رشید قیصراݨی

سردار رشید قیصرانی دا تعلق ڈیرہ غازی خان دے بلوچ قیصرانی خاندان نال ہے۔ آپ سردار شیر بہادر خان دے گھر وستی شیر ڳڑھ وچ پیدا تھئے۔ اعلیٰ تعلیم حاصل کیتونے تے پاک فضائیہ وچ ونگ کمانڈر تے سکورڈن لیڈر دے عہدے تے فائز ریہے۔ آپ اردو شاعری وچ ہک ممتازمقام رکھدن۔ رشید قیصراݨی دی سرائیکی شاعری وچ رومانویت زیادہ ہے۔ او بنیادی طور تے ہک رومانوی شاعر ہن۔ انھاں دی زبان مٹھی ماکھی والی کار ہے۔ او الفاظ دا انتخاب ٻہوں سوچ سمجھ تے کریندن۔ رشید قیصراݨی سرائیکی وچ غزلاں وی لکھین پر انھاں دی جدید نظم دی کوئی ریس نہیں۔

پچھانواں

آہدن سجھ ہُݨ سیجھ تے لہہ ڳے

رات دے سردا بوچھݨ لہہ ڳے

رات دا بوچھݨ لیر کتیراں

ہک ہک لیر پچھانویں ونڈی

آن سجی ہے ݙینہ دی منڈی

ہُݨ ہر کہیں دا ڈھول پچھانواں

سستا تن ‘ انمول پچھانواں

توں وی گھن کہیں ٹینگ دا پاسہ

توں وی جندڑی ڳول پچھانواں