دوستاں دی رائے دا آدر

دوستیں دی رائے دا آدر پچھلی پوسٹ نال گنڈھل تل وطنی قوماں دا آرٹ جینویں جو ناچ ' گیت 'شاعری ' ناٹک انہاں دی حیاتی دا لُکانواں / ڈِکھالواں ہک دگرل پُکھ ہوندے ' ایہ حملہ آور/استعماری قوماں دے آرٹ توں ہک وکھری تڈ تیں ٹِکانواں ہوندے ' ایں حوالے نال افریقہ تے ہندوستان دے پوسٹ کالونیل ادیبیں تے نقادیں دا مطالعہ خاص کراہیں گالھ کوں سمجھنڑ وچ مدد ڈیندے ' ایہا وجہ ہے جو استعمار دی مار تے آئیاں تل وطنی قوماں دا آرٹ اپنڑی اٹکل وچوں سماجی پرتاں لنگھدا آپے سیاسی ونج تھیندے ' کیلی فورنیا (امریکہ) دی کہیں سڑک تے کہیں ریڈ انڈین دی بانسری تے چَھنڑکنڑا محض بانسری تے چَھنڑکنڑا نہ ہِن' اوہ " مہذب امریکہ " دے خلاف ہک چیخ ہِن ' اوہ اپنڑی آزادی پاروں اجداد نال کیتے گئے وعدے دا تکرار ہِن ' اوہ مقامی آدمی دی پوری تاریخ تے اساطیر ہِن ' لاطینی امریکہ دے مقامی دا ردھم ایہا تکرار تمنا ہے ' افریقیاں دا دول چھڑا دول نئیں ' ایہ استعماری قوماں دی چڑھ ماری اگوں ہکل ہے ' ایہ اپنڑی روح/آزادی/جغرافیہ/ تاریخ/ وسائل کوں بچاونڑ دا رزمیہ ہے ' اِنہاں قوماں دے ہار جیت دے اپنڑے معنی ہَن ' اوہ اپنڑے پِڑ وچ روز سرخرو تھیندن جو اُنہاں اپنڑی زبان رقص تے دول بچا گھدے ' تساں آکھسو ایہ کیڑھی شے ہے جیڑھی بچ گئی ہے؟ اگر کوئی شے نہ بچدی تاں چنیوا اچیبے تے واتھنگو اگوگی نہ جمدے ' نیلسن منڈیلا دے جنوبی افریقہ وچ کالے واپس نہ ولدے ' سرائیکی وسوں وچ فدا حسین خان گاڈی نہ جمدا جھمر اپنڑے سیاسی معنی نہ دھریندی ' عاشق بزدار میلے کوں سیاست تئیں نہ گھن آندا ' ایں خطے دی شاعری بھانویں اوہ محبت دی ہووے اپنڑے آپ ہک سیاسی عمل نال گنڈھیجی ہے ' ایں توں اگونہی رمز حفیظ خان شمیم عارف قریشی رانا محبوب اختر کھولی تے ڈسایا سرائیکی شاعری معاصر حیاتی نال گنڈھل اے ' اج جڈاں, شاعری مقامی بندے دا موقف ہے ' تل وطنی دی سبھ توں وڈی کمیونیکیشن ہے ' ایندی کہیں وسوں وچ مخالفت دے کیا معنی ہِن ' جڈاں ایں ملک وچ ون یونٹ لگا سبھ توں اُچی ہکل شاعراں دی ہئی ' میں شیخ ایاز, گُل خان نصیر قلندر مہمند تے اجمل خٹک کوں یاد کریساں ' اج جڈاں ہک پھیریں ول صدارتی نظام دیاں گالہیں تھیندیاں پِن شاعری/شاعر دی مخالفت کیوں ؟؟؟؟؟؟ رفعت عباس