بزم ادب سنیہڑہ درابن خورد ڈیرہ اسماعیل خان
بزم ادب سنیہڑہ درابن خورد دے سوشل گروپ دے سارے ممبراں کوں مسلوب پتافی دا سلام ہووے،دوستو ایں گروپ دا مقصد شاعر و سخن تے علم و ادب ہیے۔نویں آوݨ آلے سجݨاں کوں ست بسم اللہ تے ونجݨ آلیاں کوں اللہ دی آمان ہووے۔گروپ دے سارے ممبر ہک ولڳݨ وانگوں ہوندین ایں سانگے کہیں قسم دی مذہبی تنقید تے حکومتی یا سیاسی گفتگو کولوں معذرت کرینداں،سارے ممبراں کول گزارش ہیے جو اپݨے اپݨے حصے دا کلام، نثر کہاݨیاں ،علمی تے ادبی سنگت دی روݨق بحال کیتی رہے ونجن تاکہ ساڈا مقصد علم و ادب کوں فروغ ڈیوݨ ہے تے ایہہ کوشت جاری رہاوے۔۔۔۔
سر بھگتی۔
لکھاری ۔۔۔۔۔۔۔۔۔ایم جے مسلوب پتافی
سنہ2008/9دا سال خاص کر ساڈے وسیب کیتے بہوں ہی مشکل سال ہیے کیونکہ دہشتگردی تے اغواء گیری اتنی ہیے جو پورے علاقے دا ڈر دے مارے کاروبار ٹھپ تھیندا ویندے تے ہر بندہ آپڑیں نال پستول بندوق رکھنڑ کیتے لائیسنس بنڑاونڑ دی کوشت ءچ ہیے۔
انویں پاکستان ءچ جنھاں ترائے دی زیادہ منیج ہیے او ہن کھلہ،دلہ،تے وات پاڑا،لیکن ہر ادارے ءچ کجھ بھلے مانس لوک اجنڑ وی ہن جہڑے انسانی ہمدردی دا کردار ادا کرکے انسانیت دا ثبوت ڈیندے ہن۔
میں انھاں لوکاں دا شکر گزار ہاں جنھاں میڈے نال انسانی ہمدردی کیتی ہیے۔میں جڈاں آنٹی کرپشن دے جناب عزت مآب سرکل آفیسر ضیاء حسن صاحب کول گیاں تاں انھاں اے سی او دفتر دے کلرک اؤل دو فون کر کے پچھے،،ہاں محمد جان دی لائسنس دا کے مسلہ ہیے آچھا انویں کرو اینکوں لائسنس ڈے ڈیوو ایہہ غریب تاں میں تک پہنچ آئے،اوندے بعد میکوں فرمائے نے کہ توں ونج مل ویسی۔
تہاکوں اے ڈسی ونجاں جو آخر مسلہ اتنا کیویں لمبا چوڑا تھئے۔ڈو ترائے مہینے پہلوں تاں ایں لائسنس فارم تے انھاں ڈی،سی،او،صاحب دی مہر لاکے آپڑیں دستخط کیتے ہائن لیکن ہنڑ کیوں ڈی سی او صاحب دی ڈاک ءچ رکھ ڈتے نے۔
جڈاں میں اسلحہ ڈیلر کول پستول دی رسید گھن کے انھاں کول انٹری کیتے آیاں تاں میکوں کلرک دوم فرمائے کہ کمپیوٹر آلے کول انٹری کرائی آ ،میں کمپیوٹر آلے انٹری کرا کے آیاں تاں انھاں رسید کوں اپڑیں کول رکھ کے آکھے نے سو روپیہ فیس جمع کرا تاں میں عرض کیتے جی سر ایہہ سرکاری فیس ہیے۔۔
کلرک دوم:۔۔,,(سر کوں ہلیندے ہوئیں)جی ہاں
مسلوب:..(بٹوے چوں سو روپیہ کڈھیندے ہوئیں)سر رسید کٹ ڈیسو۔۔
کلرک اؤل :۔۔۔کھلدیں ہوئیں مہر لاکے)بچہ کل ول آنویں
مسلوب:..(سو روپیہ سامنڑیں کرکے)سر ایہہ گھنو فیس میکوں کل دا تھڈا کیوں ڈیندے ہیوے۔
کلرک اؤل:..بچہ توں ایہہ ڈسا توں کہڑے وکیل دا منشی ہائں۔
مسلوب:.(معصومیت نال)سر جی میں کاہیں وکیل دا منشی کائنی بلکہ ہک غریب جٹ دا پتر ہاں تے میں وی جٹ واہی کریندا ہاں۔
کلرک اؤل :۔۔۔اچھا بچہ توں دو گھنٹے بعد ول آنویں۔
مسلوب:۔۔۔سر جی تہاڈے کول رسید جو منگی می ایں کیتے ٹائم ڈیونڑ لگ پئے ہیوے۔۔
کلرک اؤل:۔۔۔۔(متھے وٹ پاکے)ناہیں بچہ ساڈا مقصد ہیے جو توں قانون تے چلدیں تاں قانونی کارروائی کر کے ہی ڈیسوں ،سمجھا کر نہ بچہ۔
مسلوب:۔۔۔سخت لہجے نال چلو ٹھیک ہیے تساں قانونی کارروائی کرو بھانویں جو مہینہ ہی لگ ونجے کوئی فرق نہیں۔
میں پورے ڈو گھنٹے بعد ونج سلام کیتے تاں کلرک دوم صاحب بجائے سلام دے جواب دے میڈو ہتھ نال اشارہ کریندے ہوئے ،سر جی اے بچہ ول آئے۔
کلرک اؤل:۔۔۔(مسکراندے ہوئے)بچہ توں کل ول آنویں صاحب ہونڑاں آپڑی کرسی تے کائنی۔
مسلوب :۔۔۔(جذباتی لہجے نال)ایڈی تعلیم حاصل کر کے وی انسانیت دا بھورا کوئنی اگر رشوت ڈیواں ہا تاں دستی ڈیندے ناوے پائے۔
کلرک اؤل:۔۔۔(طنزاً)بچہ سمجھا کر ناں تو ہک پڑھا لکھا بچہ ہئیں آساں وی صاحب دے ماتحت ہیں اگر اس حکم ڈیسین تاں ساکوں کیرہی حرج ہیے ڈیونڑ کول۔
مسلوب:۔۔۔انویں حق نہیں جیویں تساں کریندے پئے وے۔
کلرک اؤل:۔۔(طنزاً کھلدیں ہویں)ڈیکھ ناں بچہ تیڈی عمراں تے ساڈی سروس۔
مسلوب:۔۔۔تے رشوت گھنڑ دا تجربہ۔
کلرک دوم :۔۔۔بچہ تائیں آپڑیں زندگی ءچ بہوں اوکھا تھیونڑے۔
مسلوب:۔۔اگر رشوت نہ ڈیسوں تاں اوکھے تاں تھیسوں۔۔۔
کلرک اول:..بچہ توں کل ول انویں۔
ایندے بعد میں سیدھا آنٹی کرپشن دے دفتر دو ٹر پیاں آگوں سنتری نال تعارف تھیا آؤں میکوں افسراں دے ناں وغیرہ ڈسے میں اوں دفتر دے بوہے تے پہنچ گیاں جیندی تختی تے لکھا ہا (کمرہ محرر)میں محرر سبطین کول پچھے جو سبطین صاحب کون ہیے انھاں فرمائے جی حکم میں ہاں ۔میں سارا حال احوال کر سنڑائے انھاں قصہ سنڑ کے فرمائے نے توں باہے صاحب فارغ تھی گھنے تیکوں ملویندے ہائیں۔کجھ آدمی اکھنڑ لگے یار تو عجیب بندہ ہئیں ہک سو روپیہ دے پچھوں اتنا مسلہ کھڑا کیتی ودیں تاں میں عرض کیتے ،حضور پاک نے فرمایا ہیے رشوت ڈیونڑ آلا وی جہنمی تے گھنڑ آلا وی تے ڈوجھی گالھ جو سو روپیہ تاں ہک کلرک منگے سو بئے کوں سو بئے کوں سو گیٹ انٹڑی اتھوں کول تاں بےلائسنس چنگاں نہیں کوئی ہر ویلے چھاپے لگدے پائین بہرحال اتھوں محرر صاحب ہتھ دا اشارہ ڈیندے ہوئے آکھے نے ونج سامنڑیں آلا کمرہ صاحب دا ہیے اونکوں سارا حال ڈس چا تےوت جیویں ہوسی کریسوں۔
میں انھاں دا شکریہ ادا کر کے سرکل آفیسر دا دروازہ کھول کے سر اجازت ہیے۔
سرکل آفیسر:۔۔۔۔ہاں آؤ
مسلوب:۔۔۔۔۔۔اسلام وعلیکم سرجی۔
سرکل آفیسر:۔۔۔۔۔۔۔۔واعلیکم اسلام جی بھئی ۔
مسلوب:۔۔۔۔۔میڈی ساری لنگھی گزری سنڑ کے ڈو ترائے دفعہ موبائل تے نمبر ملائے نے لیکن جواب نہیں ملا اتھوں او باہروں لگے گئےتے میں اندروں کرسی تے ٹیک لگ کے باہے گیاں تھوڑی دیر بعد صاحب آئے تے میکوں فرمایا نے توں ونج تیکوں مل ویسی۔میں وت اے سی او دفتر پہنچ گیاں جیویں کمرے ءچ وڑاں کلرک اؤل آکھے۔
آ باہے بچہ تیڈے نال تاں آساں ہنڑ پکی یاری لیسوں توں تاں ضیاء کول ساڈی کمپلینٹ کرا کے خوش تھی گیا ہوسیں ساڈا آفیسر او تاں نہیں۔ ساڈے تاں اے سی او صاحب ہن تئیں تاں آپڑیں نال آپ چا کیتی ہیے۔
مسلوب :۔۔۔۔۔۔کوئ وی ہووے میڈا مقصد ایہہ نہیں۔
کلرک اؤل :۔۔۔۔۔۔۔۔بچہ توں انویں کر کل ول آنویں اپناں وقت ضائع نہ کر۔۔۔۔۔۔۔۔
مسلوب:۔۔۔۔۔۔۔۔چلو ٹھیک ہیے میں کل ول آساں میں سدھا گھر دو لگا آیاں ضیاء صاحب دو ایں کیتے ناں گیا جو سے کتھائیں او وی خفا نہ تھی ونجین لیکن میکوں انھاں دی چالاکی معلوم ہائی خیر میں گھر آیاں تاں گھر آلے سارے پریشان ہائن کیونکہ کجھ حالات وی انویں ہائن ۔۔۔۔۔میں گھر آلاں کوں سارا حال حقیقت سنڑایا، والد صاحب اکھنڑ لگے ڈیکھ آساں غریب لوک ہائیں ساڈی کون سنڑدے میں آکھے نائیں بابا ایجھائیں ادارے تے مخلص ایماندار آفیسر ہن جیہڑے انسانی ہمدردی تے کم کریندن لیکن غریب عوام ڈردی ہیے جو انھاں افسراں دے وت منھ متھے لگڑاں ہوندے۔لیکن میڈے ءچ ایہہ ہمت ہیے جو میں سوا خدا دے کاہیں کول نہ ڈردا۔بہرحال خیر دا بدھ دا ڈینھ تے رات گزری تے میں جمعرات 18/06/2009دا ڈینھ تھیا میں وت آپڑیں وستی کول جہڑی شہر کولوں بیس کلومیٹر دے فاصلے تے ہیے ٹر پیاں۔
اگوں گیٹ تے سنتری باہروں ٹیہلدا کھڑا ہا میکوں روک کے آکھیا نے جی ؟میں آکھے جی پستول دی لائسنس چاونڑی ہیے
سنتری :۔۔۔۔۔۔۔۔کلرک ڈاہ 10وجے اسین توں ساڈھے ڈاہ وجے آ ونجیں۔
میں اتھوں کچہری دے پاسے ٹر پیاں اتھاں میڈا ہک دوست جوڈیشنل عدالت ءچ ملازم ہیے او مل گئے اونکوں سارا حال سنڑائے آؤں آکھے اچھا صبر کر ساڈا صاحب آونجے وت گالھ کریندے ہیں ،میں آکھے نائیں بھئی میں وینداں پیاں بلال بلوچ دو ڈیکھنڑ او کیا آدھن کیونکہ پہلے وی انھاں دے توسط نال میڈا کم تھیا۔اوندے بعد میں بلال بلوچ کول پہنچ گیاں گزری وہانڑی سنڑنڑ دے بعد فرمایا نے آچھا انویں کر گیٹ دے نال آلا کمرہ ہیے اسپیشل برانچ آؤندے وچ ملک () حوالدار ہیے اونکوں میڈا اکھسیں تیکوں لائیسنس چوا ڈیسی۔میں دفتر آیاں حوالدار صاحب نال ملاقات تھئی میکوں آکھے نے اتھائیں کھڑو میں پتہ کرکے آنداں میں برانڈے ءچ انتظار کرنڑ لگ پیاں تھوڑی دیر بعد میکوں ملک صاحب آلا کیتے جو اندر ا ونج ،میں جیویں دروازے تے گیاں کلرک دوم پہلوں میڈی تاڑ ءچ بیٹھا ہا میکوں ڈیکھ کے آکھیس ایہو بندہ تاں ہیے۔
کلرک دوم :۔۔۔۔۔۔(ملک دو اکھ نال اشارہ کریندے ہوئے ) صاحب کول ڈاک ءچ گئی پئی ہیے جیویں آسی اینکوں ڈے ڈیسوں ولا میڈے نال مخاطب تھی کے آکھے نے توں ہک وجے ول انویں۔
ملک صاحب میکوں باہروں سڈ کے آکھے بچہ ایہہ افسر لوک ہن انھاں نال ونجایا نہ کرو انھاں کول سو سو ہربے ہوندن تو جو آنٹی کرپشن گئیں او انھاں دا کیا کر گھنسین ،میڈی وی صاحب کول ڈاک گئی پئی ہیے تقریباً مہینہ تھی گئے کالیں نی ملی توں کر 12وجے آنویں میں ہونواں نہ ہونواں میڈا اکھسیں تیکوں چا ڈیسین۔
آخر کار میں بازار ءچوں کرائے تے سائیکل چا کےسیدھا ریڈیو پاکستان پہنچ گیاں پروڈیوسر صاحب بہوں مخلص بندے ہن سلام دعا دے بعد انھاں دا ہک سلسلہ ہیے ٹردے ٹردے لیکن میں خود ہی وڑ گیاں ٹردے ٹردے ایں سلسلے ءچ ۔گالھ مہاڑ تھئی آمن تے خوشحالی دے حوالے نال امن سکون تے گالھ وات کرکے ولا میڈی شاعری تے میڈے شغل تے ول آئی۔۔۔۔۔۔۔۔۔۔خیر ایہہ تاں میں ٹائم ٹپاونڑ کیتے انتے اونتے پھردا ریہم ہک وجے میں جیویں کمرے ءچ وڑاں تاں کلرک اؤل آکھے صاحب ہونڑاں مصروف ہن توں کل ول انویں اتھوں اچانک ڈوجھے کمرے چوں ہک بیا کلرک نمودار تھیا کلرک اؤل کلرک سوم نال مخاطب تھی کے سر ایہہ بچہ قانون تے چلدے آنٹی کرپشن ضیاء دو بھج گئے۔
کلرک سوم :۔۔۔ ۔۔۔ضیاء مسات دو۔
کلرک اؤل :....(اکھ دا اشارہ کریندے ہوئے)ہا اوہ تھوہاڈا جیڑا مسات ہیے اوندو۔
کلرک سوم :۔۔۔۔۔۔۔۔کیوں بچہ تیکوں کیڑھی تکلیف ہئی۔
مسلوب:۔۔۔۔۔۔۔۔۔۔چپ چپ سر ہیٹھ تے سٹ کے کھڑا۔
کلرک سوم :۔۔۔۔۔۔۔۔انھاں دا ساڈے نال کیہرا تعلق ہیے ساڈا افسر او تاں نہیں۔
کلرک اؤل:.........(ٹھڈا ساہ بھریندے ہؤے)بس بچے دی آپڑیں سوچ۔
کلرک دوم:۔۔۔۔۔۔۔میں تاں آگے وی اینکوں اکھیم جو تائیں آپڑیں زندگی ءچ بہوں اوکھا تھیونڑے۔
کلرک سوم:۔۔۔۔۔۔۔۔۔بچہ توں کل ول انویں۔
میں جذبات کوں قابو کریندے ولا ہک دفعہ ضیاء صاحب کول پہنچ گیاں میں جیویں ہی کمرے دا بوہا کھولے ضیاء صاحب جی بچہ کم تھائے۔
مسلوب:۔۔۔۔۔۔جی نہیں سر جی رشوت نہ ڈیونڑ دی وجہ توں او میکوں ٹائم توں ٹائم ڈیندے پئے ہن ۔
ضیاء صاحب اسے ٹائم موبائل کڈھ کے کلرک اؤل دو ٹلی کھڑکا ڈتی نے آچھا ٹھیک ہیے فون بند کر کے فرمایا نے بچہ توں کل ول آنویں ۔
مسلوب :.....سر جی کلرک سوم آکھے جو ضیاء صاحب میڈا مسات ہیے او ساڈا کے کر گھنسین انویں میکوں تھڈے دھکے ڈیندے پئے ہن۔
ضیاء صاحب:......(ہتھ دا اشارہ کریندے ہوئے) سامنڑیں محرر بیٹھے اگر میں اجازت نہ ڈیواں تاں او کم کریسی۔
مسلوب:۔۔۔۔۔۔۔جی ناہیں سر
ضیاء صاحب:۔۔۔۔۔۔۔۔۔تے ول او وی بائے دے ماتحت ہن ۔
میں دل ءچ آکھے خیر کل الی ڈیہوار وی دیکھ گھندے ہائیں ۔
ضیاء صاحب کوں انھاں دے قانون تے چالاکی دے بارے کیا خبر خیر ہر شے شیشہ تھی کے سامنڑیں ا ویسی۔
میں اجازت گھن کے گھر آگیاں دیگر کوں کجھ سنگتیاں نال ملاقات تھئی کجھ نے مشورہ ڈتا کہ توں ڈائریکٹر انٹی کرپشن دو ہک لیٹر لکھ ایہہ ڈیہواراں آلا کم ہک ڈو گھنٹے ءچ تھیسی تے ان شاءاللہ آساں وی ایں جنگ ءچ تیڈے نال ہائیں سنگتیاں دے مشورے تے حوصلے افزائی نال میڈا جذبہ حق مزید ودھ گیا۔خیر دی رات گزری تے فجر تھئی تاں میں تیاری کرکے وت شہر آلے پاسے ٹر پیاں ،جڈاں کوں میں دفتر دے باہروں ہی ہامی جو ملک صاحب کوں موٹر سائیکل تے اندا ڈیٹھم ،انھاں وی میکوں ڈیکھ کے موٹر سائیکل مٹھا کرکے پچھے حال ڈے جیویں ۔میں عرض کیتے سر جی تہاڈے سامنڑیں 12وجے دا اکھا ہانے لیکن 12وجے میکوں اجھ دا کھے نے۔
ملک صاحب موٹر سائیکل پچھوں تے ولائے چا میکوں آکھے نے آ۔
میں تے ملک صاحب اندروں گئے ہائیں تاں کلرک دوم بیٹھا ہئی ملک صاحب انھاں نال مخاطب تھی کے، یار ایں غریب کوں لائیسنس ڈیو ناں کے مسلہ ہیے۔
کلرک دوم :۔۔۔۔تہاکوں کل وی آکھے جو ڈی سی او صاحب دے دفتر ہیے۔
ملک صاحب:۔۔۔۔۔۔۔(ہتھ بنھ کے )سر انتے میڈے بدھے ہتھاں دو ڈیکھو غریب کوں لائیسنس ڈیو ناں کے کریندے ہیوے۔
کلرک دوم:....(تھوڈاں تے پین رکھ کے)اچھا اجھ کوئی بندہ ڈاک چاونڑ ویندے تاں ۔۔؟۔۔۔۔۔۔۔۔۔۔۔اتھوں ڈوجھے کمرے چوں جلدی نال کلرک سوم نکھتے ۔
کلرک سوم :۔۔۔۔۔۔۔۔۔۔۔کلرک دوم نال مخاطب تھی کے آکھے کوئی پچھے تاں میں ڈاک چا کے ہنڑے آنداں۔
کلرک اؤل :۔۔۔۔۔۔۔میڈو منھ کرکے بچہ توں گھنٹے بعد ول آنویں۔
کلرک سوم:۔۔۔۔۔۔۔۔نئیں نئیں اے کل آوے ۔
ملک صاحب میڈی باہاں چوں نپ کے باہروں گدی آئے ،میکوں آپڑاں فون نمبر ڈے کے آکھیس توں کل ول آنویں ایہہ افسر لوک ہن بھائی آنٹی کرپشن آلے انھاں دا کے کر سگدن۔ او وی موٹر سائیکل تے انڈی ولا تے ویندا تھیامیں ہک دفعہ ضیاء صاحب دے کولوں ولا پہنچ گیاں ضیاء صاحب جیویں میکوں ڈیٹھے تاں ہتھ نال اشارہ کریندے ہوئے فرمایا آؤ اوو میں بہوں زیادہ پریشان ہامی انھاں میڈے منھ دے تاثرات ڈیکھ کے محسوس کر ہی گدےکہ کم نہیں تھیا۔انھاں میڈے کول حال پچھے تے میں لنگھی گزری سنڑ آئی،انھاں اسے ٹائم موبائل فون تے نمبر ملائے ہاں بھائی کتھاں ہئیں اچھا ڈاک چاونڑ گیا ودیں ،اچھا میں مسلوب کوں پٹھیندا پیاں اینکوں لائسنس ڈے ڈیوو اج۔فون بند کرکے میکوں فرمائے نے ونج تیکوں مل ویسی،لیکن میں عرض کیتے سر جی ایہہ صرف تہاڈے منھ تے ادھدن لیکن اگوں میکوں بہوں بے ہزا کریندن تاں ضیاء صاحب میڈی گالھ سنڑ کے محرر دو آلا کیتے محرر کجھ کم ءچ مصروف ہائی ایں واسطے انھاں صاحب دا آلا نہیں سنڑ سگا تھوڑی دیر بعد ولا ہک دفعہ آلا کیتے نے تاں فوراً محرر صاحب اٹھے آئے ضیاء صاحب اونکول پچھے کیا کریندا پیا ہاویں محرر ڈسا جو کاہیں کم ءچ مصروف ہامی ،ول میڈو منھ کر کے پچھیا کہ پہلی فیس کتنی تے کیکوں ڈتی ہاوی میں ڈسا جو ستائیس سو ڈتی ہم جو کہ سرکاری فیس گھٹ ہیے۔اوندے بعد ولا کلرک اؤل دو ٹلی کھڑا ڈتی نے ہاں مسلوب دے مسلے دا کوئی حل ہیے یا آساں کڈھوں،اچھا ٹھیک ہیے اندا پئے نے جڈاں میں اے سی او دے دفتر گیاں تاں انھاں دی او مسکراہٹ ،لفظ بیانی،بحث مباحثہ ،تکرار کوئی نا ہا لیکن انھاں دے منھ دے پنے وٹے ہؤے لگدے پائین ہائن میکوں اکھیں نے باہے کلرک سوم آ ونجے تیکوں ڈیندے ہائیں اتھوں تھوڑی جھائیں دیر بعد ساڈے علاقے دا اصغر آرائیں کلرک دوم دو رسید تے لائسنس گھن آئے تاں میں چور دید نال متوجہ تھی گیاں کہ ڈیکھاں ایندے نال کے تھیندے۔
کلرک اؤل انتے اونتے ڈیکھ کے آکھے کلرک دوم کوں، ڈیکھنڑ کلرک سوم دو کال کر بچہ آیا بیٹھے اینکوں ٹوروں ہا نہ میڈا آکھیس۔
کلرک دوم نے کلرک سوم نال فون گالھ تے کیتی تے اکھیس جلدی آ ونج ،اتھوں تھوڑی دیر بعد کلرک سوم آگئےکلرک سوم ہالیں بوہے تے ودا ہائی کلرک اؤل آکھے بچے دی لائسنس ملی ناں، بچے کوں ٹور چھوڑوں۔کلرک سوم کووڑیل تھی کے ناہیں صاحب ہالیں دستخط نہیں کیتے کل ول آوے۔
کلرک اؤل :...اکھ نال اشارہ کریندے ہوئے ضیاء صاحب دی ڈوجھا دفعہ میڈو گھنٹی آئ ہیے۔
کلرک سوم جیب چوں موبائل فون کڈھ کے آکھے اچھا میں فون کرینداں بندہ چائ آسی (ایہہ تاں ہک ڈیکھاوا ہا)فون ہالیں کن تے مسیں رکھے جو رکشہ ڈرائیور ہک بستہ چا کے اندر وڑ آئے۔کلرک سوم فون بند کرکے آکھے کلرک دوم رکشے آلے کوں کرایہ ڈے چا ۔
ڈرائیور کول بستہ گھن کے آپڑیں کمرے ءچ لگا گئے تقریباً پندرہ منٹ اندروں کنڈی لائ رہے گئے پندرہ منٹ بعد کنڈی کھلی تے اوں لائسنس کلرک اؤل دے ہتھ آ کے رکھ ڈتی ۔میڈے اکھیاں دے سامنڑیں کلرک اؤل آپڑیں دستخط کیتے تے ول کلرک دوم کوں ڈتی کلرک دوم نے مہر لاکے میڈے حوالے کر ڈتی۔۔۔۔ختم شد