جواب آں غزل

جواب آں غزل

محترم رفعت عباس صاحب عمر اور تجربے دے لحاظ نال ایتلا سینئر ہن جو میں انہیں کوں احتراماً اے وی نی آکھ سگدا جو سرکار تساں گال کوں غلط طریقے نال بیان کریندے بیٹھے وے۔ میں دوستیں کوں ساری صورتحال نال آگاہ کرینداں تے اے وی گزارش کیتی ونجاں جو میڈا جھیڑے تے بالکل موڈ کائے نی میں احترام کرینداں انھاں دا۔

ڈوجھے کجھ سرائیکی شاعریں تے لکھاریں آلی کار میڈو وی محترمہ صغرا صدف صاحبہ (میں ہر خاتون دا احترام کرینداں) ہک لیٹر جیہڑا انہیں حکومتِ پنجاب دو بھیجا ہا اوندی کاپی وٹس اپ کیتی تے نال اے وی آکھیا جو انہاں ملتان کیتے ہک ایف ایم ریڈیو منظور کرایا ہوئے تے اے ریڈیو سرائیکیاں دا ہے میں چاہندی ہاں جو ایکوں سرائیکی دی ہک کونسل بنڑا کے اوندے حوالے کیتا ونجے، اے ریڈیو ملتان بی زیڈ یو دے سرائیکی ایریا سٹڈی سنٹر وچ لگنڑے۔ میکوں ڈسو جے اے ریڈیو سرائیکی گھن سگدن تاں گھن گھنن نتاں میں اوکوں کہیں ڈوجھے شہر یا کہیں ڈوجھی زبان دے ادیبیں دے حوالے کر ڈیساں۔ (اتھاں رفعت صاحب جانڑ بجھ کے صرف رضی الدین رضی تے شاکر حسین شاکر دا ناں لکھیے حالانکہ میں کجھ ناں بئے وی گھدے ہن جیہڑے سرائیکی نی لکھدے جیویں خالد مسعود ہے، احمد رضوان وغیرہ) ایندے تے میں ہک دوست نال گال کیتی تاں انہیں دا خیال ہا جو ایں ریڈیو آلے معاملے تے کٹھے مل بہہ کے کوئی مشاورت یا فیصلہ کر گھنڑاں چاہیدا ہے تاکہ کل کوں کوئی دوست کوئی غلطی نہ کر کھڑے۔ ہکو فیصلہ آ ویسی ول ٹھیک ہوسی۔ میکوں آکھیا گیا جو دوستیں نال توں رابطہ کر۔ میں رابطہ کیتا انہاں دوستاں نال۔ رانا محبوب اختر، جہانگیر مخلص، عاشق بزدار، ریاض عصمت، حیدر جاوید سید، عثمان کریم بھٹہ، شاہنواز خان مشوری، محمود مہے، رفعت عباس تے ساری صورتحال ڈس کے آکھیا جو جیویں اساں چنی گوٹھ جھوک فیضان فرید تے بہہ کے ہکو فیصلہ کیتا ہا اتھاں وی اوہے جھیاں فیصلہ کر گھنوں جیکوں قومی فیصلے دا ناں ڈے سگوں۔ اے سارے دوست مل بہہ کے فیصلہ کرنڑ تے راضی ہن بشمول رفعت عباس صاحب ۔ اللہ گواہ ہے اگر رفعت عباس صاحب میکوں فون تے آکھ ڈیندے جو ایندی کوئی لوڑھ نی تاں میں پچھاں ہٹ ویندا۔ ایں سارے معاملے وچ کجھ دوست تے سارے مخالفین اے سمجھدے پئن جو اصغر دی کوئی ذاتی لالچ ہوسی۔ ہک واری ولا عرض کر ڈیواں جو لعنت بھجینداں پلاک تے اوندے آئین تے اور پلاک اور اوندا آئین بنڑانونڑ آلیں تے ۔ میں اج وی جہانگیر مخلص دی جاہ جھوک فیضان فرید تے تھیونڑ آلے ہر فیصلے دا پابند ہاں۔

میڈے کولو غلطی اے تھئی جو میں بھل گیا ہامی جو محترم رفعت عباس صاحب جہانگیر مخلص دی جاہ جھوک فیضان فرید تے تھیونڑ آلے کٹھ دی وی مخالفت کیتی ہائی تے اپنڑی فیس بک تے ہک پوسٹ وچ ایکوں غیر ضروری قرار ڈے ڈتا جو او اپنڑے "انکار" دی موجودگی وچ بئے کہیں مشترکہ فیصلے دی کوئی ضرورت محسوس نا ہن کریندے۔ میکوں انہیں فون تے آکھ ڈتا جو ٹھیک اے مل بہہ کے فیصلہ کرنڑ وچ کوئی حرج کائے نی۔ ایندے بعد اللہ جانڑے کیوں انہیں دے مقتدین تے مریدین میڈے خلاف فیس بک تے ایکٹو تھی گئے تے ہر پاسو میڈی مذمت تھیونڑ لگ پئی۔ میں سوچا جو اے کیہڑے رولے وچ پئے گیاں۔ فوراً معذرت دی پوسٹ لائی جیہڑی ہالی وی میڈی وال تے موجود ہے تے تلے اوندا سکرین شاٹ وی لیندا پیاں۔

مذمت دا سلسلہ جاری رہ گیا تے میکوں انہیں دے کجھ دوستیں میڈی جسمانی معذوری دے حوالے وی ڈتے۔ لاالچی، پلاک دا ایجنٹ تے پتہ نی کیا کجھ آکھیا گیا۔ میں رفعت عباس صاحب کوں فون کیتا تے آکھیا جو مہربانی کرو انہیں کوں روکو میڈا قصور صرف ایہو ہے جو میں چااہندا ہم ایں معاملے تے کوئی متفقہ فیصلہ آ ونجے، میکوں جیکر تساں یا کوئی بیا دوست روک ڈیندا تاں میں اے نہ کراں ہا۔ اللہ گواہ ہے رفعت صاحب دے روکنڑ تے او لوک رک سگدے ہن لیکن انہیں فرمایا نہ میں انہیں کوں آکھیے نہ میں روکینداں۔ میں آکھیا ٹھیک اے سئیں تہاڈی مہربانی۔ آخری جملے تے میڈا لہجہ مایوسی کولو شیت تلخ وی تھی گیا ہوسی۔ ول میں رات ہک پوسٹ لائی جیہڑی بعد وچ دوستیں دے حکم تے ڈیلیٹ وی کر ڈتی جبکہ ڈوجھی طرفوں مذمت تے طنز و تشنیع دا سلسلہ ہالی جاری ہے۔

جتھاں تک میڈی ذات دا تعلق ہے تاں اللہ پاک دا کرم ہے دوستیں دی مہربانی ہے جو میڈی روزی روٹی اچھک ہے، اسلم خان گورمانی صاحب دی محبت نال میں ہک فیکٹری وچ پارٹنر ہاں، اپنڑی ماہانہ آمدنی تے حکومت کوں ہک معقول رقم دی صورت وچ ٹیکس ادا کرینداں۔ میڈا کم مارکیٹنگ، سیلز تے ریکوری دا ہے، اج کتھائیں، کل کتھائیں، میں ہکی جاہ تے بہہ وی نی سگدا جو کوئی نوکری بئی کر گھناں۔ میڈی ہنڑ وی ماہانہ تنخواہ یا آمدنی ایتلا ہے جیتلا او نہ ڈے سگن ہا۔ خدا گواہ ہے نہ میکوں کہیں ذاتی عہدے دی لالچ ہائی تے نہ ضرورت ہے۔ میں ہک واری ولا لعنت بھجینداں پلاک تے اوندی طرفوں ڈتی گئی کہیں قسم دی لالچ تے۔ میڈا قصور ہنڑ آلا ایہو جو میں کہیں مشترکہ قومی فیصلے دا سایو کرنڑ دی کوشش کیتی تے ایندے کولو پہلے قصور اے ہا جو میں اقبال سوکڑی صاحب دے حق وچ کجھ پوسٹاں لایاں ہن انہیں دی میکوں سزا ڈتی گئی تے ڈتی ویندی پئی اے۔ میں جیہڑے دوستیں نال ایں ریڈیو دے سلسلے وچ رابطہ کیتا ہا انہیں دے ناں لکھ ڈتن دوست کنفرم وی کر سگدن تے میڈا نی خیال جو انہیں وچو کوئی پلاک دا ایجنٹ ہووے۔ تے نا ہی میں کوئی لابنگ کریندا پیا ہامی فیصلہ دوستیں دے ہتھ اے، فیصلہ وسوں کریسی۔ اصغر گورمانی