تخت لہور تے اقبال سوکڑی نال شام
لکھت راݨا ابرار خالد
ہک وستی وچ تھئی جتھاں پلاک ولوں سئیں رفعت عباس دے پنجاپی شاعری ایوارڈ گھنݨ توں انکاردے بعد اقبال سوکڑی سئیں کوں چادر پوائی گئی جوانہاں ضیامردود دے دور وچ رائیٹرزگلڈ دا ایوارڈ گھنݨ توں انکار کیتاہائی (رفعت عباس سئیں اوں کٹھ وچ نہ آئے تے انہاں کوں چادر بعد وچ ملتان انہاں دے انکارآدٌر اچ پوائی گئی)۔۔۔۔۔۔اقبال سوکڑی سئیں دے بارے وچ سݨیج ملدی رہئی جوانہاں اردوشاعری چھوڑکے سرائیکی شاعری شروع کیتی ہائی، ول شاعریں دے انہاں نال جھیڑے یا انہاں دے بنہاں شاعراں نال جھیڑے، گروپ بندیاں، عام طور تے ڈٹھا گئے جو سوکڑی سئں ڈھیر ساراویلھا شاعریں نال اٹکیے ضرور رہ گئین تے انہاں کوں کہیں نہ کہیں توں ہمیش گۭلہ ای رہ گئے۔۔۔۔۔گزریل ڈینہاں نیشنل پریس کلب اسلام آباد وچ انہاں دے اعزاز وچ کجھ لوکاں شام منائی جیندے وچ سامعین دی اکثریت خالی کرسیاں ہن، شئیت انہاں دا ترسلہ نہ تھیا ہوسی جو اج بھٹوصیب دی شہادت دے ڈیہاڑے خالی کرسیاں نال شام مناوݨ لہور دے دربار وچ پلاک دے پلیٹ فارم تے پُج گئین ۔۔۔۔۔ایں توں ایہو نتیجہ نکلدے جو انہاں دا اےشعر۔۔۔۔۔
اے وقت ڈے سزامگرپتھرتاں گݨکے مار
ہوسگدے وقت ساڈا وی بانہہ بیل کل بݨے
انہاں اے شعر آپڑیں محبوب سانگے نہ آکھیاہوسی نہ ای انہاں سرائیکی قوم دی ترجمانی کیتی، ہووے نہ ہووے انہاں دے مخاطب اوہے شاعر ای ہوسن جنہاں کوں سوکڑی صیب ہمیش آپڑاں مخالف جاݨدے رہ گئین۔
اتھاں ہک سوال وی بݨدے، کیاسوکڑی صیب کوں تخت لہور دی راہ اٌنہاں لوکیں ڈکھلائی جنہاں گزریل ڈینہاں نیشنل پریس کلب اسلام آباد وچ اقبال سوکڑی نال شام منائی تے جیہڑھے ہرویلھے پارلیمنٹ دے مونڈھے تے بندوخ رکھ کے (استادفداحسین گاڈی کوں کٌوڑا کرن سانگے) سرائیکی سنجاݨکوں نشانہ بݨائی رکھدن، یا ول کئی بیامہربان وی ملوث اے۔۔۔۔۔۔۔!!
پر، تخت لہورکوں آپڑاں بانہہ بیل بݨاون دے بعد سرائیکی شاعر(جنہاں کوں سوکڑی صیب آپڑاں مخالف جاݨدے رہ گئین تے انہاں کوں بہوں پہلے آکھیا ہائی ”ہوسگدے وقت ساڈا وی بانہہ بیل کل بݨے“) او ہݨ اقبال سوکڑی سئیں کوں شئیت ایہوکجھ ای اہدے رہ ویسن۔۔۔۔
بناہے شاہ کامصاحب پھرے ہے اۭتراتا
وگرنہ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔!!