راکب لاشاری
اصل ناں احد بخش
قلمی ناں راکبؔ لاشاری
جٖمنْ 1957ء
تعلیم مڈل
پیشہ زمیندارہ
فون نمبر 0346 4634228
جاہ پتہ مسلم آبادی وہوا تحصیل تونسہ شریف
شعری مجموعہ ’’سنْاوت‘‘ دے خالق احد بخش راکب خوبصورت لبٖ و لہجے دے شاعر ، خوبصورت انسان ،ملنْ سار تے یاریں دا یار بٖیلی ہے۔شاعری دے حوالے نال آپ دے خیالات دی پرواز بلند تے مشاہدہ بٖہوں تیز ہے۔ہک مشہور لوک کہاوت ہے جو’’میاں چڑھدے سورج کوں ہر کئی سلام کریندے‘‘ایں اکھانْ دے تناظر اچ راکب نے کیا خوبصورت شعر لکھیئے جو
؎ہر کوئی سجھ نال سنگتاں جوڑ کے ٹُر دے اتھاں
کوئی نہیں تھیندا کہیں دا آشنا دیگر دے بعد
بہر حال شعری مجموعہ ’’سُنْاوت‘‘ اچوں راکب دیاں ڈٖو عدد غزلاں حاضر ہن ملاحظہ فرماؤ!
(1)غزل
[لکھو | ماخذ وچ تبدیلی کرو]اجٖ نہیں تاں کل ایہو شہر اچ فسانہ تھیونْے
انت میڈٖے جسم وی اوندا نشانہ تھیونْے
زندگی لانویں دا جوڑا نئیں جو گھر سانبھی رکھوں
زندگی کوں کہیں نہ کہیں راہ تے روانہ تھیونْے
میں تاں شیشہ ہاں اوندے چہرے کوں ول ول ڈٖیکھساں
اوہ تاں پتھر ہے اوکوں آخر بیگانہ تھیونْے
میں غریب ایویں سرِ محشر ہکّلا رہ ویساں
اوہ شہنشاہ ہے اوندے پاسو زمانہ تھیونْے
میں تاں راکبؔ روز ہٹکیندا ہمی کہیں دا نہ تھی
دل ہے دیوانہ دیوانے کوں ویرانہ تھیونْے
(2)غزل
[لکھو | ماخذ وچ تبدیلی کرو]کل نئیں جو ہُنْیں کون ہوا نال گزر گٖئے
خوشبو ہے کوئی شخص حنا نال گزر گٖئے
لنگھنْا ہا جیڑھے وقت کوں اکھریں دے الا نال
او وقت وی ڈٖاڈھے دی رضا نال گزر گٖئے
ٹکنْاں ہا جیڑھا جھوک تے چاندی دے بدن نال
او شخص وی سرمائی ردا نال گزر گٖئے
کل نئیں جو کیڑھا کھوہ امر تھیندا ہے یارو
ہک ٹولا بھراویں دا بھرا نال گزر گٖئے
اے وقت وی راکبؔ دا چنگٖے وقت دے وانگوں
تُسّاں جھئیں سجٖنْیں دی دعاء نال گزر گٖئے
؎کاش راکب دا کئی ہم خیال ہووے ہا
اجٖ علیحدہ نہ ہوندا زمانے کنوں
٭٭٭