تبسم بخاری دی مکاݨ

سید تبسم علی بخاری ایڈووکیٹ( بھشتی ) کیجھے کیجھے لوگاں کوں جھوک لڈاونڑیں پوندی اے ؟ ھائے ووئے ھائے بخاری صیب میڈے شھھر احمد پور شرقیہ دا سنگھار ھن سنگھار ؛ محلہ کٹڑہ احمد خان اچ راھندے ھن ؛ آندے پئے ھوون ھا تاں پتہ لگدا ھا جو کوئی ماء دا جایا آندا پئے ؛ بخاری صیب جیھری کچاھری اچ ان باھون ھا کچاھری کوں رنگ لگ ویندے ھن تے کچاھری اچ سبھے کن لا باھندے ھن جو بخاری صیب کیا گال کریندن ؟ کچاھریاں دے وڈکے سکدے ھوندے ھن جو بخاری صیب بولن ؛ بخاری صیب گال گھٹ کریندے ھن جیھڑی گال کریندے ھن سونے اچ تولنڑ دے ڈاہ دی کریندے ھن ؛ کوڑے ، لڈھ ، چندرے ، تے سنجے بندے نال رام ست کیناں رکھیندے ھن سچے تے کھرے سید ھن ؛ شاناں آلے سید ھن ؛ سوھنڑے ایڈے جو لوگ ڈیھدے ھن تاں اکھیں رجدیاں ناں ھن ؛ کپڑا جیھڑا پاون ھا چھکدا ھا ؛ پرے کنوں آندے پئے ھوون ھا تاں ھاں ٹھر ٹھر ویندا ھا متھے تے وٹ کیناں پیندے ھن ؛ کھلدے ملن ھا تے ڈکھ سکھ ونڈاون ھا تاں ایویں لگدا ھا جیویں کوئی اپنڑاں وڈکا ھووے صاف ستھرے راھندے ھن ڈاکدار عاشق علی بخاری صیب بھشتی دی اولاد ھن تے شھھر دا وڈا گھر ھا انھاں دا رج رج تے عزت کرنڑ آلے ھن ؛ لوگاں دے کماں کاراں کیتے بھج دھرک کریندے ھن ؛ لوگاں دے کماں کیتے جیندے در تے ٹر ویندے ھن مجال اے او ناں کرے ھا ؛ اللہ سوھنڑیں دیاں وڈیاں رحمتاں ھن انھاں تے خیراں منگنڑ آلے ھن ایں وڈے گھر کوں ایجھی نظر لگی جو ھک ھک کر تے سبھے بخاری بھرا اپنڑاں گھر بار تے ترکہ ویچ تے شھھر کوں کلھا کر گئے بخاری صیب دا ھکو ھک پتر اے او جیون جوگا بخاری صیب کوں کراچی گھن گیا ؛ بخاری صیب ڈاڈھے مونجھے راھندے ھن کراچی ؛ ڈوں دفا جھیھڑا کر تے ول اتھائیں ول آئے ھن ؛ پتر رھا تے ڈٹ لاء تے ول منا گیا ؛ بخاری صیب ملدے ھن تاں ڈسیندے ھوندے ھن جو انھاں دا رو نی لگدا کراچی اچ ؛ کراچی تاں جنگل اے جنگل کوئی کھھیں کوں جانڑدا ای کینی ؛ ناں کوئی کھھیں دا ڈکھ سکھ ونڈیندے اتھاں بندے نی راھندے مشیناں ھن مشیناں ؛ ھمسایہ ھمسائے کوں نی جانڑدا اوڑک بخاری صیب کوں شھھر دیاں مونجھاں مار گھتیا شھھر آلیاں کوں تاں پتہ وی ھنڑ لگدا ودے جو بخاری صیب جھوک لڈا گن. انا لللہ وانا علیہ راجعون 01 جنوری 2019 (سلیم خان نیازی)