بادشاہی دا کمال

ھک ھا بادشاہ، اعلان کیتُس جو میݙی بادشاھی تو ں بس اے نواں بادشاہ ڳولو. دربار ءچ صلاح مشورے شروع تھی ڳئے وزیریں ،مُشیریں وݙے وݙے ناں پیش کیتے لیکن بادشاہ کوں ھِک وی پسند نہ آیا ...درٻار لڳا فرمان شاھی جاری تھیاء ،،دارلخلافے دے چارے پاسے ناکے لاݙتے ونڄن تے.پوری طرح تے سنبھال لدھی ونڄے تے سِجھ اُبھرݨ توں پہلے جہڑا بندہ شہر داخل تھیوے او نواں بادشاہ ھوسی. ݙوجھے ݙیہاڑے دربار ولا لڳ ڳیاء وݙے وزیر رپورٹ پیش کیتی ، عالم پناہ پورے ترسلے تے ہر طرح دی تحقیق مطابق سب توں پہلے ھک فقیر شہر داخل تھئے. بادشاہ ،،تے ول،، بادشاہ ،،ھوندن زبان ءچوں نکلیاء ہر لوظ حکم تے قانون دا حصہ ھوندے. فقیر کوں غسل کروایا ڳیاء ھار سنگھار کر وا تے ،،خلعت شاھی ،،پوائی ڳئی تے تخت تے ٻلھا ݙتا ڳیاء . نویں بادشاہ سلامت دا درٻار لڳ ڳیاء پُچھیا ء ڳیاء . بادشاہ سلامت حکم فرماو ،فرمانِ اِمرُوز جیکوں ایجنڈا آکھیاء ویندے جاری فرماو . شہنشہاہ معظم حکم ݙتا ، حلوے دیاں دیڳاں پکاو.

حکم دی تعمیل تھی ڳئی ݙسایا ڳیاء دیڳاں تیار ھِن اڳلا حکم جاری تھیاء سبھے چھوٹے وݙے رناں ،جُوان فقیر کٹھے کرو فقیر آڳئے دیڳیں دے مونہہ کھول ݙتے ڳئے سارے فقیر حلوہ کھانوݨ پئے ڳئے وقت دے بادشاہ کنوں وی نہ رھیاء ڳیاء او وی تخت چھوڑ تے فقیریں نال حلوہ کھانوݨ پئے ڳیاء بادشاہ سلامت دی خوشنودی واسطے باقی درٻاری وی حلوہ کھانوݨ پئے .بادشاہ سلامت حلوے کنوں ،،پُر باش تھی ولا تخت تے ونڄ ٻیٹھے سارے فقیریں بادشاہ کوں راڄ بھاڳ تے تخت دی سلامتی دیاں دعائیں ݙیوݨ شروع کر ݙتیاں دعائیں دی آواز تے شور ختم تھیاء تے ول حکم جاری تھیاء سارے فقیر یں کوں گولی مار ݙتی ونڄے تے ھک وی باقی نہ بچے ..ایں اوکھے فرمان شاھی دی تعمیل وی تھی ڳئی ولا حکم تھیاء ݙیکھو ،سنبھالو کوئی جِیندا تے نہیں بچ ڳیاء ..ترسلا ݙتا ڳیاء آقا سارے مر ڳئین ..دربار ءچ ھک زور دار قہقہہ لڳا تے خلعت شاھی وجود توں لہا تے ھک پاسے بُھکا ݙتی ڳئی تے الوداعی خطاب ءچ فرمایا ڳیاء ،،،اساں حلوہ کھانوڑاں ھا کھا گھد سے ،فقیر مرنوانڑن ھن مروا گھدنسے .تُساں عوام ڄانڑو تہاݙی بادشاھی ڄانڑے ساݙی ،،گودڑی چا،ݙیوو اساں کلھے پنسوں .ـ،،..خیال کراھے مارکہ....ایں کہانی دا حالات حاضرہ نال کوئی تعلق کوئے نی. (آفتاب نواز مستوئی)