راݨا محبوب اختر

وکیپیڈیا توں

رانا محٻوب اختر سرائیکی وسوں دی قدیمی حکمت دا اجوکا نشان بݨ کر ابھرن ۔ انہاں دی عمومی ڳالھ مہاڑ ہووے ، ادبی تہذیبی سیاسی مکالمہ یا پرت در پرت لکھتاں اوہ ایں کرہ ارض دے حقیقی وارثیں دا وکیل بݨ کے ٻولن ۔ تل وطنی دلیل وچوں نِسردے انہاں دے بیانیے دنیا جہان دے مظلومیں نال ڳنڈھیڄݨ دی راہ کݙھی ہِے ۔ انہاں سندھ وادی دے تَل تیں پیر ٹکا کے پورے جگت دی خیر منگی ہے ۔ ایہ سرائیکی زبان ادب ، تہذیب ثقافت تے تاریخ دی ہک نویں پرت ہے جیڑھی انہاں بَکھالی ہے ۔

       انہاں کوں پتہ ہے جو ایہ خطہ اپݨے زمانیاں وچوں کہیں زمانے سماجی گندرپ تے  تہزیبی بھل بھلاندریاں وچ پَیہ ڳیا ہا ۔ ایں توں اڳونہی ڳالھ کریجے تاں دھرتی واس اپݨے ݙکھ تے وچھوڑے دے پاتال وچ لیہ ڳئے ہَن ۔ ایں پاتال وچوں اوہ مونجھ کوں نال گِھن کے پَرتن ۔ ایہ مونجھ ایں دھرتی تیں ساندو ڑاند چڑھت ، شہریں دی بربادی ، قتلام ، حملہ آوریں دے ݙڈھپ  تے اوپری حکمرانی وچوں نِسری ہے ۔ ایں اوپرپ وچوں تَل جایاں دیاں ما بولیاں اگوں فاتح دیاں زباناں دا اِجرا اتم ہے ۔  ایں ݙڈھپ وچوں لوکیں دی تاریخ ، تہزیب ، اساطیر ہک وݙے دروہ وچ آ ویندی ہے ۔ ایہا کارݨ ہے جو ایہ دھرتی ہزاریں سالیں دے کلہیپے دی مار تیں ہے ۔ گزرل ݙو ترے صدیں دی استعماریت ایں کلہیپے کوں ڈھیر تکھا کیتے ۔ ایں چڑھ ماری کوں اپݨی مونجھ اندروں سمجھݨ ہتھوں مونجھ دا ودھارا ہے ۔ ݙوجھی بد نصیبی ایہ تھیندی ہے جو مونجھ دی مار تے آیل قوماں مونجھ کوں ہی اپݨی نجات سمجھ ٻاہندن ۔ مونجھ سماجی ڈکھ تے محرومی دی اوہ وہیند ہے جیڑھی ساݙی روز دی حیاتی وچ ایں رلدی ہے جو اساں اینکوں اپݨا تہزیبی ورثہ منݨ پئے ویندے ہیں ۔ ایہا اوہ جاہ ہے جتھاں کہیں وسوں دے آرٹ وچ لِجلجا رومان اپݨی رقت آمیزی کوں اگونہاں کریندے ۔ ایہا اوہ مقام ہے جتھاں قوماں اپݨی رزمیہ شاعری تے ناول توں دور تھی ویندن ۔ 
      رانا محبوب اختر ایں مونجھ توں اگونہی مزاحمت دی ڳالھ کیتی ہے ۔ انہاں دے دھیان وچ جے تاݨیں کہیں خطے دے لوکیں دی مونجھ مزاحمت تئیں نئیں پڄدی قوماں اپݨے گندرپ تے بھل بھلاندریاں توں ٻاہر نہیں نکل سڳدیاں ۔ انہاں سرائیکی وسوں دی شاعری وچوں ایں وسوں دا متبادل بیانیہ ترتیب ݙتے ۔ انہاں اپݨے اسلوب وچوں دھرتی جایاں کوں نویں اکھ تے ݙِکھالی تئیں تَکڑا کیتے تے میݙے خیال وچ ایہ ہک سیاسی کم ہے جیڑھا کہیں وسوں دی دَھڄ ودھیندے ۔

رفعت عباس ملتان