جاوید آصف
کھارے چڑھدی سک[لکھو | ماخذ وچ تبدیلی کرو]
ذہانت ایمانداری محنت تے مہارت دے لفظیں کوں کٹھا کروں تاں جواب امدے جاویدآصف ـ ایں مانڑک ماݨھوں دے سنگ میݙا رشتہ ھے روز ازل دا، اساں ہک ٻئے دے سونہے ہاؤں جنم جنم دے ـ جاویدآصف دی رہائش ھے لفظ نگر وچ اتے میں ایندا ہمسایہ میڈا گھر اکھریں دے محلے وچ عرصہ دراز توں میں ایں شخص دی سوچ وچار تے منظم زندگی تے عاشق ہاں ـاے نوجوان الیندا گھٹ اتے لکھدا ڈھیر اے ـ میݙا ایں گالھ نال اتفاق اے جو ہر او اکھر جیرھا عوام دے حق اچ کاغذ دی کنڈ تے لکھیج ویندے برحق اے ـ آصف دیاں لکھتاں بے عمیق ہن نظماں لکھدے بیت بݨیندے، غزلاں اہدے کہانی تے پوری دسترس ہس افسانے دا ماہر اے. ـ میں ایندا کیرھا کیرھا گݨ گݨواواں ـ چارے پیر دھوتا پورا پنج کلیان ـ ایندی علمی ادبی خدمت انت شمار توں بارھوں اے. میں گنتی نئیں کریندا ایندے شاہکاریں دی ـ میں ݙرداں سڑول لوکیں دی ایکوں نظر نہ لگے ـ نویں کتاب گھن تے آ لتھے رب دی دھرتی تے، نانواں رکھیس موجودہ سمے دی سوجھل کتاب دا "کھارے چڑھدی سک" سک سرمایہ صدیں دا سرائیکی دھرتی ہمیشہ سک دا سیک برداشت کیتے پار کوں اروار دی سک اروار کوں پار دی ـ دھرتی دے رزق دے چشمے سک ڳئے، ڄئے سرائیکی دیس دے وطن کنوں بے وطن تھئے،. دھیریں ونج کراچی برتن دھوتے ساہوکاریں دے، پتر ایاݨے مسقط،. دبئی کویت وچ اٹھیں دی دھروک دی ہاٹھ اچ چیکاں مار تے مردے رہ گئے ـ پچھوں دھرتی تے سک سغرانداں سنبھلیندیاں رہ گیاں ـ میں کتاب دا ہک ہک ورقہ پڑھیے میکوں کتاب سوجھلا بخشیے،. ہݨ کھارے چڑھدے سک تہاݙے نرم نازک ہتھیں دے لمس دی سک اچ ھے کتاب اچ لکھیاں سڄاک نظماں، اشاک غزلاں، ملوک سطراں، نفیس اکھر تے معشوق مصرعے جیرھے تساں پڑھ تے نہال تھیسوـ
(صوفی تاج محمد گوپانگ)
نظم[لکھو | ماخذ وچ تبدیلی کرو]
تیں توں پہلے کلھے وی نہ ہاسے
کہیں دے جیکر رلے وی نہ ہاسے
جاپے ہاکون؟
ہا تاں سہی کوئی
قربتیں نال ساڈے اندر دے
ہر خلا کوں جو کیتی پر رہ گے
زندگی دے سکھیندا گر رہ گے
جاپے ہا کون؟
ہا تاں سہی کوئی
یار ٻیلی تاں سارے اوہے ہن
کجھ ہنائیں توں وی ہݨ سوائے ݙسدن
میڈے ہر وقت نال ہن جیرھے
میݙا رکھدے خیال ہن جیرھے
جاپے ہا کون
ہا تاں سہی کوئی
تیں توں پہلے وی جے ہا کئ موجود
اساں تیکوں منیا ہا کیوں معبود؟
جاپے ہا کون؟
ہا تاں سہی کوئ
تیں توں پہلے
جے کئ نہ ہا ساڈا
ایویں چاہیدا ہا ول تاں جان میڈی
تیں توں پہلے وی کلھے ہووں ہا
ایویں نجروں ہا ایویں رووں ہا
تیں توں پہلے کلھے وی نہ ہاسے
کہیں دے جیکر رلے وی نہ ہاسے