دھریجہ نگر

دھریجہ نگر

دھریجہ نگر دا ناں پہلے دھریجہ وستی ہا،ایندا ناں سئیں قیس فریدی دی صلاح نال اساں 1990ء ءِ چ بدلیا تے دھریجہ نگر دے ناں تے سڑک تے بورڈ لاتا تے بورڈ دے اُتے انگریزی ءِ چ لکھیا ”Welcom To Siraikistan“بورڈ کوں ݙیکھ تے ڈھیر سارے لوک خوش تھیندے ہن تے اساکوں مبارکباد ݙیندے ہن،پر پنجاب توں آنوݨ آلے تے پنجاب ونڄݨ آلے مسافریں کوں  ”Welcom To Siraikistan“  آلی گاٖل چنڳی نہ لڳدی ہئی۔دھریجہ نگر دے بورڈ دیاں ڈھیر ساریاں کہانیاں ہن جو اے بورڈ کئی واری چوری تھیا جنہاں کوں چنڳاں نہ لڳدا ہئی رات کوں اُکھاڑ تے چا ویندے ہن۔

میں دھریجہ نگر دا ذکر ایں سانگے کریندا پیاں جو دھریجہ نگر میݙے ڄم پل دی جھاہ ہے تے جنم بھومی ہر ہک کوں پیاری ہوندی ءِ۔ جیکر دھریجہ نگر دا نقشہ بݨاؤں تاں ایویں بنڑدے جو اُبھے پاسے ریلوے لائن دے نال بزرگ محمد شاہ تے احمد شاہ سئیں دے دا دربار ہن۔لمے پاسے خانپور رحیم یار خان روڈ تے سڑک دے پار دھریجہ برادری تے جمالی برادری دیاں وستیاں ہن، پوادھ آلے پاسے خان پور شہر 4میل  تے ہے تے پچھادھ آلے پاسے دھریجہ پھاٹک تے اڳوں ݙو میل تے قصبہ سہجہ اَمدے۔ دھریجہ نگر ءِ چ زیادہ آبادی دھریجہ برادری دی ہے،کجھ گھر پنوار برادری جنہاں دے بزرگ قصائی دے پیشے نال تعلق رکھدے ہن موجود ہن۔ تے کجھ گھر جمالی برادری دے ہن اُنہاں کوں گورڑے سݙیاویندے، ریلوے لائن دے پار ہک آباد کاریں دا چک ہے ایں جھاہ کوں پہلے سکھیں دی وستی اکھیندے ہن تے ہُݨ شاہ دا کھوہ آکھیا ویندے۔ احمد پور دے شاہیں کوں رقبے ملئے تے وَل اے شاہ دا کھوہ بݨ ڳیا۔ہک وستی کمہاریں دی ہے، ہک وستی دھریجہ برادری دی ہے،ہک ویہڑہ راجے دے کھوہ دے ناں تے ہے تے آس پاس ڈھیر ساریاں وستیاں جمالی برادری دیاں ہن۔ ایویں سڑک دے پار دودا آرائیں دی وستی،چودھری غلام محمد،چودھری غلام قادر،چودھری محمد یوسف دے ناں دیاں وستیاں ہووݨ دے نال نال دھریجہ برادری تے جمالی برادری تے اؤکھر وندے دیاں وستیاں وی ہن۔ دھریجہ پھاٹک توں سڑک باغوبہار آلے پاسے ویندی ءِ تے دھریجہ پھاٹک دے پار نمبرداریں دی وستی،وستی کانجوں دے نال نال درکھاݨ،گھلو، لُڑکے، داد پوترے، کھوکھرتے ٻیاں ذاتاں آباد ہن۔دھریجہ نگر دی وستی کݙاں آباد تھئی؟ ایں بارے ءِ چ تاں تحقیق جاری اے، پر وݙے اے ݙسیندن جو اے وستی ڈھیر پُراݨی اے، وݙے اے وی ݙسیندن جو جݙاں زمینیں دا بندوبست تھیا تاں اُوں ݙینھ توں دھریجہ وستی دے دھریجیں دا ناں محکمہ مال دے ریکار ڈ ءِ چ موجود ءِ ن۔ دھریجہ نگر دا تفصیلی ذکر اڳوں الگ ہک مضمون ءِ چ آؤسے۔

(ظہور دھریجہ دی کتاب "مہاگ" صفحہ 38)