تریمت
تریمت خدا دی او تخلیق اے جیندا ہووݨ جوانیں دے وجود واسطے بہوں ضروری ہے لیکن ایہ ڳالھ صرف دماغ اچ رکھݨی ہے نا تاں ساݙی بلوچکی تے خدا دا عذاب نازل تھی ویسی۔۔
تریمت ساری زندگی جوان دی پڳ دی محافظ رہندی ہے زندگی دے کہیں موڑ تے جیکر اوں کنیں کئی غلطی تھی پووے تاں اوندی سزا موت ہوندی ہے یا وت کم از کم بیغیرتی دا معیار اے ہوندے جو اوکوں آپ توں انج کر ݙتا ویندے تے معاشرے اچ کہیں نینگر کوں اے جرات نئیں تھیندی جو اوں تریمت کوں آپݨاں ساتھی بݨاوے بلکہ اوکوں شادی برادری توں انج کر ݙتا ویندے چھیکڑ اونکوں خدا دے مصلے تے وی مندے نصیب تھیندن آھدن اے غلط رن ہݨ خدا کوں دھوکہ پئی ݙیندی اے تے ایں بشکیجݨاں ویسے کینی۔۔
خدا دی رحمت تے اونداں غفور و رحیم ہووݨ صرف جوان واسطے ہے پیا او صرف ہک دفعہ استغفار چا کریندے اوندے بعد او معزز بݨیا ویندے تے ہوندے سارے گناہ دھویج پوندن لیکن شودی تریمت جاوݨ لا کنوں مینہڑیں سݨ جلدی اے تے جوان دی نوکری کر جلدی اے۔۔
او جاء پووے تاں اوندی ماء کوں طعنے ملدن جو تیکوں دھی جئی ہے اوندے بعد او تھولی جہیں وݙی تھیوے تاں اوندے واسطے ہک ضابطہ حیات بݨیا لاتھا ہوندے دھیریاں ایں نئیں کریندیاں اوں نئیں کریندیاں۔۔
ہر موقعے تے ایہیے لوظ سݨ سݨ کے او شودی احساس کمتری دا شکار تھی ویندی اے۔۔ اوندے بعد او بھراویں دی پگ کوں آپݨاں لباس بݨیندی اے۔۔ اوندا بچپن برباد کر تے اوندی جوانی ہک زمینیخدا دے ہتھ ݙے ݙتی ویندی اے جیہرا صرف آپݨیں انسانی خواہش غیر انسانی رویے نال پوری کر تے تریمت دی روح تیں کاتیاں پھریندے۔۔ اے ہونکوں آپݨیں نوکراݨیں سمجھدے ۔۔ صرف اے ناں ہیندا سارا ٹبر اونکوں آپݨی نوکراݨیں مقرر کریندن۔۔
اج تریمیتیں دا ݙینہہ مناوݨ واسطے ساکوں اے وعدہ کرݨاں پوسی جو اساں ایکوں کم از کم انسان سمجھو ۔۔
سندھ وادی دی تہذیب تاں اینکوں خدا دا روپ سمجھدی اے۔۔ اینکوں سردار سمجھدی اے۔۔
ایندی نفاست کوں آدر ݙیندی اے۔۔
ملاں آپݨی منڈی اچ اے ہوکا کݙاہیں نہ لگݨ ݙیسی کیوں جو اوندی آڑھت اچ خدا لاتھن تھئے اوں آپݨیں منݙی اچ صرف خدا ویچݨین۔۔ ملاں آپݨاں ݙڈھ وسوں رکھݨ سانگے خدا دے اتیں غیرت دا لیبل لئے چا او ٹیگ ہݨ جیہرا ہٹاوݨ دی کوشش کریسی۔۔
اونکوں سولی تے چڑھا ݙتا ویسی۔۔ تے جیہری تریمت خدا دی عظمت کوں وسوں دے رنگ اچ رنگڑ سانگے رقص کر ݙکھلیسی اونکوں خدا دی بلوچکی آلی سفیل توں غیرت دی کہاڑی نال قندیل بݨا ݙتا ویسی۔۔
چهوٹے هِک معصوم ایاݨاں دل بده پیو دے نال الاݨاں
ابا سائیں توں رنج ناں تهیویں ڳالھ میݙی تے انج ناں تهیویں میکوں هک وسواس پیا کهاوے مسله میکوں سمجھ ناں آوے
بهیݨ بهیرو کوں رل مل ساریں گچی گهٹ کے کیوں چا مارائے بیٹھی هائی او واݨ وٹیندی کہیں دا او هائی کیا وگڑیندی
آکهس تیکوں حال میں ݙیندا بچڑا سچی ڳالھ ݙسینداں بچڑا کہیں کوں ایہو ڳالھ ناں ݙسیں لج دی ڳالھ اے ڳالھ ناں ݙسیں
گزری رات کوں دهمی ویلھے غیر جوان دے نال کهڑی هئی پاتی پیاردهمال کهڑی هئی ابا خوف خدا توں ݙریں ناں کاوڑ میݙی ڳالھ تے کریں پر تاں بهیڑے پتر وی تیݙے
ایو جیهاں هک جرم کیتا ها پرلی وستی وچ پکڑیج پیا ها
اوندے سانگےدر در پگوں رولیاں هانیں چٹی دے وچ ݙو سوݨیاں دهیریں گهولیاں هانیں
اوندے اتوں ساه چا واریا هاوی اوکوں کیوں نا ماریا هاوی
مظہر حسین