بئر رومہ

بئر رومہ دا کھوہ جینکوں بئر عثمان وی آکھا ویندے۔ ایہ مدینے دے اوں وݙے کھوہ دا ناں ہے جیہڑا وادئ عقیق ، ازہری محلے وچ مسجد قبلتین توں ہک کلو میٹر جبکہ مسجد نبوی توں ساڈھے ترئے کلومیٹر شمال دی جانب واقع ہے۔ ایں کھوہ دا پاݨی نہایت شیریں، لطیف تے پاکیزہ ہے۔ ایں مناسبت نال کہ آنحضرت (صلی اللہ علیہ وآلہ وسلم) دی بشارت دے مطابق ایں کھوہ کوں خریدݨ تے وقف کرݨ دے سبب حضرت عثمان دا جنتی ہووݨا ثابت تھیا، ایں کھوہ دا ہک ناں " بئر جنت یعنی جنتی کھوہ " وی مشہور ہے، اوں زمانے وچ حضرت عثمان نے ایں کھوہ کوں ہک لکھ درہم دے عوض خریدا ہئی۔ " تے اپݨے ݙول کوں مسلماناں دا ݙول بݨا ݙتا " ایہ " وقف کرݨ " نال کنایہ ہے یعنی جیہڑا شخص ایں کھوہ کوں خریدے تے ایں کوں اپݨی ذاتی ملک قرار نہ ݙیوے بلکہ رفاہ عامہ کیتے وقف کر ݙیوے تاکہ جیں طرح خود اوہ شخص ایں کھوہ توں فائدہ چیسی ، ہوں طرح ݙوجھے لوگ وی ایندے کولوں فائدہ چا سڳن۔ ہݨ ایہ محکمہ زراعت دے کنٹرول وچ ہے۔

مہاجرین مکہ معظمہ توں ہجرت کر کے مدینہ طیبہ وچ آئے ، اتھاں دا پاݨی پسند نہ آیا، شور ہئی، بنی غفار توں ہک شخص دی مِلک وچ ہک شیریں چشمہ جیں دا ناں رومہ ہئی اوں دی ہک مشک نیم صاع نال وچیندا، سید عالم صلی اللہ تعالیٰ علیہ وسلم نے انہاں کوں فرمایا :ایہ چشمہ میݙے ہتھ ہک چشمہ بہشت دے عوض ویچ ݙے۔ عرض کیتی : یارسول اللہ! میݙی تے میݙے ٻالاں دی معاش ہیندے وچ ہے میݙے وچ طاقت نی۔ ایہ خبر عثمان غنی کوں پہنچی ، اوہ چشمہ مالک توں خرید گھدا، ول خدمت اقدس حضور سید عالم صلی اللہ تعالیٰ علیہ وسلم وچ حاضر تھی کے عرض کیتی : یارسول اللہ! کیا جیں طرح حضور اوں شخص کوں چشمہ بہشتی عطا فرمیندے پئے ہن اگر میں ایہ چشمہ اوندے کولوں خرید گھناں تاں حضور میکوں عطا فرمیسن؟ فرمایا: ہا۔ عرض کیتی : میں بِئر رومہ خرید گھدے تےتمسلماناں تے وقف کر ݙتم۔ درمنثور ص 60 ج 5 وچ لکھا ہے کہ غزوہ احزاب (جینکوں غزوہ خندق وی آہدن) دے موقعے تے قریش مکہ ابو سفیان دی قیادت وچ مدینہ منورہ دی آبادی دے قریب بئر رومہ دے کول ٹھہر ڳئے تے قبیلہ بنی غطفان دے لوگ آئے تاں ایہ لوگ احد دی طرف آ کے ٹھہر ڳئے۔