زبان تے تہذیب دا تعلق

زبان تے تہذیب دا تعلق

انسان جہڑے ویلے غاراں وچ وسدا ہا. او اَڄاں لفظاں دے ذائقے کائیناں چکیھئے ہن. اوکوں حرفاں دا علم کائیناں ہا. او چھڑا چکاٹ ٻکاٹ نال اپݨا مدعا بیان کریندا ہا. دنیا دے سارے چرند پرند قسم قسم دیا آوازاں کھڈ کے اپݨی ڳال کریندے ہن. بلکل ایویں انسان اپݨی زبان دا آغاز کیتا. پہلے زمانے اچ انسان کوں سب توں وݙا مسلئہ خوراک دا ہا. شکار دی ڳول اچ او اپݨی زندگی گزریندا ہا. ہک ٻیا مسلئہ اوکوں اپݨی حفاظت دا وی ہا. جو جنگلی جانور ،قدرتی آفات ،اݨ ݙیڈھے دشمناں توں اپݨی حفاظت دی لوڑ ہی. ݙر ،مونجھ ،خوشی یا کہیں خاص اطلاع کیتے پراݨے زمانے دا انسان خاص قسم دیا آوازاں یا چیکاں کڈھ تے اپݨے سنگتیاں کوں سمجھیندا ہا. کافی مدت گزرݨ دے بعد ول ول اِنھاں مخصوص آوازاں کوں دہراوݨ نال او وسیب دے لوک او اوازاں سمجھݨ لڳ ڳے. زبان دے کجھ ماہراں دا خیال ہے جو سب توں پہلے ہتھ ،چہرے ،تے بت دے ݙوجھیاں حصیاں نال کیتیے ڳیے اشاریاں زبان دا منڈھ بݨیاں. ڄݙا لفظ نہ ڄمیے ہن تاں او وقت دا گنگ دام انسان اپݨی ڳال سمجھاوݨ کیتے کجھ خاص قسم دے اشارے کریندا ہا. آپس دے میل جول نال ڈھیر سارے لوکاں نے چیزاں دے مشترک ناں مقرر کر گھدے. اساݙے ہک ملکی ماہر لسانیات ڈاکٹر سہیل بخاری زبان دے آغاز دے بارے سارے نظریات کوں منݨ توں انکار کرݙتے اُنھاں نے اپݨا ہک نظریہ پیش کیتا " جیویں سڄل ڄایا ٻال مختلف چیزاں کیتے شروع شروع وچ نویکلے لفظ کھڈیندے. پاݨی کوں بو آہدے. کھیر کوں بوبو اہدے تے وݙے وی آسانی نال اوندی ڳالھ سمجھݨ لڳدن. او جوں جوں وݙا تھیندا ویندے ،او لفظ درست تھیندن ویندے تے آخر کچی زبان توں او ہک پکی زبان تئیں پج ویندے. ایویں زباناں دا پہلا پندھ ہا.