خالد بن ولید

خالد بن ولید (عربی: خالد بن ولید بن المغیرۃ المخزومی)، حضرت محمد صلی اللہ علیہ و آلہٖ و سلم دے مشہور صحابی، اسلامی لشکر دے سپہ سالار تے ابتدائی عرب تاریخ دے بہترین سپاہی ہن۔ حضرت محمد صلی اللہ علیہ و آلہٖ و سلم دے وصال دے بعد انہاں نے ریاست مدینہ دے خلاف تھیوݨ والی بغاوتاں کوں کچلݨ وچ اپݨا کردار ادا کیتا۔ اوندے بعد خالد بن ولید نے ساسانی تے بازنطینی سلطنتاں کوں شکست ݙے کے نہ صرف مدینہ دی چھوٹی جیہی ریاست کوں ہک عالمی طاقت وچ تبدیل کر ݙتا بلکہ پہلے درجے دے عالمی فاتحین وچ وی اپݨے آپ کوں شامل کرا گھدا۔

Khalid Bin Al-Walid

قبول اسلام

واقدی دا بیان ہے کہ آپ نے یکم صفر 8ھ کوں اسلام قبول کر گھدا تے معرکہ مؤتہ وچ شامل تھئے۔ اوں روز امیر دے موجود نہ ہوݨ دی وجہ توں آپ امیر بنݨے تے آپ نے خوب جنگ کیتی جیندی مثال نی ݙٹھی ڳئی تے آپ دے ہتھوں 9 تلواراں ٹٹ ڳئیاں۔

بطور کاتب وحی خدمات

آپ کاتبینِ رسول اللہ ﷺ وچوں ہن، عمر بن شبہ، ابن کثیر، ابن سید الناس، عراقی تے انصاری وغیرہ نے ایندی صراحت فرمائی ہے۔

عظیم سپہ سالار

خالد بن ولید نے 125 دے قریب جنگاں وچ حصہ گھدا تے کہیں وچ وی شکست نی کھادی۔ او پیدائشی جنگجو سپاہی ہن۔ انہاں نے عرباں کیتے جنہاں علاقیاں کوں فتح کیتا اوہ ہݨ وی انہاں دے کول ہن۔ جبکہ باقی عالمی فاتحین نپولین، چنگیز خان، تیمور تے ہٹلر نے جیہڑے علاقے فتح کیتے اوہ انہاں دی زندگی وچ ہی یا بعد وچ چھکیج ڳئے۔

زندگی

خالد بن ولید 592ء وچ مکہ وچ قبیلہ قریش دی ہک شاخ بنو مخزوم دے سردار ولید بن مغیرہ دے ہاں پیدا تھئے۔ بنی مخزوم دی وجہ شہرت جنگ و جدل ہئی۔

اوہ شروع وچ مسلماناں دے مخالفین وچوں ہن تے احد دی جنگ دا پانسا مسلماناں دے خلاف پلٹݨ وچ انہاں دا اہم کردار ہئی۔ صلح حدیبیہ دے بعد مدینہ وچ حضرت محمد صلی اللہ علیہ و آلہٖ و سلم دی خدمت وچ حاضر تھئے تے اسلام قبول کیتا تے بقیہ زندگی اسلام کیتے وقف کر ݙتی۔

حضرت محمد صلی اللہ علیہ و آلہٖ و سلم نے جنگ موتہ وچ انہاں دی بے مثل بہادری تے انہاں کوں سیف اللہ یعنی اللہ دی تلوار دا خطاب ݙتا۔

حصرت محمد صلی اللہ علیہ و آلہٖ و سلم، ابوبکر و عمر نے عرب دے چھوٹے چھوٹے عرب قبیلیاں کوں ہک جتھے وچ بدل ݙتا تے قبائلی جنگاں وچ ضائع تھیوݨ والی انہاں دے توانائیاں کوں ہک سمت ݙے کے ہک اینجھے زبردست طوفان وچ تبدیل کر ݙتا جیں نے جلد ہی پورے مشرق وسطیٰ کوں اپݨی لپیٹ وچ گھن گھدا تے ہمیشہ ہمیشہ کیتے اس علاقے تے دنیا دی تاریخ بدل کے رکھ ݙتی تے اینہی صحرائی طوفان دا عنوان ہن خالد بن ولید۔

مشہور جنگاں

• غزوۂِ احد
• فتحِ مکہ
• فتحِ طائف
• جنگِ موتہ
• معرکۂِ دومۃ الجندل
• جنگِ یرموک
• جنگِ یمامہ
• جنگِ اجنادین
• فتحِ حلب
• فتنہ ارتداد کوں ختم کرݨ دے کوششاں

نظم و ضبط

مسلماناں وچ ایہ تاثر عام پیدا تھی ڳیا ہئی کہ خالد بن ولید ہر جنگ دی کامیابی دی ضمانت ہن۔ ایندے تے خلیفہ ثانی حضرت عمر فاروق نے انہاں کوں سپہ سالاری دے درجے توں ہٹا ݙتا کہ فتح اللہ تعالیٰ دی مدد نال تھیندی ہے۔ امیر دی اطاعت خالد بن ولید دے کردار دا اہم حصہ ہئی۔ انہاں نے اینکوں بخوشی قبول کیتا۔

وفات

حضرت خالد بن ولید رضی اللہ عنہ کوں اپݨے انتقال توں پہلے ایں چیز دا بہت افسوس ہئی کہ اوہ میدان جنگ دی بجائے بستر تے اپݨی جان ݙیندے پئے ہن۔ اوہ 21ھ 642ء وچ شام دے شہر حمص وچ وفات پاڳئے۔ انہاں دی قبر مبارک مسجد جامعہ خالد بن ولید دا حصہ ہے۔ اپݨی وفات تے انہاں نے خلیفۃ الوقت حضرت عمر فاروق دے ہتھوں اپݨی جائداد دی تقسیم دی وصیت کیتی۔