امیر راول

امیر راول سرائیکی زبان دا شاعر ہے۔

نمونہ کلام

غزل

ہک واری کریں ہا توں پیار سانولا

زندگی دا نئیں اتبار سانولا

دل وچ نت ہکا خت خت ہوندی اے

زندگی دے ہن ڈینہہ چار سانولا

پیار تیڈا زندگی دے راہ ڈکھلیندا ہے

سک تیڈی ڈیندی ساکوں مار سانولا

دل نہ ڈکھاوے جیرھا اوندی ایں جگ تیں

لگدی ہے بیڑی ونج پار سانولا

ویندی واری ہک واری ہاں ساڈاٹھاری ونج

ساڈا ہیویں ہکو ہاں ٹھار سانولا

ہک واری کیا اساں ہر ہر واری ہیں

تیڈے نانویں اساں چودھار سانولا

ہک واری راول توں کر آ دوا ونج

اساں ہیں مونجھیں دے بیمار سانولا

امیر راول

غزل

ہتھو چھٹکین جڈاں وی تھاں ولا آکھیئے میں بسم اللہ

کہیں چاتا ہے تیڈا ناں ولا آکھیئے میں بسم اللہ

میں تیکوں جان سمجھا ہے میں تیکوں خان سمجھا ہے

ڈتی تیکوں جڈاں ہے دھاں ولا آکھیئے میں بسم اللہ

ہجر دی دھپ تے گزری ہے حیاتی میڈی ہنڑ تونڑیں

ملی تیڈی جڈاں ہے چھاں ولا آکھیئے میں بسم اللہ

میں کہیں توں زیرکیاتھیواں میں کہیں توں زیرکیوں تھیواں

جڈاں سمجھے میں زندہ ہاں ولا آکھیئے میں بسم اللہ

جڈاں اکرس دے موسم وچ گھلی ہے ہیل پوربھ دی

ہوا گزری ہے کر کے شاں ولا آکھیئے میں بسم اللہ

جڈاں راول محبت دے سلیقے آئے توں نکھڑیا ہئیں

جڈاں آکھیئے تیں گانونڑ گاں ولا آکھیئے میں بسم اللہ

امیر راول

غزل

حقیقت حیاتی دی چس چانوݨیں ہے

اساں فائدے بھل کیں اے کس چانوݨیں ہے

اساں ہک قسم چا کے ٹردے ہیں ویندے

شروع چانوݨیں ہے نہ بس چانوݨیں ہے

اساں سک سمندر وسائے سینے اندر

تھلاں توں ہمیشاں ای تس چانوݨیں ہے

نکھیڑے دے سنگ بھوگ کرݨاں نئیں جیوݨ

اساں رس کے ماہیا رس چانوݨیں ہے

محبت کہانی لکھیندے ودے ہیں

قلم چانوݨیں ہے تے مس چانوݨیں ہے

تیڈی تاں محبت ہے بے انت راول 

چلو ڈھیر نہ سہی خس چانوݨیں ہے

امیر راول

گیت

یار جے بݨاوں سوہݨیں ڈھیر ودے ہن

آسے پاسے ساڈے چوپھیر ودے ہن

چمدے ہیں بھوئیں اوہا سر سٹ کیں

جیرھی بھوئیں اتیں تیڈے پیر ودے ہن

ونجلی وجیندے ودے رانجھے ہر پاسے ہن

ہیر کیتے چھیڑی مال کھیر ودے ہن

زبر آکھوں تیکوں اساں کوڑ ساڈا کائنی

باقی سوہݨیں تیڈے کولوں زیر ودے ہن

راول ہے دیوانہ دل ہکے تیڈے پیار دا

آس والی بیر اتے بیر ودے ہن

امیر راول