حاتم دی شاعری

شاعری دے اُستاد ݙسیندن جو چنگاشاعر او ہوندے جیڑھا پڑھݨ آلے کوں فوری سمجھ آ ونڄے ۔ معروف سرائیکی شاعر سئیں شاکر شجاع آبادی دی شاعری دی مقبولیت دی ہک وجہ اے وی ہے جو او عام آدمی کوں وی سمجھ آ ویندی ہے ، سئیں حاتم نائچ دی شاعری سادہ تے عام لوظیں دی شاعری ہے جیڑھی دِل نال کیتی ڳئی اے تے او دِل تے اثر کریندی اے ۔ حاتم دی شاعری دی خاص گاٖلھ اے ہے جو اُنہاں سرائیکی دے مِٹھے لہجے کوں برقرار رکھیئے تے ثابت کیتے جو جھنگ وسیب سرائیکی ہے۔

پنجاب آلے جھنگ وسیب کوں جانگلی آکھدن، ایہا گاٖلھ سرائیکی وسیب تے پنجاب کوں ہک ٻئے توں جُدا کریندی اے ، جنگلی دا لوظ سکھ تے انگریز دور دی اختراع ہے ، اُنہاں کوں ایں گاٖلھ دی کاوڑ ہئی جو ایں دھرتی دے حریت پسند سئیں احمد خان کھرل حملہ آوراں دی مزاحمت کیتی ہئی ۔ سکھ تے انگریز دے وارث اَحٖ اپݨے آقا دی ٻولی ٻولیندن پر اُنہاں کوں معلوم تھیوݨاں چاہیدے جو ’’کُکڑ ہٹہ‘‘ توں حاتم نائچ دی شاعری دی صورت وچ جیڑھی بانگ اَئی اے او سرائیکی دی بانگ اے ۔ میں سمجھداں حق سچ دی بانگ تے آواز کوں دنیا دی کوئی طاقت ختم نی کر سڳدی۔

حاتم نائچ ہک کم اے وی کیتے جو اُنہاں سرائیکی مخالف رچناوی گروپ دے پروپیگنڈے کوں قبول نہ کرݨ تے سرائیکی دا جھنڈا اُچا کر ݙتے ۔ سیاݨے آکھدن جو آدمی شخصیت تے ناں دا اثر ضرور ہوندے ۔ حاتم نائچ وی صرف ناں دا حاتم نی او اپݨے عمل تے اپݨے کردار نال سرائیکی اکھریں تے سرائیکی شعریں دی سخاوت کریندے ۔

چُپ دا نوحہ تے وسیب دے سُول سیاپے

’’ڈُٖسکیاں تے ٹہکارے ‘‘سئیں ابنِ الامام شفتر دی کتاب ہے ، ایندے وچ طنزیہ مزاحیہ مضامین ، افسانے تے انشائیے موجود ہِن۔ سئیں ابنِ الامام شفتر سرائیکی دے پُراݨے لکھاری ہِن ۔ سرائیکی دے پُراݨے رسالے ݙیکھو تاں سرائیکی ادب وچ اُنہاں دیاں تحریراں پڑھݨ کوں مِلدن ۔ اِتھوں اندازہ تھیندے جو سئیں ابن الامام شفتر کوں اپݨی مٹی ، اپݨی ماء ٻولی تے اپݨے وسیب نال محبت ڄماندرو ہے۔

کتاب دا ناں ’’ڈُٖسکیاںتے ٹہکارے‘‘ ݙسیندے جو ایندے جو ایندے وچ کیا ہے؟ سئیں ابن الامام شفتر دی تحریر وچ وسیب نال تھیوݨ والی وانجھ دا ماتم ، وسیب دے سیاستدانیں تے پردھانیں دی چُپ دا نوحہ تے ہزار سُول سیاپے سہوݨ دے باوجود وسیب دے لوکاں دی بے حسی دی گاٖلھ آوے تاں بندہ ڈُٖسکیں وات آ ویندے پر سئیں ابن الامام شفتر ہک کامیاب لکھاری دے طور تے قوم کوں مایوسی دی موت توں بچاوݨ دا ہنر وی ڄاݨدے ۔ اوہ ٹوک مذاق لکھدے ، طنز و مزاح لکھدے۔ انشائیہ لکھدے تے ایں کھل ہس وچ وی وݙیاں وݙیاں گاٖلھیں کرویندے ۔ سئیں ابن الامام شفتر چنگا تے وݙا لکھاری ہے ۔ میݙی دُعا ہے جو اللہ سئیں ایں کتاب دے صدقے ڈُٖسکیاں بھرے وسیب کوں آزادی دیاں خوشیاں تے ٹہکارے عطا فرماوے۔… آمین

حوالہ

·        معروف سرائیکی دانشور سئیں ظہور دھریجہ دی کتاب سرائیکی قلم قبلیہ وچوں چوݨ