بابا سئیں
14 اگست
میڈے بابا سئیں مرحوم و مغفور محکمہ پولیس اچ مہتمم افسر تھانہ (S.H.O) ھن. اتلی کمائ شاید نہ ھوونڑ دی وجہ نال ڈھگ جزائیت نہ بنڑا سگۓ ت نال نال اولاد کوں وی ہمیشہ پیٹ کٹ کٹ ت جفے کرنڑ سکھاۓ نے. (اے صرف میڈی بابے سئیں نال عقیدت نئ بلکہ حقیقت ھے جیندا ہک ثبوت اساں پنج بھرانویں اچو ھک کوں وی محکمہ پولیس اچ ملازم کئنی) خیر گال تھیندی پئ ہئ 14 اگست دی چھوٹے لا دیاں کجھ گاہلیں یاد ھن جو جھنڈیاں شنڈیاں گھننڑ واسطے پیسے ناں ھوندے ھن ول میں سکولو آ کے کھجیں تلو گکڑیں چنڑدا ھم ول محمد حسین المعروف ڈاڈے حقی کولو ویچ ت جھنڈیاں گھناں ھاں... پر ھر سال ڈو کم تھیندے ھن ھک تاں میڈے بت اچ بھجدا بلوچکا خون جیہرلے طا اچ ہووے ھا ول کاوڑ کڈھنڑ دا اکلوتا راہ جھنڈیاں شودیاں ھوندیاں ھن.. یا ول اندھاری ت مینہہ آ ونجے ھا ت اٹھ آنے آلے گوٹے ت اٹے دی لیوی نال بدھیاں ہوئیاں 2 گرام آلے کاوظ دیاں جھنڈیاں شودیاں شہید تھی ویندیاں ت ول... دل کے ارماں آنسووں... خیر جڈاں ڈبے لاونڑ دا رواج آیا تاں میں وی ایں رواج اچ رنگیجنڑ دا سوچا پر پیسے.... بحرحال ارادے جن کے پختہ.... ھک صوتر ابوبکر صدیق دی لونڑی تیلی دی ھٹی تو ڈبا مفت ملیا،ڈبل لکھائ سر خان کولو سکھیا ھویا ھم ت کٹائ واسطے مشین آلے ڈبے وچو قینچی چا کے اے نیک کم تھی گیا... ت رنگ برنگا کاغد...؟ اماں سیئنڑ کولو سکول ونجڑ دی وزنی شرط اچ کجھ قرضہ مل گیا ت عبیداللہ عرف بیدا شیخ دی دکان تو رنگ برنگا کاغذ وی آ گیا.. ھنڑ... لمبی تار آلی لیڈ... چلو او تاں جاہ تو لبھ پئ... بلب.... یاد کئنی پر لبھ گیا ھا.. ت بابے سئیں دی اجازت....اوکھا ترین مرحلہ وی اماں سئینڑ دی سفارش نال حل تھی گیا... (بقول بابا سئیں وکیل فری سبیل اللہ) ساڈا ڈبہ لگ گیا پر بابے سئیں دا اے فقرہ اج وی انہیں دی کفایت شعاری دا مظہر ھے "بلب ساری رات نہ بلسی ادھی رات کوں میں بلب بند کر ڈیساں" یاد رھوے اوں ویہلے بی بی شہید ت واپڈا آلے (کیپکو نمی آھدا اگیں ھک سکا رسائ وداں) سجاک کائنا تھۓ ہن مختصر لوڈ شیڈنگ کئنا تھیندی ھئ... کل جیوے افنان محمد خان دا فون آۓ ابو اساں گھر سجائ پۓ ہیں تساں آؤ ڈیکھو.... میں سوچیا گھٹ ھے ایں فقرے ت رنا ودھ ھاں... اپنڑے بالیں کوں نکیاں نکیاں خوشیاں ڈیونڑ واسطے ساڈے بابے کتنے ڈکھ چاتے ھوسن ت اج اساں وی فکر_روز گار اچ گھر توں دور پردیس اچ... پر وطن تاں اپنڑا ھے جیندیں دے ٹکر ویندن جیہرے جھوکاں لڈا گئن.... ..... ..... .... بابا سئیں تہاڈی کمی قدم قدم ت ھے....(لکھاری، منصور شانی)