سرائیکی زبان اسلامی نقطہ نظر نال

ساریاں ٻولیاں الہامی( اللہ پاک دے طرفوں القاء کیتیاں ہوئیاں) ہن

ساریاں اسمانی کتاباں انہیں قومیں دی ماءٻولی اچ نازل تھئن جتھاں جتھاں اللہ پاک رسول بھیڄن

اللہ پاک اپݨے بےعیب فرمان قرآن مجید وچ خود فرمیندے وَ مَاۤ اَرْسَلْنَا مِنْ رَّسُوْلٍ اِلَّا بِلِسَانِ قَوْمِهٖ لِیُبَیِّنَ لَهُمْؕ-فَیُضِلُّ اللّٰهُ مَنْ یَّشَآءُ وَ یَهْدِیْ مَنْ یَّشَآءُؕ-وَ هُوَ الْعَزِیْزُ الْحَكِیْمُ(4)

ترجمہ

اتے اساں ہر رسول کوں اوندی قوم دی زبان دے نال بھیجا تاکہ او انہیں کوں واضح کرکے ݙساوے ، ولا اللہ گمراہ کریندے جیکوں چہندے اتے راہ ݙکھیندے جیکوں چہندے اتے او ہی عزت آلا، حکمت آلا ہے۔ ایں آیت مبارکہ وچ اللہ پاک اے بیان فرمائے جو اساں سارے نبی جتھاں بھیڄن انہیں دی آپݨی قوم اچوں بھیڄن اڳو خود ہی ایندی حکمت بیان فرمائی ہے جو او انہیں کوں واضح کر کے ݙساون مطلب کہیں شئے دی وضاحت تے سارے کجھ دی سمجھ آوݨ انھائیں دی ٻولی نال ہی تھی سڳدے اللہ پاک آپݨی آخری نبی تے کیتی ڳئی آخری کتاب قرآن پاک کوں عربی زبان اچ نازل کرݨ دی حکمت خود بیان فرمائی وَ لَوْ جَعَلْنٰهُ قُرْاٰنًا اَعْجَمِیًّا لَّقَالُوْا لَوْ لَا فُصِّلَتْ اٰیٰتُهٗؕ-ءَؔاَعْجَمِیٌّ وَّ عَرَبِیٌّؕ-قُلْ هُوَ لِلَّذِیْنَ اٰمَنُوْا هُدًى وَّ شِفَآءٌؕ-وَ الَّذِیْنَ لَا یُؤْمِنُوْنَ فِیْۤ اٰذَانِهِمْ وَقْرٌ وَّ هُوَ عَلَیْهِمْ عَمًىؕ-اُولٰٓىٕكَ یُنَادَوْنَ مِنْ مَّكَانٍۭ بَعِیْدٍ(44)

ترجمہ

اتے جیکر اساں ایکوں عربی دے علاوہ کہیں ٻئی ٻولی دا قرآن کرݙیندے تاں کفارضرور آدھے: ایندیاں آیتاں کیوں واضح نی کیتیاں ڳیاں ؟ کیا کتاب عجمی ہے اتے نبی عربی ہے؟ تساں فرماؤ: او ایمان آلیں کیتے ہدایت اتے شفا ہے اتے او جیڑھے ایمان نیں گھن آندے انہیں دے کنیں اچ ٻوجھ ہے اتے او انہیں تے اندھا پن ہے ۔گویا انہیں کوں دور دی جاہ توں سݙیا ویندا پئے جتھاں پیارے آقا صلی اللّہ علیہ وآلہ وسلم تشریف گھن آئن اتھوں دی ٻولی عربی ہئی تاں اللہ پاک قرآن کریم کوں عربی وچ نازل فرمائے باقی ریہا قبیلیں تے زبانیں دا مختلف ہووݨ ایندی حکمت خود اللہ تبارک وتعالی بیان فرما ݙتی ہے خود فرمیندے یٰۤاَیُّهَا النَّاسُ اِنَّا خَلَقْنٰكُمْ مِّنْ ذَكَرٍ وَّ اُنْثٰى وَ جَعَلْنٰكُمْ شُعُوْبًا وَّ قَبَآىٕلَ لِتَعَارَفُوْاؕ-اِنَّ اَكْرَمَكُمْ عِنْدَ اللّٰهِ اَتْقٰىكُمْؕ-اِنَّ اللّٰهَ عَلِیْمٌ خَبِیْرٌ(13)

ترجمہ

اے لوکو!اساں تہاکوں ہک مرد اتےہک عورت نال پیدا کیتے اتے تہاکوں قوماں اتے قبیلے بݨائے تاکہ تساں آپت اچ پچھاݨ رکھو، بیشک اللہ دے ہاں تساں وچوں زیادہ عزت آلا او ہے جیڑھا تساں اچوں زیادہ پرہیزگارہے بیشک اللہ جاݨݨ آلا خبردار ہے۔ مزید فرمیندے وَ مِنْ اٰیٰتِهٖ خَلْقُ السَّمٰوٰتِ وَ الْاَرْضِ وَ اخْتِلَافُ اَلْسِنَتِكُمْ وَ اَلْوَانِكُمْؕ-اِنَّ فِیْ ذٰلِكَ لَاٰیٰتٍ لِّلْعٰلِمِیْنَ(22)

ترجمہ

اتے اسمانیں تے زمینیں دی پیدائش اتے تہاݙی زبانیں تے رنگیں دا اختلاف اوندیں نشانییں وچوں ہے، بے شک ایندے اچ علم آلیں کیتے نشانیاں ہن قومیں تہذیبیں تے ٻولیں دے مختلف ہووݨ کوں اللہ پاک آپݨیاں نشانیاں فرمیندے