رفیق حسین حیدری

رفیق حسین حیدری پروفیسر ہے۔

پیشہ

اظہار خیال

۔۔۔۔۔۔۔۔۔۔۔۔۔۔۔۔

اج اساں جیڑھی شخصیت دے اعزاز اچ اتھاں کٹھے تھئے سے اوندے بارے گالھ کریندیں نہ صرف شام تھی سگدی ہے بلکہ اوندے گن گمدیں رات دھمائی ونج سگیندی ھے۔ پروفیسر رفیق حسین حیدری نال میڈا محبت و عقیدت دا دیرینہ تعلق ھے۔ میڈے گھر دی چار دیواری دے اندر رفیق حسین حیدری دا بچپن گزریے۔ میڈے بزرگیں نال حیدری صاحب دا صرف استادی شاگردی دا نئیں بلکہ پیو پترائی والا رشتہ ھے۔ میڈے گھر وچ موجود کتابیں انہاں دے علمی ادبی ذوق کوں جلا بخشی ھے۔ میڈے گھر وچ رفیق حسین حیدری روزے رکھین تے افطاریاں کیتن۔ میں رفیق حسین حیدری کوں طالبعلمی دے دور وچ عزم و ہمت کا مینار ، ذوالفقار ذوالفقار دے نعرے لیندا ڈٹھے۔ حیدری صاحب آپ وی عزم و ہمت دا مینار ھے جئیں بھٹو وانگ بے مثال کامیابیاں حاصل کیتن ۔ اے میڈے واسطے باعث اطیمنان تے خوشی دی گالھ اے جو میڈے گھر دے بندے زندگی وچ مہان مقام حاصل کیتے۔ اے حیدری صاحب دی انڑ تھک محنت دا نتیجہ ھے جو اج حیدری صاحب آپڑے وارڈ وچ جیکوں امیدوار نامزد کر ڈیوے اوندی کامیابی یقینی تھی ویندی اے۔ حالیہ بلدیاتی انتخابات وچ ملک دی ہک وڈی پارٹی نے وی ڈو سیٹاں حاصل کیتن تے کلھے رفیق حسین حیدری دے وی ڈو کونسلر کامیاب تھئین ۔ حیدری صاحب ماہر تعلیم ہوونڑ دی نال نال خوبصورت شاعر وی ہن افسوس سیاست تے ملازمت ہنیں دے ایں وصف تے پردہ پا ڈتے۔ اساں امید کریندوں ریٹائرمنٹ دے بعد سیاست کرنڑ دے نال ادبی دنیا وچ آپڑی واپسی کوں یقینی بنڑیسن۔

پروفیسر رفیق حسین حیدری بہترین منتظم، شفیق افسر، غریب پرور تے ادب نواز شخص ہن۔ میڈی خواہش رہ گئی اے ایں درسگاہ دے کہیں گوشے کوں حضرت کیفی جام پوری دے ناں نال منسوب کیتا ونجے۔ میں ایں گالھ دا مطالبہ کرنڑ دے حق وچ نہ ہم پر میڈا اندر گواہی ڈی۔دا ھا جو کڈاہیں ایندی سربراہی کہیں علمی ادبی شخصیت کوں ملسی تاں اے کم ضرور تھیسی۔ اے اعزاز حیدری صاحب کوں نصیب تھیونڑاں ہوسی انہاں گورنمنٹ پوسٹ گریجویٹ کالج جام پور دی لائبریری کوں کیفی جام پوری سنٹرل لائبریری دا ناں ڈے تے اے نیک نامی حاصل کر گھدی اے۔ میں بزم کیفی دا سیکرٹری جنرل ہوونڑ دے ناطے انہاں دا شکریہ ادا نمھی کریندا بلکہ بزم دے عہدیداریں تے ممبران دی طرفوں انہاں کوں مبارک باد پیش کرینداں۔ انہاں حضرت خواجہ غلام فرید ، حضرت سخی لعل پروانہ، ملک غلام رسول ڈڈا تے ڈاکٹر اسلم عزیز درانی دے ناویں وی انتساب پیش کیتن جیڑھا انہاں دے آپڑے وسیب تے اسلاف نال عقیدت دا ثبوت ھے۔ انہاں آپڑی زندگی وچ ڈھیر سارے نشیب و فراز ڈٹھے ہوسن تے آپڑئیں اوپرئیں دا حسد وی بھگتائے ۔ جویں جو آپڑی ہک غزل دے مطلع وچ آہدن

جیڑھے لوگ میڈے قتل تے تیار نظردن

افسوس اکثر او میڈے یار نظردن

بھل حیدری صاحب اے پر خار جنگل سرخرو تھی کرائیں جھاگ آئن۔ اساں انہاں دی ریٹائرمنٹ دے بعد وی انہاں دی صحت و سلامتی واسطے دعا گو ہیں۔

(محمد سلیم انسب)

نیلاب کلچرل ونگ جام پور دے زیر اہتمام پروفیسر رفیق حسین حیدری دے اعتراف خدمات وچ منعقدہ تقریب اچ پڑھیا گیا