اورنگزیب لغاری

ٹیلی ویژن دے اداکار ہِن، جیڑھے جو ݙو سو توں ودھ ڈرامیاں اچ حصہ گھن چکے ہن۔ قصبہ رحیم آباد رحیم یار خان اچ پیدا تھئے۔ پہلی واری 1957ء اچ سنٹرل ماڈل ہائی سکول اچ جݙاں جو اٹھویں جماعت دے طالب علم ہن سکول دی سالانہ تقریب دے موقع تے سکول دے سٹیج تے ہک کھیل ’’مہ سیمیں‘‘ پیش تھیا۔ اے انہاں دی فنی صلاحیت دا پہلا مظاہرہ ہئی۔ ایں توں بعد کیڈٹ کالج پٹارو اچ تعلیم دے دوران ہک ڈرامیٹک کلب ’’فن کدہ‘‘ دی بنیاد رکھی تے کالج اچ کئی ڈرامے سٹیج کیتے تے اعزازات حاصل کیتے۔ ہک کھیل ’’نظام سقہ‘‘ ہا جیکوں ٻہوں پسند کیتا ڳیا۔ اپݨے پسندیدہ کھیݙ فٹ بال تے اداکاری دے نال نال گورنمنٹ کالج لاہورتوں گریجویشن کیتا تے کالج دے صد سالہ جشن دے موقع تے کالج دے آڈیٹوریم اچ پیش کیتے ونجٖݨ آلے شیکسپیئر دے ہک کھیل’’مڈسمرز نائٹ ڈریم ‘‘ اچ حصہ گھٖدا۔ اے کھیل صوفی تبسم نے ترجمہ کر تے ’’ساون رین دا سفنا‘‘ دے ناں نال سٹیج کیتے تیار کیتا جݙاںجو ایندی تکمیل تے پروڈکشن ڈاکٹر انور سجاد دی کاوش ہئی۔ اورنگ زیب داپہلا باقاعدہ سٹیج ڈرامہ ’’لہو کے چراغ‘‘ ہاجیندا موضوع ستمبر 1965ء دی پاک بھارت جنگ ہا تے جیکوں الحمرا آرٹس کونسل دے سٹیج تے پیش کیتا ڳیا۔

اورنگ زیب ٹیلی ویژن ، سٹیج تے فلم اچ اپݨی کارکردگی نال بے شمار ایوارڈ حاصل کر چکے ہن۔ انہاں نے ہُݨ تک جنہاں سلسلہ وار ڈرامیاں اچ کم کیتا انہاں اچ ساحل، چانن تے دریا، اندھیر اُجالا، آج کا کھیل، الف لیلہ، طوطا کہانی، ایک محبت سو افسانے، اچے برج لاہور دے، دادی، ائیرپورٹ، دروازے، دہلیز، خلش تے سونا چاندی قابل ذکرہن۔ انہاں دا سب توں وݙا تے کامیاب ترین ڈرامہ ’’وارث‘‘ہا۔ جیڑھا جو امجد اسلام امجد نے لکھیا تے نصرت ٹھاکر نے پیش کیتا جنہاں فلماں ا چ آپ نے اداکاری دے جوہر ݙکھائے انہاں اچ نورین، غریبوں کابادشاہ، نام میرا بدنام ، تے پنجابی فلم ’’جگادر‘‘ قابل ذکر ہن۔ ہُݨ تک سو توں ودھ کمرشل سٹیج ڈرامیاں اچ گھن چکے ہن جنہاں اچ ’’کنجوس ‘‘ اطہر شاہ خان دا تحریر کیتا ہویا ’’خطرہ 440وولٹ‘‘ منیر راج دی تحریر ’’پینڈو ڳیا دوبئی ‘‘ شامل ہے۔ وسیب کوں اپݨے وسیب دے ایجھے فنکاریں تے فخر ہے جیڑھے اپݨی مدد آپ دے تحت اپݨی قابلیت دا لوہا منوایا۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء