تعلیمی اداریاں اچ مذہبی تنظیماں
جی سی ٹی کراچی بہوں وڈا انسٹیٹوٹ سمجھیا ویندے، اج توں تقریبا چار سال پہلیں میں اتھاں داخلہ گھننڑ واسطے گیا ہم ، اتھاں پجیا تاں اگو جماعتی ٹولہ بیٹھا ہا ، ہک ملاں میڈے نال الانڑے جو کیویں آیا ودیں ؟ میں اوکوں ڈسیم جو داخلہ گھننڑے اوں ڈسیا جو داخلے دی آخری تریخ تاں ٹپ گئی اے، تے داخلے واسطے امتحان وی تھی گئین، لیکن جیکر توں جمعیت اچ شامل تھیویں تاں تیڈا داخلہ اساں کروا ڈیندوں، میں پچھیا جو جیہرلے داخلے تھی گئین تاں تساں میڈا داخلہ کیہرے حساب اچ کروا ڈیسو انھاں ڈسیا جو لسٹاں اساں آپ بنڑیندے راہندوں، میڈے ذہن اچ خیال آیا جو میں پرائیوٹ فیس ڈے کے وی پڑھ سگداں، کہیں میرٹ تے آئے نوجوان دا حق نہ ماراں ، میں انھاں کوں منع کر ڈتا، لیکن اے سوال میڈے چیتے کوں کھاندا رہیا جو اتھاں پتہ نئیں کتلا غریبیں دا حق ماریا ویندا پیا ہوسی، ایں کالج دا در جیہرا سائیٹ آلے انڈسٹریل ایریا آلے پاسوں ہے اوں در دے اگو تقریبا روزانہ پولیس دا ڈبہ کھڑا ہوندے، بندوخ چا تے کوئی پولیس آلا کھڑا ہووے کوئی محافظ کھڑا ہووے یا وت کوئی دھشتگرد میکوں انھیں اچ فرق نظر نئیں آندا، آخر چاتی تاں بندوخ کھڑے ہوندن۔ ایں در دے بلکل نال ڈو چار بلانگیں تیں ہک مزائل دا ماڈل وی لگا کھڑے، میکوں اج تائیں سمجھ نئیں آئی جو اے انسان قتل کرنڑ آلا تے ابادی مکاونڑ آلا پرزہ ایں کالج دے در تیں کیوں لگا کھڑے۔ ایندے در تیں تاں سقراط، مارکس یا بھٹو دا مجسمہ ہوونڑاں چاہیدا ہا۔ مظہر حسین