اللہ داد خان شہاݨی

اللہ داد خان شہاݨی (بکھر دے پہلے گریجویٹ)، نواݨی گرانہہ وچ صاحب خان شہاݨی دے گھر پیدا تھئے۔ صاحب خان شہاݨی برٹش انڈین آرمی وچ ہن۔ انہاں نے انگریز تے انہاں دے گھراں کوں بہت قریب نال ݙٹھا ہئی تے انہاں کوں ایں چیز دا علم ہئی کہ تعلیم دے علاوہ دنیا وچ کوئی ٻیا جدید ہتھیار نی۔ صاحب خان نے اپنلݨے ٻالاں کوں پڑھاوݨ دا فیصلہ کر رکھا ہئی تے انہاں نے اللہ داد خان شہاݨی کوں صاحب خان، ڈیرہ اسمعیل خان ہک بورڈنگ سکول وچ داخل کرا ݙتا۔ اللہ داد خان بہت ذہین ہن تے اپݨی ہک کلاس وچ پہلی پوزیشن حاصل کی جیندے بعد انہاں کوں وظیفہ ملا۔ انہاں دے ہک ہندو استاد نے ہندو طالب علماں کوں ڈانٹیا کہ مسلمان دا لڑکا وظیفہ گھن ڳئے۔ ایں چیز نے اللہ داد خان دے دل وچ ݙر پیدا کر ݙتا تے والد صاحب کوں ڈیرہ سکول چھڑاوݨ دا آکھا جیندے تے صاحب خان نے آکھا کہ میݙی خواہش ہئی کہ توں پڑھیں، جیندے تے اللہ داد خان نے اپݨے نال پیش آوݨ والا واقعہ سݨایا۔ صاحب خان انہاں کوں ڈیرے توں ملتان گھن ڳئے تے باقی تعلیم ملتان توں ݙیوائی تے اللہ داد خان شہاݨی بھکر دے پہلے گریجویت بݨے۔ پڑھݨ دے بعد سرکاری ملازمت وچ ڳئے، ترقی انہاں دی منتظر ہئی۔ مال افیسر، میجسٹریٹ تے اعزازی ڈپٹی کمیشنر لائے ڳئے۔ اپݨی پوسٹنگ دے دورآن بہت ساری جاہواں تے رہیے جنہاں وچ میں لدھیاݨہ، امرتسر، گورداس پور، لاہور، لائل پور (فیصل آباد)، ملتان، چکوال، مری، راولپنڈی، کیمبل پور (اٹک) تے بھی پنجاب دے کئی شہراں وچ رہیے۔ اوں وقت اللہ داد خان کوں ہر پوسٹنگ دی جگہ زمین ملی لیکن اللہ داد خان نے ہر ملی ہوئی زمین اللہ دے گھر کیتے وقف کر ݙتی۔ جݙݨ اللہ داد خان لینڈ ریوینیو افیسر ہن تݙانہہ انہاں نے انگریز سرکار توں بہت ساری زمین انہاں لوگاں کوں ݙیوائی جیہڑے اڄ وݙیرے تے نواب ہن۔ پنجاب تے سرائیکی وسیب دے سب وݙے خاندان نواب اللہ داد خان دا بہت احترام کریندے ہن تے اڄ تک انہاں دی اولاد نال محبت کریندن۔ اللہ داد خان ہک اچھے تے ایماندار افسر ہن۔ اگر چاہندے تاں پنجاب تے سرائیکی وسیب دے ہر شہر وچ زمین گھن سڳدے ہن، اگر چاہندے تاں نواب بݨ سڳدے ہن۔ انگریز کمیشنر روبرٹ پینی جݙݨ انڈیا توں واپس انگلیںڈ ڳیا تاں اوں نے کتاب لکھی جیندے وچ ہک پیج اللہ داد خان کیتے لکھا، جیندا عنوان ہئی "I met an angel in India" اوندے وچ اللہ داد خان دی شرافت، ایمانداری تے بہادری دا ذکر کیتا۔ اللہ داد خان دے چار پتر ہن تے چارے اچھی تعلیم یافتہ ہن۔ سب توں وݙے پتر احمد نواز خان جیہڑے برٹش انڈین ارمی وچ ہن، جنگ عظیم دوم لڑی تے بہادری دی تلوار حاصل کیتی، پاکستان بݨݨ دے بعد پاکستان ارمی وچ آئے، 1965ء وچ میجر دی پوسٹ تے ترقی حاصل کیتی، کراچی پوسٹنگ دے دوران فالج تھیوݨ دے بعد ارمی چھوڑ ݙتی تے سیاست وچ وݙیرہ شاہی دے خلاف الیکشن لڑا تے کامیاب سیاست دان بݨے۔ میانوالی دے پہلے وزیر بݨے۔ اللہ داد خان دے ݙوجھے پتر حبیب اللہ خان وی تعلیم یافتہ ہن، محکمہ ٹیکسیشن وچ ملازمت دا اغاز کیتا لیکن کجھ عرصہ بعد نوکری چھوڑ ݙتی۔ 1958ء وچ چکوال اچ کوئلے دا کم شروع کیتا تے پوٹھوہار دی کامیاب کاروباری شخصیت بݨے۔ اللہ داد خان دے تریجھے پتر غلام اکبر خان وی تعلیم یافتہ ہن لیکن ملازمت دی طرف نہ ڳئے تے بھکر اپݨے گرانہہ نواݨی وچ رہیے جتھاں انہاں نے زمیندارا سنبھالا۔ انہاں کوں ایہ اعزاز حاصل ہے کہ انہاں نے کچے وچ جدید زمیندارا متعارف کرایا تے لاہور توں نویں توں نویں جدید انجݨ گھن کے آئے، غلام اکبر خان نے اپݨے خاندان کوں سیاست وچ متارف کرایا تے ایوب خان دے دور وچ بلدیاتی الیکشن وچ حصہ گھدا جیندے وچ کامیابی حاصل کیتی۔ اللہ داد دے سب توں چھوٹے پتر دا ناں محمد اصغر خان ہئی، انہاں نے کیمبل پور کالج توں تعلیم مکمل کرݨ دے بعد برطانوی انڈین پولیس وچ شمولیت اختیار کیتی ۔1947ء اچ پاکستان بݨݨ دے بعد پنجاب پولیس دا حصہ بݨے۔ 1948ء دی کشمیر جنگ وچ حصہ گھدا تے جیں کمپنی دے نال ڳئے ہن، اوندے واحد زندہ بچ ونڄݨ والے سپاہی ہن جنہاں کوں بعد وچ اعزازی طور تے اونہی گن نال نوازا ڳیا جیندے نال انہاں نے جنگ وچ حصہ گھدا ہئی۔ ڈی آئی جی کوئٹہ، ڈی آئی جی ملتان، ڈی آئی جی کرائم برانچ، انچارج سپیشل اینٹی سمگلنگ بارڈر فورس پنجاب، جنرل مینیجر سکیورٹی پی آئی اے، کمشنر سوشل سکیورٹی پنجاب تے بکھر دے ایم این اے 1997 رہیے۔ اللہ داد خان شہاݨی کینسر دے مرض وچ مبتلا تھئے تے اینہی مرض دی وجہ نال خالق حقیقی نال ونڄ ملے۔ اللہ داد خان نے اپݨے ٻالاں کوں نصحیت کیتی، ترئے چیزاں نہ چھوڑنا، پہلی چیز اپنا مذہب، ݙوجھی اپݨی ٻولی سرائیکی نہ بھلݨا تے تریجھی، اپݨی مٹی نہ چھوڑݨا، بھکر یا نواݨی گرانہہ۔