ساحر رنگپوری دی شخصیت

رنگ پور کوں میں طائف سمجھدا ہم، رنگ پور کوں ہُنڑ وی میں کھیڑیں دا شَہر سمِجھ تے بے رنگ سمجھدا راہواں ہا جیکر میں رنگ پور دے ساحر کوں نہ ملاں ہا... ساحر سئیں جئیں ویلھے شعر پڑھدِن تاں ایویں لڳدے جو رانجھا وی ہُو بہو ایویں الیندا ہوسی. ہُنیں دے لہجے دی مٹھاس تے ہُنیں دی اکھیں دی چمک ݙیکھ کراہیں میکوں ایویں لڳدے جو ہنیں دی پیدائش ای محبت کرݨ سانگھے تے شاعری کرݨ سانگھے تھئی اے. محبت جئیں ویلھے کہیں بُت اچ آپنڑیں روح پُھوک ݙیندی اے تاں ول اوں جسم اچوں کوئی خاص مقناطیسی لہراں نِکلدن جیہڑیاں ݙسیندن جو ہِیں جسم دا رہائشی مُحب وی ہے تے محبوب وی ہے. ساحر سئیں کوں ملݨ آلا ہر سنگتی گواہی ڈیسی جو ہُنیں دے نال ٻہندے ہی او لہراں واضح طور تے محسوس تھیندِن.

ساحر رنگ پوری سئیں اوکاڑہ یونیورسٹی وچ ریاضی دے لیکچرار ہن. اج کل لہور ریاضی وچ پی ایچ ڈی کریندے پن. ہک انگریز آکھیا ہا کہ اگر کوئی انسان خدا تک واقعی پہنچ ڳیا تو او کوئی ریاضی دان ہی ہوسی کیوں جو میں کائنات دی ہر شئے وچ ریاضی دے کلیے استعمال تھئے ہوئے ݙٹھن. شاعری وچ ریاضی کتلا اثر انداز تھیندی ھ اے تاں ساحر سئیں آپ ہی ݙسا سڳدن میکوں تاں ہُنیں دی شاعری وچ حساب دی بجائے جذبات نظر آندِن. او جذبات جیہڑے انسان دی روح کوں شاد کریندِن تے شعور کوں پوِتر کریندِن... مرشد تواݙی زندگی دے چند لمحیں دی مل پووݨ والی سانجھ اساݙی ساری زندگی دا حاصل ھ... سدا سلامتی..

وݙ وݙیرے ݙس ڳئے ساکوں عشق دیاں ساریاں رمزاں دل دے جندرے کیویں کُھلدِن کیڑھی کُنجی لڳدی (ســؔـاحر)

عثمان کریم بھٹہ