تدوین متن دے محقق دے اوصاف

تدوین متن دے محقق کیتے وی انہاں خوبیاں دا ہووݨ ضروری ہے جہڑیاں عام تحقیق کیتے ضروری ہوندیاں ہن۔ تاہم این٘جھے محقق وچ کجھ ٻیاں وادھوں خوبیاں وی ہووݨیاں چاہیدیاں ہن۔ حواشی ، متن دا زمانہ تصنیف، مصنف، تے اوندے عہد دیاں خصوصیات، داخلی شواہد دا تعین کجھ این٘جھیاں ڳالھیں ہن جنھاں دا تعین کرݨ کیتے کہیں قابل تے اہل فرد دی لوڑ ہوندی ہے۔ ایہ فریضہ آوہو بندہ سرانجام ݙے سڳدے جہڑا تحقیق دے آداب کوں چنگی طرحاں ڄاݨدا ہووے۔ این٘جھا محقق صحیح طریقے نال حقائق کوں پرکھݨ تے اوندے کھوج لاوݨ دے فن نال آشنا ہووے۔

جہڑا بندہ قدرتی طور تے تحقیقی مزاج نہ رکھدا ہووے او تدوین دا کم کائنی کر سڳدا۔

تدوین متن دیاں منزلاں

نسخیاں دی ڳول تے حصول، املا دیاں اوکھائیاں کوں ڄاݨݨ، الحاقی کلام دی سُن٘ڄاݨ، نسخیاں داموازنہ تے مرتب کرݨ، حواشی تے تعلیقات پیش کرݨ تے تصیح متن دا مرحلہ لنگھا تے مقدمہ یا تعارف وغیرہ لکھݨ تدوین متن دے سلسلے دیاں نمایاں منزلاں ہن۔ سرائیکی تحقیق وچ ایہ منزلاں اڄݨ چنڳی طرحاں تے معیاری انداز وچ طے کائنی تھیاں۔ پر ایندے پاسے توجہ ݙتی ویندی پئی ہے۔