حاتم بلوچ

حاتم بلوچ سرائیکی زبان دا شاعر ہے۔

نمونہ کلام

غزل

روز تیڈی تصویر کوں چینداں، چمداں سانبھ رکھینداں. 

اپنڑی کل جاگیر کوں چینداں ،چمداں سانبھ رکھینداں.

پہلے پہلے پیار دیاں گالہیں سچیاں، کھریاں گالہیاں گالہیں. 

تیڈی ہر تحریر کوں چینداں ،چمداں سانبھ رکھینداں.

تیڈیاں بخشاں ڈھول نشانیاں ہن لقمان دے نسخے جیویں.

کجھ تھیوے اکسیر کوں چینداں،چمداں سانبھ رکھینداں.

تیڈی یاد ءچ اکھ توں ڈھہہ کے جیرھا مٹی وچ ونج رلدے.

مٹی سودھا نیر کوں چینداں ،چمداں سانبھ رکھینداں.

دھرتی ہے ہک وستی حاتم وستی وسدے سارے اپنڑے.

ہر پاسو آئے تیر کوں چینداں، چمداں سانبھ رکھینداں.

حاتم بلوچ

غزل

سچ سفریں تیں سوچ کے نکلیں سچ ءچ ڈھیر خسارے اوسن.

چولے لیراں ، سر ءچ دھوڑاں، نیناں نیر نظارے اوسن.

ساڈے وڈکے سچ آہدے ہن ہک ڈینہہ او وی ویلھا اوسی.

ہر کوئی اوہے رشتے رکھسی جیرھے جیندے وارے اوسن.

گوڈی ڈیندیں گوڈے گس گئے جیرھی رڑھ کوں بالیں سودھے.

آن دا آدھا حصہ وڈنڑ گودے دے ہرکارے اوسن.

سارے جھیڑے زندگی تئیں ہن زندگی مکسی جھیڑے مکسن.

جیرھے جیندیں ہتھ نئیں ڈیندے موئیں تھی ڈھیر ڈکھارے اوسن.

قسماں شسماں ، وعدے شادے جانوں مانوں راہ کر ویسن.

اجاں تیڈے خواب ءچ گالہی گانڑھے،کار ،چوبارے اوسن.

حاتم اپنڑیں بالیں سودھا اپنڑی بکھ کوں زہر چا ڈیویں.

وت اخبار ءچ ہک ڈو سطراں شائد تیڈے بارے اوسن.

#حاتم_بلوچ

غزل

جنوب تھئے یا شمال تھیسن اے حال تھیسن۔

جتھاں خدا تیں سوال تھیسن اے حال تھیسن۔

اےخشک سالی یا پکیں فصلیں تیں مینہہ ننانویں ۔

آداب جتھ وی پامال تھیسن اے حال تھیسن۔

نکاح دی جا تیں زناء ، جوا ، شراب، رشوت۔

حرام جتھ وی حلال تھیسن اے حال تھیسن۔

پیو دا پٹکا یا ماء دیاں ترمدیاں بے نور اکھیں۔

جے کہیں دے اگو مجال تھیسن اے حال تھیسن۔

جے پتر گبھرو گناہ دے رنگیے بچائے ویسن ۔

تے ونی دھیریں دے بال تھیسن اے حال تھیسن۔

جیڈا زانی ہے جیڈا سودی امیر بندے شریف بندے۔

جتھاں وی اینجھے کمال تھیسن اے حال تھیسن۔

اے کتے بلیاں اے گھوڑے کھوتے تے مردہ ڈنگر۔

جے ایویں ساڈے نوال تھیسن اے حال تھیسن۔

دھیریں بھینڑیں سمجھ کے ڈینڑیں جے تئیں کہیسن ۔

تے عزتیں دے اے حال تھیسن اے حال تھیسن۔

حاتم بلوچ