حکایت ، معاہدہ کنگنڑ والا بنگلہ
حکایت معاہدہ:کنگنڑ والا بنگلہ اوہ پُجے تاں ڈیراور دیاں بُھردیاں کندھاں نویاں پیاں تھیندیاں ہَن'قلعے دے اندر وی عالمی ورثہ والیاں دا کم ہک چالو ہا'ایں توں پہلے نوابیں دا گورستان اُنہاں ڈِٹھا اوہ کنگنڑ بنگلے پُجے شیر میاں عباسی دے مہمان تھئے'سندھ دے ڈو کوی مِٹھی توں خلیل کنبھار تے حیدر آباد توں علی دوست عاجز دا روہی وچ آدر ہا'روہیلے گَویّاں روہی کوں گَنویاں'پندھرویں دے چندر تلے رات دی روٹی'شاعری دے تمبو وچ اوہ راتیں ستے تے خواجہ فرید دے دیوان وچ جاگے'چا دی میز تے انہاں دھمی نال ترے گالہیں مِتھیاں پہلی گالھ : خواجہ فرید دے دیوان دی لِکھت کوں نویں سِروں پڑھیا ونجے ڈوجھی گالھ : دیوان فرید دی اکھریت کوں نویں سِروں سمجھیا ونجے تریجھی گالھ : جنگ کوں شاعری نال جَھلیا ونجے 25 اکتوبر 2018 کنگنڑ والا بنگلہ ست وجے دھمی'شیر میاں عباسی,خلیل کنبھار,علی دوست عاجز,محمود مہے,عصمت اللہ شاہ,لکھ میر تے بُڈھڑے روہیلیاں دی گواہی وچ اساں ایہ ترے گالہیں مِتھیاں۔رفعت عباس