بشیر بزمی

اصل ناں       بشیر احمد

قلمی ناں       بشیر بزمی

جٖمنْ           1974ء

تعلیم          میٹرک

فون نمبر        0340 3280608

جاہ پتہ       موضع درگھ کوٹ ادو ضلع مظفر گٖڑھ

شعری مجموعہ ’’ پینگھاں‘‘ دے خالق بشیر بزمی دا تعلق کوٹ ادو دے نواحی موضع درگھ نال ہے ،بشیر بزمی سرائیکی دے مہاندرے شاعر ہن ،بقول پروفیسر عمران میرؔ ’’پینگھاں‘بنیادی طور تے سرائیکی وسوں دی ہزار سالہ شعری راند دا اوہ سچل پوکھا ہے جیندی ہوند بندے دی سکت تے پھربنْ دی ہے ‘‘بہر حال مرزا غالب دا ہک مصرعہ ہے جو۔

ع۔کون جیتا ہے تیری زلف کے سر ہونے تک

ایں مصرعے دے تناظر اچ بشیر بزمیؔ دا ہک شعر ڈٖیکھو!

؎ہتھیں ڈٖو کتاباں ،وڈٖے ناز نخرے

پریشان ساری خدائی کیتی ویندے

علاوہ ازیں بشیر بزمیؔ دیاں ڈٖو عدد غزلاں حاضر ہن۔

غزل

گٖوٹھ کچاہری مونجھ ای مونجھ اے

تیڈٖی یاری مونجھ ای مونجھ اے

تیڈٖا ہوونْ نہ ہوونْ ہے

ہُنْ تاں ساری مونجھ ای مونجھ اے

دل روندا ہے ، اکھ دے رستے

ہنجھ ہے جاری مونجھ ای مونجھ اے

قاصد کولوں پچھو جیکر

کار گزاری مونجھ ای مونجھ اے

بزمیؔ اوندے نیناں دی وی

چل گٖئی آری مونجھ ای مونجھ اے