تقسیم ہند

برطانوی قانون آزادی ہند 1947ء دے تحت 15 اگست 1947ء کوں پاکستان تے بھارت دے قیام کوں تقسیم ہند آکھا ویندا ہے جیں دے تحت ݙوہاں ممالک نے برطانیہ توں آزادی حاصل کیتی۔ ایں تقسیم دے نتیجے وچ مشرقی بنگال پاکستان تے مغربی بنگال بھارت وچ شامل تھیا تے پنجاب وی پاکستان دے موجودہ صوبہ پنجاب تے بھارت دے مشرقی پنجاب اچ تقسیم تھی ڳیا۔ ایں تقسیم دے بعد نوزائیدہ پاکستانی ریاست دا دار الحکومت کراچی قرار پایا جتھاں قائد اعظم محمد علی جناح نے پہلے گورنر جنرل دی حیثیت نال حلف چاتا۔ پاکستان اپݨا یوم آزادی 14 اگست جبکہ بھارت 15 اگست کوں منیندا ہے۔

تقسیم ہند دا بنیادی محرک مسلمانان ہند دی اوہ عظیم تحریک ہئی جیہڑی انہاں نے برصغیر وچ ہک الگ وطن قائم کرݨ کیتے شروع کیتی ہَئی۔ جیں دے کیتے انہاں نے مسلم لیگ دا پلیٹ فارم استعمال کیتا۔ قائد اعظم محمد علی جناح دی قیادت وچ مسلمانان ہند دا خواب 14 اگست 1947ء دی شب پورا تھیا جݙݨ 27 رمضان المبارک دی مبارک ساعتاں ہن۔