سبز باغ ہاؤسنگ سکیم (انشائیہ)

سبز باغ ہاؤسنگ سکیم  (انشائیہ)

از: ڈاکٹر خالد اقبال آپنے ذاتی مکان تے چھت نہ رکھن آلے بے آسرا لوکاں کُوں بہوں اَسان قسطاں تے پلاٹ ڈیون کیتے خواب ادراکی نے سبز باغ ہاؤسنگ سکیم دا منصوبہ بنائے۔ اے رہائشی منصوبہ کیا ہے۔ بقول اُنہاں دے سِدھے سادے تے غریب لوکاں کوں ٹھگن دا پروگرام ہے۔ خواب ادراکی دا اَکھان ہے۔ بھئی جتھاں ایں ملک اِچ بے بہوں سارے لوک اِنوں اُنوں دے منصوبیاں تے سازشاں نال عوام کول اُنہاں دی جمع پونجی چھکیندے آئے ہِن۔ اووی کجھ ہِیں قسم دا ارادہ رکھیندے ہن۔ اگوں سِدھے سادے لوکاں دی مرضی ہے۔ خواب ادراکی نے شہر تُوں کجھ میل دے فاصلے تے ہک بہوں وڈے رقبے تے سبز باغ ہاؤسنگ سکیم دے ناں توں ہک نواں شہر آباد کرن دا پروگرام بنایا ہے۔ منصوبے دے ناں توں اِی ظاہر ہے جو ایں منصوبے دا تقریباً 90 فیصد ترقیاتی کم آپنے توڑ کوں پُج چکے۔ رہائشی تے کمرشل پلاٹ بہوں سستی قیمت تے دستیاب ہِن۔ اے آپنی نوعیت دا کلہا منصوبہ ہے۔ جیہڑا جنت دا نمونہ ہوسی؟ بنیادی سہولتاں ڈیون اِچ یقیناً ہک عرصہ لگسی۔ پر اُنہاں دے خیال موجب عوام کوں جھانسہ ڈیون کیتے ایں طرحاں دیاں گالہیں کرن بہون ضروری ہے۔ تاں جو سِدھے سادے لوک ہک دفعہ وَل پھَس ونجن۔تے اُنہاں دی بلا نال 100 مہینے قسطاں اِچ قسطاں پوریاں کریندے راہون۔ او لوکاں دی جمع پونجی گھن تے ملک اچوں پھُٹا کھاویسن تے باقی زندگی باہر لے ملک ارام نال گزریسن۔ خواب ادراکی نے اے وی فرمایا ہے جو سبز باغ ہاؤسنگ سکیم دیاں سڑکاں 30۔ 40 فٹ کھلیاں ہوسن۔ ہک ادھی سڑک تے ترقیاتی کم جاری ہے۔ تاں جو موقعے تے آون آلے لوکاں دے دِل اِچ پلاٹ خرید کرن دی کجھ تاں اُمید پیدا تھیوے۔ اُنہاں دا اَکھان ہے جو سبز باغ ہاؤسنگ سکیم اِچ کمیونٹی سنٹر‘ مسجد‘ سکول‘ ہسپتال‘ گراسی پلاٹ تے قبرستان تے زندگیاں دیاں ڈوجھیاں سہولتاں ڈتیاں ونج سگدیاں ہِن۔ اے او سہولتاں ہِن جنہاں دے بارے اِچ ہر او بندہ ضرور سچیندے جیندی آپنی چَھت کینی۔ پر اے سب کچھ ہک لخطے تاں ناں تھی ویسی۔ اے آپنی نوعیت دا کلہا منصوبہ ہے۔ جیندے اُتے لوک اَکھیں بند کر کے یقین کرن۔ تے اللہ دا ناں گھن تے آپنی نیک کمائی اچوں قسطاں جمع کراون شروع کر ڈیون۔ تے ایندے بعد اَکھیں نوٹ کے خواب ڈیکھن شروع کر ڈیون۔ حقیقت کوں حقیقت بنن اِچ واقعی بہوں عرصہ لگدے پر خواب ڈیکھن تے اصلوں پابندی کینی۔ سدھے سادے لوک چھیکڑ بانڈز دیاں پرچیاں گھن تے وی تاں ایں ملک اِچ آپنی بدحالی کوں دور کرن کیتے اچھے بُرے خواب ڈیدھے اِی پن۔ مایوسی گناہ ہے۔ خواب ڈیکھن گناہ کینی۔

خواب ادراکی دا اَکھان ہے جو کرائے دے مکاناں اِچ آپنے بال بچیاں تے گھر آلیاں نال اوکھی زندگی گزارن آلیاں اِچوں زیادہ تعداد (سرکاری) چھوٹے ملازماں دی ہوندی اے۔ تے اے او طبقہ ہوندے جیہڑا رشوت کوں آپنے آپ تے حرام سمجھیندے۔ قناعت تے صبر شکر اُنہاں دا وطیرہ ہوندے۔ تے اَج دے ایں دور اِچ وی رشوت‘ سود خوری‘ناجائز منافع خوری یا 2 نمبر مال ویچ کے ہک رات اِچ ترقی کیتی ونج سگدی ہے۔ یا ول صبر شکر دی دولت دے سہارے آپنی حق حلال دی کمائی اِچوں سبز باغ ہاؤسنگ سکیم دے پلاٹ آسان قسطاں تے خریدے ونج سگدے ہن۔ تفصیلات سبز باغ ہاؤسنگ سکیم۔

(بشکریہ خواب ادراکی)

(اقتباس از کتاب: مُسکار (سرائیکی انشائیے)۔ از: ڈاکٹر خالد اقبال)

MubasherKaleem (talk) 09:47, 10 June 2019 (UTC)