اَمَّاں حَوّا

اَمَّاں حَوّا حضرت آدم علیہ السلام دی ذال، اَتے موجودہ مکمل انسانی نسل دی اَمّاں ہِن۔ آکھیا وین٘دا ہِے جو حضرت آدم علیہ السلام دے کَھٻّے پان٘سے تُوں اِنّھاں دی تخلیق تھئی۔ کیوں جو اُوہ جِین٘دے بندے نال بݨائے ڳئے ہَن تَہُوں اُنّھاں ناں "حوّا" رکّھا ڳیا۔ اِنّھاں دا ناں قُرآن مجید وِچ نِھیں آیا۔ صرف "آدم دی ذال" دا کئی مجائیں اُتّے ذِکر ہِے۔

آدم تے حوّا ݙُن٘ہائیں کُوں "شجرِ ممنوعہ" دا پھل کھاوݨ تُوں ہٹکیا ڳیا ہئی۔ ݙُون٘ہائیں اللہ سئیں دے اِیں حُکم کُوں بُھل ڳئے ہَن اَتے شیطان دے وسوسے وِچ آ تے اُوں وَݨ دا پَھل کھا ٻیٹھے۔ پھل کھان٘دے اِی اُنّھاں کُوں گناہ دا احساس تِھیا اَتے توبہ تے استغفار وِچ لڳ ڳئے۔ اللہ جلّ شانہٗ نے معاف تاں کر ݙِتّاں جاں جو مشیت وِچ بھوئیں کُوں اَباد کرݨ دا ویلا آ ڳیا ہئی۔ تخلیقِ آدم دے ویلے اِی ݙَسا ݙِتّا ڳیا ہئی جو بھوئیں اُتے ہِک خلیفہ یا نائب دا تقرّر تِھیوݨ آلا ہِے۔ اِیں کِیتے آدم تے حَوّا ݙُون٘ہائیں کُوں بھوئیں اُتّے لہا ݙِتّا ڳیا۔

جدّہ دے ٻاہر سمندر دے کَنّے تے ہِک قبر دا نشان ہِے جین٘دے بارے وِچ لوکاں دا وِچار ہِے جو اِیہ حوّا دی قبر ہِے۔ یہودیاں دی رِیتاں دے مطابق آدم تے حوّا دے پرنیوے وِچ خپدا، جبرائیل اَتے ٻئے فرشتے رَلّے۔ جنّت تُوں نِکلݨ دے بعد آدم اَتے حوّا نے مکّہ دا سفر کِیتا اَتے خُدا دی عبادت کِیتی اَتے اِتھائیں اَمّاں حَوّا کُوں پہلا حیض آیا۔

آکھیا وین٘دا ہِے جو ݙاہ ونکیاں دے سزائیں حوّا اَتے اُون٘دے دِھیاں کُوں تجویز تھئیاں جِنّھاں وِچ حیض آوݨ، حمل اَتے وضع حمل دی اوکھاں شامل ہِن۔ وَل آکھیا ڳیا جو ڄیکر اُوہ آپݨے پَئے دی وفادار رہسِن تاں اُون٘دے نال جنّت وِچ ویسِن۔ ڄیکر اُوہ ٻال دے ڄَمَّݨ دے وِچالے وِچ ٹُر ون٘ڄِن تاں شہید دا مرتبہ پیسِن۔ آکھیا وین٘دا ہِے جو حوّا حضرت آدم علیہ السلام دے ݙو سال بعد جھوک لݙا ڳئے ہَن اَتے اُنّھاں دے پاسے وِچ پور ڈِتّے ڳئے ہَن۔

آکھیا وین٘دا ہِے جو جنّت وِچ صرف ݙو مُݨس (آدم تے حوّا) اِیہو جئیں ہوسِن جِنّھاں دی دُھنّی ناں ہوسی کیوں جا دُھنّی امّاں دے ڈِھڈ وِچُّوں ڄَمَّݨ آلے ٻالاں وِچ اِی ممکن ہِے۔

ٻِیا ݙیکھو