روجھاݨ مزاری

روجھاݨ مزاری سرائیکی وسیب اچ صوبہ پنجاب دی جنوب وچ آخری تحصیل دا شہر ہے۔ آبادی دے لحاظ نال ضلع راجن پور دی سب توں چھوٹی تحصیل روجھاݨ مزاری دا ہیڈ کوارٹر وی ایہو شہر ہے۔ سابق نگران وزیراعظم میر بلخ شیر مزاری دا آبائی شہر ہے۔ ایں شہر کوں "خیمیاں دا شہر" وی آکھا ویندے۔ ایہ شہر اپݨے ضلعی ہیڈ کوارٹر راجن پور توں 70 کلومیٹر جنوب وچ واقع ہے۔ ایندا قریب ترین شہر کوٹ مٹھݨ ہے۔ ایہ علاقہ خطے دا پسماندہ ترین ہے۔ اتھوں دی مقامی تے اکثریتی زبان بلوچی تے سرائیکی ہے۔ مزاری قبیلہ، بلوچ قبائل دی ہک شاخ ہے تے سردار میر بلخ شیر مزاری ایں قبیلے دے تمندار ہن۔ روجھاݨ شہر انہاں دا آبائی شہر ہے۔ ایں لحاظ نال مزاری قبائل وچ ایں شہر کوں مرکزی حیثیت حاصل ہے۔ مزاری قبیلے نے جݙݨ خانہ بدوشی ترک کر کے پہاڑاں توں میدانی علاقیاں وچ سکونت اختیار کرݨا شروع کیتی تاں روجھاݨ ہی انہاں دا پہلا پڑاؤ ہئی۔