جیوے میݙا عمران خان

کجھ ڈینھ توں یار لوگ کافی شور شرابا کریندے پئین کہ خان صاحب جیرھاں گالھیں کیتاں ہن انھیں دے الٹ چلدا پئے بنی گالہ توں وزیر اعظم ہاؤس ہیلی کاپٹر استعمال کریندن یا سیکورٹی گارڈ ءچ بارہ تیرہ گڈیاں چلدیاں پئین سوھنڑے بھراوو تبدیلی ایکوں نہیں آھدے جیرھی تبدیلی دے ساکوں خواب ڈیکھائے گئے ہن یا وعدے کیتے گئے ہن یا سیدھے لوظیں ءچ آکھاں کہ ساکوں بھولوں بنڑایا گیا ھا ،اُو تبدیلی بہوں پریں لاتھی ھے ،اوندے واسطے ساکوں برگر ،ملک پیک ،تے ممی پاپا ،آلے طبقے کنیں جان چھڑوا کے کہیں عام انسان دا انتخاب کرنڑاں پوسی ، خیر خانصاحب وزیر اعظم ہاؤس ءچ نہ رھنڑ دا فیصلہ کیتے عوام ڈاڈھی گچی سُجا سُجا تعریف کیتی ھے کہ ملک دے خزانے کوں بہوں نفع ملسی ،مرشد اے تاں ڈساؤ ایں عمارت تے جیرھا خرچ تھئے اُو پیسہ کون ولا ڈیسی میڈے مُلک دے خزانے کوں اگر پیسہ نیں ملدا ول اوں عمارت ءچ نہ راھنڑ دی منطق میڈی سمجھ توں باہر ھے ،کہیں بی عمارت تے مزید خرچ کرنڑ توں بہتر ھے اتھائیں تشریف رکھو،

خان صاحب دے تان سین یعنی فواد چوھدری صاحب نے فرمائے خان سئیں ہیلی کاپٹر تے بنی گالہ تہوں تشریف گھن ویندن کہ روڈ بند نہ تھیون عوام کوں تکلیف نہ تھیوےواہ وائے تیڈی دلیل ، پنج منٹ دی تنگی دے بدلے ءچ عوام ترائے لکھ دا خرچہ کرویندی ھےشاباش ھے تھاڈی سوچ کوں.

کل ہک شیخ رشید دی ویڈیو منظر عام تے آئ ھے اے اوھو شیخ رشید ہے جیرھا ہر حکمران دیاں جتیاں صاف کرکے ایں مقام تے پُجے اے اوھو شیخو ھے جئیندی بک بک پچھلے پنج سال سُنڑ کے ساڈے کن درد کریندے پئین،اگر اے سارے واقعی کوئ تبدیلی گھن آندن یقین منو سیانڑیں لوکیں دیاں بہوں ساریاں مثالاں غلط تھی ویسن ،کجھ مثالاں میں تھاکوں ڈسائ جُلاں ، منجھیں منجھیں دیاں بھینڑیں ھوندن،،گورے نال چٹا بدھو رنگ نہ وٹیسی عادت وٹا ویسی،سنگھتی سنگھتی دا تعارف ھوندے،کتا کتے دا گوشت نیں کھاندا، تساں کہیں ترقی یافتہ ملک تے نظر مارو ،سب توں پہلے تاں اے چیز نظرسی کہ قانون ساریں واسطے ہکو ھے ، ڈوجھے نمبر تے حکمران ہکو ھے، کہیں ڈوجھے ادارے یا طبقے دا کوئ عمل دخل نیں پَر ساڈے ملک ءچ ہر طاقتور ادارہ ہر طاقتور طبقہ حکمران ھے ،ایں رسہ کشی ءچ اساں خودکشی تک پہنچے ہیں ،تبدیلی اے نیں جیرھی اساں گھن آئے ہیں تبدیلی اڈھائیں آسی جڈاں مزدور کسان چپڑاسی تے ریڑھی آلا اسمبلی ءچ بیٹھا ھوسی ،جڈاں ہر ادارہ ہر طبقہ دا قانون ہکو ہوسی.