رب سئیں دی تعریف

رَبّ سئیں دی تعریف (حمد شریف)

" سَتَّارِ العُیُوبِ وَغَفَّارِ الذُّنُوبِ"

(شاعری: ابن کلیم احسن نظامی)

ستار العیوب و غفّار الذنوب

بھیت دِلِّیں دے جاݨے عَلّامُ الغیُوب

ڄیکوں عِلم غیب ہِے

اُوہُو ہِک لَا رَیب ہِے

ذات اُوندی بے عَیب ہِے

بندہ اُوندا نائِب ہِے

ڄیڑھا توباں تَیب ہِے رَبّ دا ہِے محبُوب

سَتّارِ العیُوبِ و غفّارِ الذَّنوبِ

سَبھ دے عیب لُکیندا ہِے

گُناہاں کُوں بخشیندا ہِے

مُونجِھیاں کُوں کِھلویندا ہِے

وِچھڑِیاں کُوں مِلویندا ہِے

سَبھ تے رحم کریندا ہِے سَانگے محبُوبؐ

سَتّارِ العیُوبِ و غفّارِ الذَّنوبِ

پاک نبیؐ دِی تَابعداری

ڄَیں وِی کِیتی عُمراں ساری

اُوکُوں نِیں کہیں جا وِی خواری

رَبّ دے اَڳُّوں کروں زَاری

پارت ݙیسی محشر ءِچ اے سوہݨاں مطلوب

سَتّارِ العیُوبِ و غفّارِ الذَّنوبِ

بَندگی کِیتے بَندہ آیا

ڳالے نہ کوئی وقت اَجَایا

ڄَیں وِی چَنگا عمل کمایا

اُوں تے تِھیسی کرم سَوایا

سَبق ساکُوں مُرشد پاک اِیہو ݙِتے خوب

سَتّارِ العیُوبِ و غفّارِ الذَّنوبِ

وِیہڑے ساݙے آوے کوئی

عِشق دا سبق پڑھاوے کوئی

اُڄڑی جھوک وساوے کوئی

رَبّ دی دِید کراوے کوئی

شفاعت سوہݨے مدنی دِی ہِے ساݙا مطلوب

سَتّارِ العیُوبِ و غفّارِ الذَّنوبِ

بھیت دِلِّیں دے جاݨے عَلّامُ الغیُوب

(اقتباس از کتاب: (سرائیکی منظوم) تَرِیخ نامہ (عہدِ رسالتﷺ تُوں مُظفّر خان شہیدؒ تَئیں)۔ مصنف، نظماں دا تخلیق کار (شاعر):ابنِ کلیم احسنؔ نظامی۔ تزئین و تکمیل: مبشر کلیم بن ابنِ کلیم احسن نظامی۔ تعاون: دبستان فروغِ خطاطی رجسٹرڈ ملتان۔ اشاعت: جولائی 2014 ء) MubasherKaleem (talk) 16:19, 3 September 2018 (UTC)