جنگ (حکایت)
حکایت
جنگ
جنگ دیاں پوتھیاں دے نال نال جنگ دا پِڑ وی سامنڑے ہا ' مقتولیں دے ناں تے گِنڑتری ' پَھٹڑاں دی پَھرول ' گھوڑیاں دیاں نسلاں تے اسلحے دیاں فہرستاں ' موقعے سِر اپنڑیاں کوتاہیاں تے دشمنڑ دی سِیانڑتاں سمجھ آئیاں ' اساں جنگ کینویں تے کِتھاں ہاری پتہ لگیا.
ہارے ہوئے دے لوکیں دے کئی روگ ہوندے ہِن ' اُنہاں دی ہار کوں اُنہاں دیاں کتاباں وچ تاریخ طور پڑھایا ویندے ' فاتح اُنہاں دے شہر وچ محل بنڑا کے رہندے , پرنیندے' قاتل دے نام دا سکہ تے ٹکٹاں چلدن' ہزاراں سالاں بعد وی فاتح دیاں توپاں چوک وچ گڈیاں ' بندوقاں نصاب وچ کھڑیاں ' اساں اِتھاں ہریاں ہویاں جنگاں دے نروار کیتے پُجے.
اساں اج ہریاں ہویاں جنگاں اپنڑیاں گھوڑے تے تلوار باجھوں' کہیں وی قتلام باجھوں جیتیاں ہِن. (رفعت عباس)