندراں ملی ہائی رچھاں دے مونہہ کوں" ۔۔۔۔۔۔۔۔ تہوں وسیب دے سبھے مہاندرے ایں نام نہاد کٹھ دا بائیکاٹ کیتی کھڑن تے جو صرف کتھائیں متاں صرف کٹھ ءچ ونڄݨ نال ساری زندگی دی ملامت سر تے چاوݨی پوسی جو " سرائیکی صوبہ ہناں ویچیا ہا تے اساکوں جنوبی پنجابی بݨاوݨ آلے ایہے غدار سرائیکی ہن۔