تھپیرے دا روزہ

میڈی اے جذبات، شعر نہ سمجھے ونجن، میڈی وستی دا مزدور تھپیرا روزے دی حالت اچ روزی کریندیں شہید تھی گۓ... میڈی وستی دا جگنو، ساری وستی اندھاری کر گئیں... شالا عقبی سوجھل ہووی. آمین

بت سنداری ہے ایں ساہ دے ہوونڑ تائیں

روح ادھاری ہے ایں ساہ دے ہوونڑ تائیں

ہک تماشا ہے جیونڑ دے رستے اتے

روح مداری ہے ایں ساہ دے ہوونڑ تائیں

ایں حیاتی دی تڈ تے ہے کتلا فخر

میں گزاری ہے ایں ساہ دے ہوونڑ تائیں

ساریں مرضیں دی شافی دوا موت ہے

ہر بیماری ہے ایں ساہ دے ہوونڑ تائیں

توں تاں شانی بنڑیا ہائیں میڈی زندگی

تیڈی یاری ہے ایں ساہ دے ہوونڑ تائیں

(منصور شانی، ١٣ جون ٢٠١٦ء)