حضرت حمزہ بن عبدالمطلب رضی اللہ عنہ

حمزہ بن عبد المطلب (پیدائش: 568ء یا 570ء– وفات: 30 مارچ 625ء) حضور صلی اللہ علیہ و آلہٖ و سلم دے چاچا تے رضاعی بھائی ہن۔ ݙوہاں نے ثویبہ جیہڑے ابو لہب دی لونڈی ہن، دا کھیر پیتا ہئی۔ بعثت دے چھی سال بعد جݙݨ ابوجہل، حضور صلی اللہ علیہ و آلہٖ و سلم دی مخالفت اچ حد توں تجاوز کر ڳیا تاں حضور صلی اللہ علیہ و آلہٖ و سلم دی حمایت تے محبت وچ اسلام قبول کر گھدا۔ بے حد جری تے دلیر ہن۔ ݙوجھے مسلماناں دے نال مدینہ کوں ہجرت کیتی۔ جنگ بدر وچ حصہ گھدا تے خوب داد شجاعت ݙتی۔

جنگ احد وچ وحشی نامی غلام دے ہتھوں شہید تھئے۔ ابوسفیان دی بیوی ہندہ نے غزوہ احد وچ اپݨے ہک غلام وحشی کوں انہاں دے قتل تے مامور کیتا جیں نے آپ تے چھپ کے نیزہ سٹا۔ جݙݨ او شہید تھی ڳئے تاں اوں نے انہاں دا کلیجہ کڈھ کے کچا چتھیا تے انہاں دی لاش دا مثلہ کیتا۔ ایندا حضور صلی اللہ علیہ و آلہ وسلم کوں بے حد رنج ہئی۔

سید الشہداء

عباس توں روایت ہے کہ نبی کریم ﷺ نے فرمایا کہ سَيِّدُ الشُّهَدَاءِ يَوْمَ الْقِيَامَۃ حَمْزَةُ بْنُ عَبْدِ الْمُطَّلِبِ، وَرَجُلٌ قَامَ إِلَى إِمَامٍ جَائِرٍ، فَنَهَاهُ وَأَمَرَهُ، فَقَتَلَہ قیامت دے ݙینہہ سید الشہداء (شہیداں دے سردار) حمزہ بن عبد المطلب ہن تے ݙوجھا او شخص ہے جیں نے ظالم بادشاہ کوں نیکی دا حکم ݙتا تے برائی توں منع کیتا تاں بادشاہ نے اونکوں قتل کروا ݙتا۔ ݙوجھی صحیح حدیث وچ ہے:

سَيِّدُ الشُّهَدَاءِ عِنْدَ اللَّهِ تَعَالَى يَوْمَ الْقِيَامَۃ حَمْزَةُ

اللہ تعالیٰ دے نزدیک قیامت دے ݙینہہ سید الشہداء حضرت حمزہ ہوسن۔ فاطمہ خزاعیہ دا بیان ہے کہ میں ہک ݙینہہ حضرت سید الشہداء جناب حمزہ دے مزار اقدس دی زیارت کیتے ڳئی تے میں قبر منور دے سامݨے کھڑے تھی کے "اَلسَّلَامُ عَلَیْکَ یَا عَمَّ رَسُوْلِ اللہ" آکھا تاں آپ نے بآواز بلند قبر دے اندروں میݙے سلام دا جواب ݙتا جیں کوں میں اپݨے کناں توں سݨا۔